SAN JUAN 8 - Dios Rimashcata Quillcashcami

¹ Jesusca Olivos urcumanmi rirca.

² Chai cayandi punzha pacarimucucpimi, Diosta mañana huasiman cutirca. Chaiman gentecuna chayacpimi, Jesusca tiyarishpa yachachi callarirca.

³ Chaimanmi mandashcacunata yachachiccunapish, fariseocunapish shuc huarmi huainayacucta japishpa, apamurca. Chai huarmita gentecunapac chaupipi

⁴ shayachishpaca: —Yachachic, cai huarmitaca huainayacuctami japimunchic.

⁵ Moisés mandashcapica, cai shina mana allita ruhuac huarmicunataca rumihuan shitashpa huañuchichun ninmi. Canca, ¿imatatac ningui?— nirca.

⁶ Jesús mana allita nicpica, juchanchingapacmi chashnaca tapurca. Ashtahuanpish Jesusca cumurishpami, maqui dedohuan pambapi quillcacurca.

⁷ Chashna tapushpa caticpi, Jesús jatarishpaca: —Cancunapuramanta maijan jucha illac cashpaca, pairac rumihuan shitachun— nirca.

⁸ Shina nishpaca, cutinllatacmi cumurishpa pambapi quillcashpa catirca.

⁹ Chaita uyashpaca, shungupi nanarishpami shucllancaman shucllancaman rirca. Yuyacmanta callarishpami chai huarmillata Jesus-huanca saquishpa rircacuna.

¹⁰ Jesús shayarishpa, pitapish mana ricushpa, huarmilla chaipi shayacucpica: —Uyai, ¿maipitac chai juchanchiccunaca? ¿Manachu maijan juchanchirca?— nirca.

¹¹ Shina nicpimi, chai huarmica: —Amito, mana pi juchanchircachu— nirca. Shina nicpimi Jesusca: —Ñucapish mana juchanchinichu. Rilla, cutinca ama juchallinguichu— nirca.]

Jesús achicyachic luz cashcamanta

¹² Cutinllatac Jesusca israelcunataca: —Ñucami tucui cai pachapi causaccunapac achicyachic luz cani. Maijanpish ñucata caticca mana amsapi puringachu, ashtahuanpish causaita cuc luztami charinga— nirca.

¹³ Shina nicpimi fariseocunaca: —Canllamantatacmi huillacungui. Chaimanta can huillashcapish yangallami— nirca.

¹⁴ Shina nicpimi Jesusca: —Ñucaca maimanta shamushcatapish, maiman ricushcatapish yachanimi. Chaimantami ñucallamanta huillacushcapish, mana yangalla can. Ashtahuanpish cancunaca ñuca maimanta shamushcatapish, maiman ricushcatapish mana yachanguichicchu.

¹⁵ Cancunaca gentecuna yuyashca shinami juchanchinguichic. Ashtahuanpish ñucaca pita mana juchanchinichu.

¹⁶ Ñucaca mana ñucallachu juchanchini, ashtahuanpish ñucata cachac Taitahuanmi juchanchini. Chaimantami ñucaca cashcata ruhuashpa juchanchini.

¹⁷ Moisés mandashcacunapica: “Ishcai huillaccuna tiyacpimi, cierto cashcata yachana” ninmi.

¹⁸ Ñuca quiquinmantami huillacuni. Ñucata cachac Taitapish ñucallamantatacmi huillan— nirca.

¹⁹ Shina nicpimi paicunaca: —¿Maipitac cambac taitaca?— nirca. Chaimantami Jesusca: —Cancunaca ñucatapish, ñuca Taitatapish mana ricsinguichicchu. Ñucata ricsishpaca, ñuca Taitatapish ricsinguichicmanmi— nirca.

²⁰ Jesusca caicunataca Diosta mañana huasipi, ofrenda churana ladopimi yachachirca. Paita japina horas manarac chayamucpimi, paitaca pi mana japirca.

Jesús ricushcaman pi mana ri pudic cashcamanta

²¹ Cutinllatac Jesusca: —Ñucaca rigrinimi. Cancunaca mashcanguichicmi. Ñuca ricushcamanca mana ri pudinguichicchu Cancunapac juchallapitacmi huañunguichic— nirca.

²² Chaita uyashpami mandac israelcunaca: —¿Pai: “Ñuca ricushcamanca mana ri pudinguichicchu” nishpaca, paillatac huañunamantachu nicun?— ninacurca.

²³ Shina nicpimi Jesusca: —Cancunaca caimantami canguichic. Ñucaca jahua pachamantami cani. Cancunaca cai pachamantami canguichic. Ñucaca mana cai pachamantachu cani.

²⁴ Chaimantami “cancunapac juchallapitacmi huañunguichic” nircani. Ñucata cancuna mana crishpaca, cancunapac juchallapitacmi huañunguichic— nirca.

²⁵ Chaimantami Jesustaca: —Canca, ¿pitac cangui?— nirca. Shina tapucpimi Jesusca: —Ñuca pi cashcataca callarillapitacmi huillarcani.

²⁶ Cancunata juchanchishpa, tauca ninacunatami charini. Shina cashpapish ñucata Cachacca imatapish cashcatami nin. Ñucaca pai imata nishcallatami nini— nirca.

²⁷ Paicunaca Diosmanta Jesús huillacushcata mana entendircachu.

²⁸ Chaimantami Jesusca: —Runa Tucungapac shamushca ñucata chacatashpami, ñuca pi cashcata, ñuca munaimanta imatapish mana ruhuac cashcata, ashtahuanpish ñuca Taita yachachishcata nic cashcata yachanguichic.

²⁹ Ñucata Cachacca ñucahuanmi. Ñucaca pai munashcallatami ruhuani. Chaimantami paica mana ñucallata saquin— nirca.

³⁰ Chaicunata Jesús nicpica, achcacunami crircacuna.

Diospac huahuacunamantapish, juchapi huatashca shina causaccunamantapish

³¹ Jesusca paita cric israelcunataca: —Cancunaca ñuca rimashcata cazushpaca, ñuca yachacuccunatacmi canguichic.

³² Chashnami cashcata nic cashcata ricsinguichic. Chai cashcata nic rimashcami cacharichinga— nirca.

³³ Shina nicpimi paicunaca: —Ñucanchicca Abrahampac huahua huahuacunami canchic. Jaicapi huatashca shina servicca mana canchicchu. ¿Ima nishpatac cacharichingami ninguiyari?— nirca.

³⁴ Shina nicpimi Jesusca: —Maijanpish juchata ruhuacca juchapi huatashca shinami. Chaica chashnatacmi can.

³⁵ Shuc servicca mana amopac huasipi huiñaita causanchu, ashtahuanpish churimi taitahuan causacungalla.

³⁶ Chaimanta Diospac Churi cancunata huatashca shinamanta cacharichicpica, cacharishcatacmi canguichic.

³⁷ Cancuna Abrahampac huahua huahuacuna cashcataca yachanimi. Chashna cacpipish, ñuca yachachishcata mana entendishpami, ñucataca huañuchishun nicunguichic.

³⁸ Ñucaca, ñuca Taitahuan cashpa, ricushcallatami huillani. Cancunaca cancunapac taita nishcallatami ruhuanguichic— nirca.

Cancunapac taitaca diablomi nishcamanta

³⁹ Shina nicpimi paicunaca: —Ñucanchic taitaca Abrahammi— nirca. Shina nicpimi Jesusca: —Cancuna Abrahampac huahuacuna cashpaca, Abraham ruhuashcatachari ruhuanguichicman.

⁴⁰ Ñuca Diosmanta uyashcata, cashcata nishcata nicucpipish cancunaca huañuchishun ninguichicmi. Abrahamca jaicapi mana chashna ruhuarcachu.

⁴¹ Cancunaca cancunapac taita ruhuashcatami ruhuanguichic— nirca. Shina nicpimi paicunaca: —¡Ñucanchicca mana huainapac huahuacunachu canchic, ashtahuanpish shuc taitallatami charinchic! ¡Chaica Diosmi!— nirca.

⁴² Shina nicpimi, Jesusca: —Dios cancunapac taita cacpica, cuyanguichicmanmi. Ñucaca Diosmantami shamurcani. Mana ñuca munaimantachu shamurcani, ashtahuanpish Diosmi cacharca.

⁴³ ¿Ima nishpatac ñuca rimashcataca mana entendinguichic? Ñuca rimashcata mana uyashun nishpami, mana entendinguichic.

⁴⁴ Cancunaca diablopac huahuacunami canguichic. Chaimantami pai munashcata ruhuanguichic. Diabloca callarimanta pachami huañuchic, llullac cashca. Paica jaicapi mana cashcata ninchu. Paica llullapac taitami. Pai llullashpaca, pai ima shina cashca shinallatacmi ricuchin.

⁴⁵ Chaimantami ñuca imapish cashcallata nicpica, mana cringuichic.

⁴⁶ ¿Cancunapuramanta maijantac ñuca juchayuc cashcataca ricuchinguichic? Diosmanta ñuca huillacpica, ¿ima nishpatac mana cringuichic?

⁴⁷ Maijanpish Diospac huahua cashpaca, pai rimashcatami uyasha nin, ashtahuanpish cancunaca mana Diospac huahua cashpami, pai rimashcataca mana uyashun ninguichic— nirca.

Abraham manarac tiyacpi, Jesucristo ña tiyashcamanta

⁴⁸ Chaimantami mandac israelcunaca Jesustaca: —Ñucanchic: “Canca Samaria llactamantami cangui, shinallatac supaihuanmi cangui” nishpaca, allitami nishcanchic— nirca.

⁴⁹ Shina nicpimi Jesusca: —Ñucaca mana supaihuan canichu. Ñucaca Taitatami jatunyachini, ashtahuanpish cancunaca ñucataca mana jatunyachinguichicchu.

⁵⁰ Gentecuna ñucata alli nichunca mana munanichu, ashtahuanpish ñuca Taitata alli nichunmi munan. Paillami taripanga.

⁵¹ Maijanpish ñuca nishcata cazucca mana huañungachu. Chaica, chashnatacmi canga— nirca.

⁵² Shina nicpimi, mandac israelcunaca: —Cunancarin supaihuan cashcata yachanchictacmi. Abrahampish, Dios ima nishcata huillaccunapish huañurcami. Shina cacpica, ¿ima nishpatac canca “maijanpish ñuca nishcata cazuccunaca mana huañungachu” ninguiyari?

⁵³ ¿Canca Abrahamta yallichari cangui? Paipish, Dios ima nishcata huillaccunapish huañurcami. Canca, ¿ima nishpatac chashnaca nicunguiyari?— nirca.

⁵⁴ Shina nicpimi, Jesusca: —Ñucallata “allimi cani” nirishpaca, chaica yangami canman. Ñucata alli nicca, ñuca Taitami. Paillatatacmi cancunaca “ñucanchic Dios” ninguichic.

⁵⁵ Cancunaca paitaca mana ricsinguichicchu. Ñucaca ricsinimi. Ñuca “mana ricsinichu” nishpaca, cancuna shinallatac llullacmi caiman. Ñucaca ricsinitacmi. Chaimantami pai ima nishcataca cazuni.

⁵⁶ Taita Abrahamca ñuca cai pachaman shamuna punzhata ricushpami cushicurcami. Ña ricushpaca, ashtahuanmi cushicurca— nirca.

⁵⁷ Shina nicpimi, mandac israelcuna Jesustaca: —Manarac pichca chunga huatatapish charinguica. ¿Ima shinatac taita Abrahamta ricurcangui?— nirca.

⁵⁸ Shina nicpimi Jesusca: —Manarac taita Abraham tiyacpimi, ñucaca ña tiyarcani. Chaica chashnatacmi can— nirca.

⁵⁹ Shina nicpimi, paicunaca rumihuan shitangapac rumicunata japircacuna. Ashtahuanpish Jesusca miticushpami, Diosta mañana huasimanta llucshishpa rirca.