JUECES 13 - Dios Rimashcata Quillcashcami

Sansón huacharishcamanta

¹ Israelcunaca cutinllatac Mandac Diospac ñaupapi mana allita ruhuai callaricpimi, Mandac Diosca chuscu chunga huatata filisteocunapac maquipi churarca.

² Zora pueblomantami Dan aillupuramanta Manoa runa tiyarca. Paipac huarmica huahuata mana chari pudic cashpami, mana sajuarirca.

³ Mandac Diospac ángel chai huarmiman ricurishpaca: «Canca mana huahuata chari pudicmi cangui. Shina cashpapish cunanca huicsayuc tucushpami shuc huahuata charigringui.

⁴ Chaimanta cunanca ima machana yacutapish, vinotapish ama ubianguichu. Shinallatac ima mapayachic micunata ama micunguichu.

⁵ Cunanca huicsayuc tucushpami, huahuata charigringui. Chai huahuataca acchatapish ama pitinguichu. Chai huahuaca mamapac huicsamanta pachami nazareo canga. Paimi israelcunataca filisteocunapac maquimanta quishpichinga» nirca.

⁶ Shina nicta uyashpami chai huarmi cusapacman rishpaca: «Diosmantami shuc runa ñucapacman shamurca. Pai Diospac ángel shina cacpimi manchashpa maimanta cashcatapish mana tapurcani. Paipish shutitaca mana huillarcachu.

⁷ Shina cashpapish paica: “Riqui, canca huicsayuc tucushpami shuc cari huahuata charigringui. Chaimanta cunanca ima vinotapish, ima machana yacutapish ama ubianguichu. Shinallatac ima mapayachic micunatapish ama micunguichu. Chai huahuaca mamapac huicsamanta pachami huañungacaman nazareo canga” nircami» nirca.

⁸ Chaimanta Manoa Mandac Diosta mañashpaca: «Ñuca Mandaclla, sarun cachashca cambac runata, chai huacharigricuc ñucanchic huahuata ima shina huiñachinata huillachun cutin cachaiyari» nirca.

⁹ Manoa mañashcata uyashpami, Diosca cutinllatac paipac angelta Manoapac huarmi chagrapi cacpi cacharca. Shina cacpipish paipac cusa Manoaca mana paihuanchu carca.

¹⁰ Chaimantami Manoapac huarmica utcashpa callpa rishpa paipac cusataca: «¡Uyai, sarun punzha ñucaman ricurishca runami cutin shamushca!» nishpa huillarca.

¹¹ Shina huillacpimi cusaca jatarishpa huarmita catishpa, chaiman chayashpaca: —¿Canchu sarun cai huarmihuan parlacca cangui?— nishpa tapurca. Shina tapucpi chai runaca: —Ari, ñucami cani— nirca.

¹² Shina nicpimi Manoaca: —Can nishca shina pactacpica, ¿ima shinatac huahuaca causanga? ¿Imatatac ruhuana can?— nishpa tapurca.

¹³ Shina nicpimi, Mandac Diospac angelca Manoataca: —Huarmica tucui ñuca nishcatami, cazuna can.

¹⁴ Uvasmanta ruhuashcataca imatapish ama micunguichu, vinotapish, machana yacutapish ama ubianguichu. Shinallatac imapish mapayachictaca ama micunguichu. Tucui ñuca mandashcatami pactachina can— nirca.

¹⁵ Chaimantami Manoaca Mandac Diospac angeltaca: —Ñucanchic manadamanta shuc chivota huañuchishpa, canman yanungacaman ashata shuyai— nirca.

¹⁶ Shina nicpimi, Mandac Diospac angelca: —Ñucata jarcacpipish cambac micunataca mana micushachu. Shina cashpapish chivota Mandac Diosman cushpa tucui rupachisha nishpaca, rupachilla— nirca. Manoaca Mandac Diospac ángel cashcataca mana yacharcachu.

¹⁷ Chaimantami Manoaca Mandac Diospac angeltaca: —Can huillashca shina pactacpi canta alli ningapac, ¿ima shutitac cangui?— nirca.

¹⁸ Shina nicpimi, Mandac Diospac angelca: —¿Imapactac ñuca shutitaca tapungui? Ñuca shutica sumaimana shutimi— nirca.

¹⁹ Manoaca paipac manadamanta shuc chivota apamushpami, asha harinahuan Mandac Diospac rumi jahuapi tucui rupachirca. Chaipimi angelca Manoapish, huarmipish ricucucpi, milagrota ruhuashpa ricuchirca.

²⁰ Diosman cushca altarpi nina culun nishpa huichai ricucpimi, Mandac Diospac angelca Manoapish, paipac huarmipish ricucucpi ninapi huichaiman rishpa chingarirca. Chaimantami paicunaca pambaman tuparicta cumurircacuna.

²¹ Mandac Diosca Manoamanpish, paipac huarmimanpish mana ashtahuan ricurircachu. Chaimantami Manoaca Mandac Diospac ángel cashcata yachac chayarca.

²² Shina yachashpami Manoaca paipac huarmitaca: —¡Ñucanchicca Diostami ricushcanchic. Cunanca huañushunmi!— nirca.

²³ Shina nicpimi, Manoapac huarmica: —Mandac Dios ñucanchicta huañuchisha nishpaca, ñucanchic cushpa tucuita rupachishcatapish, asha harinatapish mana chasquinmanchu carca. Shinallatac tucui caicunatapish, mana ricuchinmanchu carca. Shinallatac imatapish mana huillanmanchu carca— nirca.

²⁴ Chai huarmica shuc cari huahuata sajuarishpami, chai huahuataca Sansonta shutichirca. Chai huahua huiñacpimi, Mandac Diosca bendiciarca.

²⁵ Zora pueblohuan, Estaol pueblohuan tupanacuipi cac Danpac carpa huasipimi Sansontaca Diospac Espíritu japirca.