JUECES 10 - Dios Rimashcata Quillcashcami

Mandac Tola israelcunata mandashcamanta

¹ Abimelec huañushca quipaca Isacar aillupuramanta Fuapac churi Dodopac nieto Tolami israelcunata quishpichingapac jatarirca. Paica Efrainpac urcu Samir pueblomantami carca.

² Paica ishcai chunga quimsa huatatami israelcunata mandarca. Quipataca huañurcami. Shina huañucpimi Samir pueblollapitac enterrarca.

Mandac Jair israelcunata mandashcamanta

³ Mandac Tola huañushca quipaca Galaad aillumanta mandac Jairmi israelcunata quishpichingapac jatarirca. Paica ishcai chunga ishcai huatatami israelcunata mandarca.

⁴ Paica quimsa chunga churicunatami charirca. Chai churicunaca quimsa chunga burrocunapi montashpami puric carca. Shinallatac quimsa chunga pueblocunatami charirca. Chai pueblotaca cunancamanmi Jair pueblocuna nishpa cayan. Chai pueblocunaca Galaad llactapimi.

⁵ Jair huañucpica, Camón pueblopimi enterrarca.

Mandac Jefté israelcunata mandai callarishcamanta

⁶ Israelcunaca Baal, Astarot, Siria llacta, Sidón pueblopi tiyac, Moabpac, Amonpac churicunapac, filisteocunapac dioscunata servishpami Mandac Diosta piñachircacuna. Chashnami Mandac Diosta cungarishpa mana servircacuna.

⁷ Chaimantami Mandac Dios israelcunahuan nina japiric shina piñarishpa filisteocunapac maquipi, shinallatac amonitacunapac maquipi churarca.

⁸ Chai punzhapimi chunga pusac huatacunata yallita servichishpa llaquichirca. Jordán yacumanta chimbaman Galaadpi cac amorreocunapac llactapi causac israelcunatapish chashnallatacmi llaquichishpa charirca.

⁹ Chai quipaca amonitacunaca Jordán yacuta pasashpami Judapac, Benjaminpac aillucunahuan, Efrainpac huasi ucu familiahuan macanacungapac rirca. Chashnami israelcuna mai llaquita aparca.

¹⁰ Chaimantami israelcunaca Mandac Diosta caparishpa mañashpaca: —Canta servinata saquishpa shuctac Baal dioscunata servishpami canta piñachishpa juchallishcanchic— nirca.

¹¹ Chashna mañacpimi Mandac Diosca: —Cancunaca Egipto gentecuna, amorreocuna, amonitacuna, filisteocuna,

¹² Sidón gentecuna, amalecitacuna shinallatac madianitacuna llaquichicpica, ñucata mañarcanguichicmi. ¿Shina mañacpica manachu quishpichircani?

¹³ Shina cacpipish cancunaca ñucata saquishpami, shuctac dioscunata servinguichic. Chaimantami cutinca mana quishpichisha.

¹⁴ ¡Cunanca cancunata cai llaquimanta quishpichichunca, cancuna acllashca dioscunata caparishpa mañagrichic!— nirca.

¹⁵ Shina nicpimi, israelcunaca Mandac Diostaca: —Ñucanchicca juchallishcanchicmi. Cunanca cambac allipac can munashcata ruhuailla. Shina cashpapish cunan punzhaca quishpichiyari— nircacuna.

¹⁶ Shina nishpami paicunapac chaupipi tiyac dioscunata anchuchishpa Mandac Diosta servircacuna. Mandac Diosca israelcuna llaquita apacucta ricushpaca, paipish llaquirircami.

Jefté mandac tucushcamanta

¹⁷ Amonitacunaca tandanacushpami Galaad llactapi carpa huasicunata shayachishpa tiyarirca. Cutin israelcunaca Mizpa pueblopimi tandanacushpa carpacunata shayachishpa tiyarirca.

¹⁸ Galaad llactapi causac pushac israelcuna paicuna tapunacushpaca: —Maijanpish amonitacunahuan macanacuita callarichicmi tucui Galaad llactapi causaccunata mandanga— nircacuna.