JUECES 1 - Dios Rimashcata Quillcashcami

Judá shinallatac Simeón aillucuna Adoni-bezerta prezushcamanta

¹ Josué huañushca quipami, israelcunaca Mandac Diostaca: —¿Ñucanchicpuramanta cananeocunahuan macanacungapacca maijanta puntaca rina canchic?— nishpa tapurcacuna.

² Shina tapucpi, Mandac Diosca: —Judá ailluracmi llucshinga. Chai llactataca paicunapac maquipimi churani— nirca.

³ Shina nicpi, Judá ailluca paipac huauqui Simeonpac aillutaca: —Ñucanchic japina cashca allpata japingapac, huichai rishpa, cananeocunahuan macanacugrishun. Chai quipaca, cancuna japina cashca allpamantapish macanacugringapac— nirca. Shina nicpimi, Simeonca paicunahuan rirca.

⁴ Judá aillu huichai rishpa macanacucpica, Mandac Diosmi cananeocunata, ferezeocunata paicunapac maquipi churarca. Chashna churacpimi, Bezec pueblopi macanacushpa chunga huaranga gentecunata huañuchirca.

⁵ Bezec pueblopi jatun mandac Adoni-bezecta tarishpaca, paihuanpish macanacushpami cananeocunatapish, ferezeocunatapish misharcacuna

⁶ Shina mishacpimi, Adoni-bezecca miticushpa callparca. Shina callpacpica cati rishpami, japishpa chaquimantapish, maquimantapish mama dedota pitircacuna.

⁷ Shina piticpimi, jatun mandac Adoni-bezecca: «Ñucami canchis chunga jatun mandaccunataca paicunapac chaquimanta, maquimanta mama dedota pitichircani. Shina ruhuashpaca ñuca micucpi, urmashcata micuchunmi miza ucupi churarcani. Paicunata ruhuashca shinallatacmi ñucatapish Diosca ruhuashca» nirca. Chai quipaca Jerusalenman apacpimi chaipi huañurca.

Judá aillu Jerusalentapish, Hebrontapish quichushcamanta

⁸ Judá ailluca Jerusalenpi causaccunahuan macanacushpami, chai pueblota japishpa, chaipi causaccunataca espadahuan huañuchishpa pueblota rupachirca.

⁹ Chai quipaca Judá ailluca urcucunapi, Neguev pambacunapi, Sefela pambacunapi causac cananeocunahuanmi macanacugrirca.

¹⁰ Chaimanta rishpaca, Hebronpi causac cananeocunahuan macanacushpami, Sesai, Ahimán, Talmai mandaccunatapish huañuchirca. Utcapica Hebronca Quiriat-arba shutimi carca.

Jatun Mandac Otoniel Debir pueblota atishcamanta

¹¹ Cutin chaimanta rishpaca, Debir pueblopi causaccunahuanmi macanacugrirca. Utcapica chai puebloca Quiriat-sefer shutimi carca.

¹² Chai quipami Calebca: «Maijanpish Quiriat-sefer pueblopi causaccunahuan macanacushpa mishacmanca ñuca ushi Acsatami paipac huarmi cachun cusha» nirca.

¹³ Shina nicpica Cenazpac churi Calebpac quipa huauqui Otonielmi chai pueblopi causaccunahuan macanacushpa mishashpa chai pueblota japirca. Shina ruhuacpimi Calebca paipac ushi Acsata paipac huarmi cachun curca.

¹⁴ Paihuan ricucpimi Otonielca paipac huarmitaca: “Cambac taita allpata cuchun mañai” nishpa, huarmitaca cunarca. Acsa burromanta uricucpimi Calebca: —¿Imatatac ningui?— nirca.

¹⁵ Shina nicpimi paica: —Ñuca mañashcata uyaiyari. Neguev allpata cushpaca yacucunatapish cuiyari— nirca. Shina nicpimi, Calebca yacu llucshicuc junducunataca jahuapipish, urapipish curca.

Judá, Benjamín aillucuna allpata quichushcamanta

¹⁶ Moisespac suegro Ceneopac huahuacunami palmacuna tiyac pueblomanta Judá ailluhuan, Judá shitashca pambaman rirca. Chai pambaca Arad pueblo ladollapi cac Neguev pambami carca. Paicunaca chai gentecunahuanmi causangapac saquirirca.

¹⁷ Judá ailluca paipac huauqui Simeón ailluhuan rishpami Sefatpi causac cananeocunahuan macanacushpa atishpa tucuchirca. Chaimantami chai pueblotaca Horma shutita shutichirca.

¹⁸ Chashnallatac Judá ailluca Gaza pueblotapish, Ascalón pueblotapish Ecrón pueblotapish allpacunandimi japirca.

¹⁹ Judá aillucunaca Mandac Dios paicunahuan cacpimi, urcucunapi causaccunata llucchishpa cacharca. Ashtahuanpish pugru pambapi causac gentecunaca fierro carretacunatami charirca. Chaimantami paicunataca mana llucchishpa cachai pudirca.

²⁰ Moisés nishca shinallatacmi Hebrón pueblotaca Calebman curca. Chai pueblomantami paica Anacpac quimsa churicunata llucchishpa cacharca.

²¹ Shina cacpipish, Benjamín ailluca Jerusalenpi causac jebuseocunataca mana llucchishpa cachai pudircachu. Chaimantami jebuseocunaca Benjamín ailluhuan cunancaman chaillapitac causancuna.

Josepac aillu Bet-elta quichushcamanta

²² Josepac huasi ucupuramantapish Bet-el pueblopi causaccunahuan macanacungapac huichai rircami. Mandac Diosmi paicunahuan carca.

²³ Josepac huasi ucupuracunaca pacalla ricuccunatami Bet-el pueblopi churarca. Utcapica chai puebloca Luz shutimi carca.

²⁴ Pacalla ricuccunaca chai pueblomanta llucshic runahuan tupashpami: «Chai puebloman maita yaicuna cashcata ricuchi. Chashna ricuchicpica, cantaca mana huañuchishunchu» nirca.

²⁵ Chashnami chaipi causaccunataca espadahuan chugrichishpa tucui huañuchirca. Ashtahuanpish chai puebloman yaicunata ricuchic runataca paipac familiandimi imata mana ruhuashpa richun saquirca.

²⁶ Chai runaca heteocuna causana llactaman rishpami shuc pueblota ruhuashpa, Luz shutita shutichirca. Chai shutimi cunan punzhacaman can.

Manasés, Efreaín aillucuna allpata quichushcamanta

²⁷ Manasés ailluca Bet-seán, Taanac, Dor, Ibleam, Meguido pueblopi causaccunatapish, chai ladopi tiyac uchilla llactacunapi causaccunatapish mana llucchishpa cachai pudircachu. Chaimantami cananeocunaca chai llactallapitac causashpa catirca.

²⁸ Shina cashpapish israelcunaca ashtahuan mirashpa, achca tucushpami cananeocunamanta impuestota chasquishpa charirca. Paicunataca mana llucchishpa cachai pudircacunachu.

²⁹ Efraín aillupish Gezer pueblopi causac cananeocunataca mana llucchishpa cachai pudircachu. Ashtahuanpish paicunapac chaupillapitacmi Gezer pueblopi causarca.

Shuctac aillucuna allpata quichushcamanta

³⁰ Shinallatac Zabulón aillupish Quitrón pueblopi, Nahalal pueblopi causac cananeocunataca mana llucchishpa cachai pudircachu. Chai runacunaca paicunapac chaupillapitacmi impuestota cushpa causarca.

³¹ Shinallatac Aser aillupish Aco pueblopi, Sidón pueblopi, Ahlab pueblopi, Aczib pueblopi, Helba pueblopi, Afec pueblopi, Rehob pueblopi causaccunataca mana llucchishpa cachai pudircachu.

³² Aser aillucunaca chai llactapi causac cananeocunata mana llucchishpa cachai pudishpami, paicunallahuantac tandarishpa causarca.

³³ Neftalipac aillupish Bet-semes pueblopi, Bet-anat pueblopi causac cananeocunataca mana llucchishpa cachai pudishpami, paicunallahuantac tandarishpa chai llactapi causarca. Bet-semes, Bet-anat pueblopi causaccunaca impuestota cushpami causarca.

³⁴ Cutin Dan aillutaca amorreocunaca pugru pamba llactacunaman mana yaicuchun saquishpami urcucunallapi causachun saquirca.

³⁵ Chaimantami Heres urcupipish, Ajalón, Saalbim pueblopipish causarca. Shina cacpipish, Josepac huasi ucupuramanta mirarishpami amorreocunamantaca impuestota chasquishpa causarca.

³⁶ Amorreocunapac llactacunaca Acrabim urcuman rina huichaimanta, Sela pueblomanta huichaimanmi carca.