JUECES 17 - Dios Rimashcata Quillcashcami

Micaías dioscunata charishcamanta

¹ Efraín urcupimi shuc runa tiyarca. Paica Micaías shutimi carca.

² Chai runami paipac mamataca: —Canca chai huaranga shuc patsac siclos cullquita shuhuachishpaca ñucapac ñaupapimi maldiciashpa rimarcangui. Chai cullquitaca ñucami shuhuashpa charicuni— nirca. Shina nicpimi, paipac mamaca: —¡Ñuca huahualla, Mandac Dios bendiciachun!— nirca.

³ Micaías paipac mamaman chai huaranga shuc patsac siclos cullquita cutichicpimi mamaca: —Chai cullquitaca canmantami Mandac Diosman chicanyachircani. Cai cullquita labrashpa, yacuyachishpa shuc diosta ruhuachunmi cugricurcani. Cunanca canllatac japilla— nirca.

⁴ Shina nicucpipish paica cutichircami. Mamaca ishcai patsac siclos cullquita japishpami cullquita yacuyachic runaman curca. Paimi chai cullquita yacuyachishpa shuc diosta ruhuarca. Chai diostaca Micaiaspac huasipimi churarca.

⁵ Chai Micaiasca dioscuna tiyana huasitami charirca. Shinallatac efodta, huasipi charina dioscunatapish ruhuachishpami paipac churicunamanta shuc churita acllashpa cura cachun churarca.

⁶ Chai punzhacunapica Israel llactapica mana jatun mandac tiyarcachu. Chaimantami gentecunaca quiquin munashcata ruhuashpa causarca.

Micaiaspac huasipi shuc Levita causashcamanta

⁷ Judá llacta Belén pueblopimi Judá aillupuramanta shuc levita moso pozashpalla causacurca.

⁸ Chai mosomi Judá llacta Belén pueblomanta maipi causanata mashcangapac llucshirca. Chashna llucshishpami Efraín urcu llactacunata rishpa Micaiaspac huasiman chayarca.

⁹ Shina chayacpimi Micaiasca: —¿Maimantatac shamucungui?— nishpa tapurca. Shina tapucpi paica: —Judá llacta Belén pueblomanta levitami cani. Maipi causanata mashcashpa chaipi causangapacmi ricuni— nirca.

¹⁰ Shina nicpimi Micaiasca: —Ñucahuan causangapac saquiri. Caipi saquirishpaca ñuca taita shinapish, cura shinapish tucunguimi. Ñucaca huatapi chunga siclos cullquitapish, micunatapish, churanatapish cushami— nirca. Shina nicpimi, chai levitaca chaipi causangapac saquirirca.

¹¹ Shinami levitaca chaipi causangapac ari nishpa Micaiaspac quiquin churi shina causarca.

¹² Micaiasca paipac cura cachunmi churarca. Chai mosoca cura tucushpami Micaiaspac huasipi causarca.

¹³ Chaimantami Micaiasca: —¡Levitami ñucapac cura cangapac shamushca, cunanca Mandac Diosca ñucataca imapipish allimi pushanga!— nirca.