SAN JUAN 9 - Dios Rimashcata Quillcashcami

Huacharishcamanta pacha ñahui mana ricuc runata Jesús alliyachishcamanta

¹ Chaimanta Jesús rishpaca, huacharishca pachamanta ñahui mana ricuc runatami ricurca.

² Yachacuccuna Jesustaca: —Yachachic, cai runa ñahui mana ricuc huacharichunca, ¿taita mamachu juchallirca? ¿Mana cashpaca paipac juchallamantachu chashna tucushca canga?— nirca.

³ Chaimantami Jesusca: —Mana paipac juchamantachu, shinallatac mana taita mamapac juchamantachu chashnaca tucushca, ashtahuanpish Dios munashcata cai runapi ricuchingapacmi, chashnaca huacharirca.

⁴ Punzha tiyacpiracmi, ñucata Cachac Diospacta ruhuana canchic. Ña tutayacpica, pi imata mana ruhuai pudinchu.

⁵ Cai pachapi cashcacamanca, cai pachapi causaccunata achicyachic luzmi cani— nirca.

⁶ Chaita nishpami, pambapi tucashpa, turuta ruhuashpa chai runapac ñahuipi llutarca.

⁷ Shina llutashpaca: —Cunanca, Siloé uchilla cuchapi jahuaringapac ri— nirca. (“Siloé” nishpaca, “cachashca” nisha ninmi). Chai runa jahuaringapac rishpaca, ñahui ricucucmi cutirca.

⁸ Chaimantami vecinocunapish, mañashpa tiyacta ricuccunapish: —Cai runaca, ¿manachu mañashpa tiyacuc runa?— ninacurca.

⁹ Maijanca: —Ari, paimi— nirca. Maijanca: —Mana paichu. Shuc pailaya runami— ninacurca. Shina ninacucpimi paica: —Ari, ñucallatacmi cani— nirca.

¹⁰ Shina nicpimi paicunaca: —¿Ima shinatac ñahuica pascarirca?— nirca.

¹¹ Shina nicpimi paica: —Jesús shuti runami turuta ruhuashpa, ñahuipi llutashpaca: “Siloé cuchapi jahuarigri” nirca. Siloeman rishpa, ñahuita jahuarishpaca, ña ricurcanillami— nirca.

¹² Chashna nicpimi paicunaca: —¿Maipitac chai runaca?— nirca. Shina nicpimi paica: —Mana yachanichu— nirca.

Fariseocuna alli tucushca runaman tapushcamanta

¹³ Chai alli tucushca runataca fariseocunapacmanmi pusharcacuna.

¹⁴ Jesusca samana punzhapimi chai runataca alliyachishca carca.

¹⁵ Fariseocunaca ima shina alliyashcatami tapurca. Shina nicpimi paica: —Turutami ñahuipi llutarca. Quipaca jahuarircanimi. Cunanca ñami ricucuni— nirca.

¹⁶ Shina nicpi, maijan fariseocunaca: —Samana punzhata mana cazunchu, paica mana Diosmantachu shamushca— nirca. Cutin maijanca: —Shuc juchayuc runaca, ¿ima shinatac milagrocunataca ruhuangayari?— nirca. Chashna ninacushpami, paicunapura chicanyarinacurca.

¹⁷ Cutinllatac alliyashca runata fariseocunaca: —Ñahuita alliyachic runataca, ¿canca imatatac ningui?— nirca. Shina nicpimi paica: —Dios ima nishcata huillacmi— nirca.

¹⁸ Mandac israelcunaca pai ñahui mana ricuc cashcatapish, alliyashcatapish mana crircacunachu. Chaimantami paipac taita mamata

¹⁹ cayachishpa: —¿Paichu ñahui mana ricuc huacharishca cancunapac huahua? ¿Ima shinatac cunanca ricucunyari?— nirca.

²⁰ Chaimantami taita mamaca: —Ari, caica ñucanchic huahuami. Pai ñahui mana ricuc huacharishcataca yachanchicmi.

²¹ Cunan ima shina alliyashcatapish, pi alliyachishcatapish, mana yachanchicchu. Paillamantac tapuichic. Paica ña juizhu runami. Paimi ima cashcata ninga— nirca.

²² Fariseocuna: “Maijanpish ‘Jesusca Cristomi’ nishpa huillacpica, israelcunapac tandanacuimanta llucchishpa cachashcami canga” nishpami, ñaupaman yuyarinacushca carca. Chaimantami mandac israelcunata manchashpa, taita mamaca chashna nirca.

²³ Chaimantami paipac taita mamaca: “Paillamantac tapuichic. Paica juizhu runami” nirca.

²⁴ Shina nicpimi, cutin alliyashca runata mandac israelcuna cayashpaca: —Diospac shutipi huillai. Ñucanchicca chai Jesús runataca juchayuc cashcatami yachanchic— nirca.

²⁵ Shina nicpimi paica: —Chai runa, juchayuc cashcata, mana juchayuc cashcata mana yachanichu, ashtahuanpish ñuca ñahuita alliyachicpi, cunan ricucushcallatami yachani— nirca.

²⁶ Shina nicpimi, cutinllatac tapushpaca: —¿Imatatac ruhuarca? ¿Ima shinatac ñahuita alliyachirca?— nirca.

²⁷ Shina nicpimi paica: —Ña huillanica, ¿manachu uyarcanguichic? ¿Cutinchu huillachun ninguichic? ¿Cancunapish paita caticcunachu tucushun ninguichic?— nirca.

²⁸ Shina nicpi, paicuna piñarishpaca: —Canmi paita catic cangui. Ñucanchicca Moisesta caticcunami canchic.

²⁹ Dios rimashcata Moisés huillashcallatami yachanchic, ashtahuanpish chai runa maimanta cashcataca mana yachanchicchu— nirca.

³⁰ Shina nicpimi, chai runaca: —Cancuna pai maimanta shamushcata mana yachanaca shuc mancharinami. Paimi ñuca ñahuita alliyachirca.

³¹ Diosta mana cazuccuna mañashcata mana uyac cashcataca allimi yachanchic. Ashtahuanpish paita manchacta, pai munashcata ruhuac mañashcataca uyanmi.

³² Huacharishcamanta pacha ñahui mana ricuc runata alliyachishcataca, jaicapi pi mana uyashcachu.

³³ Chai runa mana Diosmanta shamushca cashpaca, imatapish mana ruhuanmanchu— nirca.

³⁴ Shina nicpimi paicunaca: —Canca juchasapami huacharircangui. ¿Chashna cashca jahuachu ñucanchicta yachachisha ningui?— nirca. Chashna nishpami, paitaca tandanacuna huasimanta llucchishpa cacharca.

Diosta mana ricsicca ñahui mana ricuc shina cashcamanta

³⁵ Chai alliyashca runata tandanacuimanta llucchishpa cachashcata Jesús yachashpami, paita mashcarca. Ña tupashpaca: —¿Canca Runa Tucungapac shamushcataca cringuichu?— nirca.

³⁶ Shina nicpimi paica: —Amito, ¿pitac chaica, ñuca paita cringapac?— nirca.

³⁷ Shina nicpimi Jesusca: —Ña ricucunguimi. Canhuan rimacucllatacmi cani— nirca.

³⁸ Shina nicpimi paica: —Apunchic Jesús, crinimi— nishpa, cungurishpa, Jesusta alli nirca.

³⁹ Chashna nicpimi Jesusca: —Ñucaca taripangapacmi cai pachaman shamurcani. Ñahui mana ricuccunata alliyachingapac, cutin ricuccunataca ñahui mana ricucta ruhuangapacmi shamurcani— nirca.

⁴⁰ Maijan fariseocuna chaita uyashpaca: —¿Shinashpaca ñucanchicpish ñahui mana ricuccunachu canchic?— nircacuna.

⁴¹ Shina nicpimi Jesusca: —Ñahui mana ricuccuna cashpaca, manachari juchayuccuna canguichicman. Ashtahuanpish “ricushpami causacunchic” nishcamantacarin, juchayuccunami canguichic— nirca.