JUECES 15 - Dios Rimashcata Quillcashcami

Sansón Timna pueblopi causaccunahuan piñanacushcamanta

¹ Sansonca asha punzhacuna quipami trigo pitina punzhacunapi manadamanta shuc malta chivota apashpa, huarmita ricungapac rirca. Shina rishpaca: —Ñuca huarmi sueñuna ucumanmi yaicusha nini— nirca. Shina yaicusha nicpipish, chai huarmipac taitaca yaicuchunca mana saquircachu.

² Chashna mana yaicuchisha nishpami taitaca: —Can mana ashtahuan cuyangachu yuyashpami, cambac ricsishcallamantac curcani. Shina cacpipish paipac quipa ñaña tiyanmi. ¿Paica manachu punta ñañata atishpa sumac soltera? Punta ñañapac randi paita apailla— nirca.

³ Shina nicpimi Sansonca: —¡Cunan ñuca mana allita ruhuashpapish filisteocunapac ñaupapica mana juchanchishcachu casha!— nirca.

⁴ Sansón chaimanta rishpaca quimsa patsac añascunata japishpami chupapura ishcai ishcaita huatarca. Chashna huatashpami chai huatashca chupacunapi antorchata huatarca.

⁵ Chaimantaca añascunapi ninata japichishpami filisteocunapac chagra chaupita cacharca. Shinami gavillacunatapish, trigo chagratapish, uvas chagratapish, olivos chagracunatapish rupachirca.

⁶ Chaimantami filisteocunaca: —¿Pitac caitaca ruhuarcayari?— nishpa tapunacurca. Shina tapunacushpami: —Sansonmi Timnat pueblomanta runa paiman ushita mana cazarachun cushpa paipac ricsishcaman cushcamanta chashna ruhuashca— nirca. Chaimantami filisteocunaca chai huarmitapish paipac taitatapish rupachirca.

⁷ Chaimantami Sansonca: —Cancuna chashna ruhuashcamantaca cancunatapish llaquichingacaman manatac samarishachu— nirca.

⁸ Shina nishpami filisteocunataca yallita piñarishpa achcata huañuchishpa Etam jatun quingraipi tiyac machaipi causagrirca.

Lehi lomapi Sansón huaranga filisteocunata huañuchishcamanta

⁹ Filisteocunaca Judá aillupacman huichai rishpami, Lehi lomacaman carpa huasita shayachishpa tiyarirca.

¹⁰ Chaipimi Judá aillucunaca: —¿Ima nishpatac ñucanchic-huan macanacungapac shamungui?— nishpa filisteocunataca tapurca. Shina tapucpi filisteocunaca: —Sansonta japishpa pai ima ruhuashca shinallatac paitapish llaquichingapacmi shamunchic— nircacuna.

¹¹ Shina nicpimi, Judá aillucunaca quimsa huaranga runacunahuan Etam jatun quingraipi tiyac machaiman rishpa Sansontaca: —¿Ima nishpatac chaita ruhuarcangui? ¿Filisteocuna ñucanchicta mandashpa charicuctaca manachu yachangui?— nircacuna. Shina nicpimi Sansonca: —Paicuna ñucata ima shina llaquichishca shinallatacmi paicunatapish llaquichircani— nirca.

¹² Shina nicpimi, Judá aillucunaca: —Ñucanchicca canta huatashpa filisteocunapac maquipi churangapacmi shamunchic— nircacuna. Shina nicpimi Sansonca: —Ñucata mana huañuchingapac Diospac shutipi ari nichic— nirca. Shina nicpimi paicunaca:

¹³ —Mana, mana huañuchishunchu, ashtahuanpish canta alli huatashpami, filisteocunapac maquipi churashun— nircacuna. Shinami Sansontaca ishcai mushuc huascacunahuan huatashpa, quingraipi tiyac machaimanta llucchircacuna.

¹⁴ Lehi lomaman Sansonhuan chayacpica, filisteocunaca munai cushicushpa caparinacushpami tupangapac llucchircacuna. Shina llucshicpimi Mandac Diospac Espíritu Sansonpacman shamurca. Chaimantami Sansonpac rigra huatashca huascacunaca rupashca lino puchca shina pitirinacushpa maquimanta urmarca.

¹⁵ Sansonca cunanlla huañushca burro jazhata tarishpami huaranga filisteocunata huañuchirca.

¹⁶ Chaimantami Sansonca: «Shuc burro jazhata japishpami shuc montonta, ishcai montonta ruhuarcani. Shuc burro jazhahuanmi, huaranga filisteocunata huañuchircani» nirca.

¹⁷ Chashna nishpaca chaipi burro jazhata shitashpami chai pambataca Ramat-lehita shutichirca.

En-hacoré pambapi Mandac Dios yacuta cushcamanta

¹⁸ Sansonca yallita yacunayaihuan cashpami Mandac Diostaca: —¿Canta servicpac maquihuan jatunta quishpichishca jahuachu cunanca yacunayaihuan mana circuncisionta ruhuashcacunapac maquipi huañuchun saquingui?— nirca.

¹⁹ Chaimantami Diosca chai Lehi pambapi tiyac pugrupi yacuta llucchirca. Chai yacuta ubiashpami Sansonca cutin sinchiyarca. Chaimantami chai yacu tiyac pushtutaca En-hacoreta shutichirca. Chai yacuca cunancamanmi tiyan.

²⁰ Sansonca ishcai chunga huatatami filisteocuna causacui punzhacunapica israelcunata mandarca.