SAN JUAN 7 - Dios Rimashcata Quillcashcami

Jesuspac quiquin huauquicuna mana crishcamanta

¹ Chai quipaca, Jesusca Galilea llactapimi puricurca. Mandac israelcuna huañuchishun nishcamantami, Judea llactapi canataca mana munarca.

² Israelcunapac chuclla ruhuana fiesta punzhacunami chayamucurca.

³ Jesuspac huauquicunaca Jesustaca: —Ama caipi caichu, canta caticcuna can imalla ruhuashcata ricuchun, Judea llactaman ri.

⁴ Maijanpish gentecunaman ricsichisha nishpaca, mana pacallapi imatapish ruhuanchu. Shuctac llacta gentecunamanpish milagrota ruhuashpa ricuchiyari— nirca.

⁵ Quiquin huauquicunapish Jesusta mana crircacunachu. Chaimantami Jesusca:

⁶ —Ñucapac horasca manarac chayamunchu. Cancunamanmi ima horaspish alli.

⁷ Cai pacha gentecunaca cancunataca mana piñanchu, ashtahuanpish paicuna mana allita ruhuashcata ñuca huillashcamantami, ñucataca piñancuna.

⁸ Chai fiestamanca richiclla. Ñucapac horas manarac chayamushcamantami, ñucaca mana rini— nirca.

⁹ Chashna nishpami, Galilea llactallapitacmi saquirirca.

Israelcunapac fiesta punzhacunapi Jesús yachachishcamanta

¹⁰ Paipac huauquicuna fiestaman rishca quipaca, Jesuspish rircami. Shina rishpapish, mana pi yachacllapimi pacalla rirca.

¹¹ Mandac israelcuna Jesusta mashcashpaca: —Chai runaca, ¿maipishi canga?— nishpami mashcacurca.

¹² Gentecunapurapi maijan huashalla parlanacushpaca: “Chai runaca alli runami”, cutin maijancunaca: “Paica mana alli runachu. Gentecunata umashpami purin” ninacurca.

¹³ Shina ninacushpapish, mandac israelcunata manchashcamantami, pipish Jesusmanta imata mana nishpa, picunapuralla parlanacurca.

¹⁴ Chai fiesta punzhacuna ña chaupiyamucucpimi, Jesusca Diosta mañana huasipi yachachi callarirca.

¹⁵ Jesús shina yachachicpimi israelcunaca: —¿Ima shinatac cai runaca yachachicllapish mana rishpa, cai tucuita yachanlla?— nishpa mancharirca.

¹⁶ Shina nicpimi Jesusca: —Ñuca yachachishcaca mana ñuca munaimantachu, ashtahuanpish ñucata cachac Diosmantami.

¹⁷ Maijanpish Dios munashcata ruhuanata munaccunami, ñuca yachachishcaca ñuca munaimanta cashcata, mana cashpaca Diosmanta cashcata yachac chayancuna.

¹⁸ Quiquin munaillamanta rimacca, jatun tucunallatami munan. Shina cacpipish, Cachacta jatunyachicmi, cashcata nin. Paica jaicapi mana llullanchu.

¹⁹ Moisesmi mandashcacunataca curca. Ashtahuanpish cancunaca shucllapish mana cazunguichicchu. ¿Ima nishpatac ñucataca huañuchishun ninguichic?— nirca.

²⁰ Shina nicpimi gentecunaca: —¡Supai japishcami cangui! ¿Pitac cantaca huañuchisha nicun?— nirca.

²¹ Shina nicpimi Jesusca: —Shuc milagrota ñuca ruhuashcamantami mancharishpa saquiringuichic.

²² Moisesmi circuncisionta ruhuachun mandarca. Chaitami samana punzha cacpipish, cari huahuacunata circuncisionta ruhuachinguichic. Chai mandashcacunaca mana Moisesmantachu shamurca, ashtahuanpish ñaupa taitacunami chaitaca ruhuachiccuna carca.

²³ Moisés mandashcata mana paquingaraicumi, samana punzhapipish circuncisionta ruhuanguichic. Shinashpaca, ¿ima nishpatac samana punzhapi ungushca runata ñuca alliyachishcamantaca piñaringuichic?

²⁴ Ama ñahuita ricushpalla juchanchichicchu. Ashtahuanpish cashcata ruhuashpa juchanchichic— nirca.

Pai maimanta cashcataca Jesusllatac parlashcamanta

²⁵ Jerusalén pueblo maijan israelcuna parlanacushpaca: —¿Manachu cai runaca huañuchingapac mashcacushca?

²⁶ Riquichic, tucuipac ñaupapimi rimaricun. Pipish imata mana ninchu. ¿Mandaccunapish “Cristomi” nishpachu crincuna?

²⁷ Ashtahuanpish pai maimanta cashcataca yachanchicmi. Shamuna cashca Cristo shamucpica, maimanta shamushcataca pi mana yachangachu— ninacurca.

²⁸ Jesús Diosta mañana huasipi yachachishpaca: —¿Ñuca maimanta cashcatapish, pi cashcatapish yachanguichicchu? Mana ñuca quiquinllamantachu shamurcani, ashtahuanpish cashcata ruhuac Dios cachacpimi shamurcani. Paitaca cancunaca mana ricsinguichicchu.

²⁹ Ñucataca Diosmi cacharca. Paimanta shamushca cashpami, paitaca ricsini— nirca.

³⁰ Jesusta prezushun nicushpapish manarac prezuna horas cacpimi, pi mana japirca.

³¹ Ashtahuanpish achca gentecuna paita crishpaca: —Cristo shamushpaca, ¿cai runa ruhuashcamanta yallichu milagrocunata ruhuanga?— nircacuna.

Fariseocuna Jesusta prezushun nishcamanta

³² Fariseocunaca gentecuna Jesusmanta parlanacuctami uyarca. Chaimantami fariseocunapish, curacunata mandac curacunapish Jesusta japichun soldadocunata cacharca.

³³ Chaimantami Jesusca: —Ashacamanllami cancunahuan casha. Quipataca ñucata Cachacpacmanmi risha.

³⁴ Ñucata mashcashpapish mana taringuichicchu. Ñuca maipi cashcamanca mana chayai pudinguichicchu— nirca.

³⁵ Chaimanta israelcunaca caishuc chaishuc tapunacushpaca: —Ñucanchic mana tarichunca, ¿maimanshi ringa? ¿Ñucanchicpuramanta Grecia llactaman rishcacunapacmanchu risha nin? ¿Chaipichu israelcunata yachachisha nin?

³⁶ Pai: “Ñucata mashcashpapish mana taringuichic. Ñuca maipi cashcamanca mana chayai pudinguichicchu” nishpaca, ¿imatatac nisha nin?— ninacurca.

Causaita cuc yacumanta

³⁷ Fiesta tucuri jatun punzhapi Jesús jatarishpa sinchita rimashpaca: —Maijanpish yacunayachicca ñucapacman shamushpa, yacuta ubiaichic.

³⁸ Dios quillcachishcapi nishca shina, maijanpish ñucata cricpac shungumantaca, causaita cuc yacumi llucshinga— nirca.

³⁹ Jesusca, paita criccuna Diospac Espirituta chasquina cashcamantami chashna nirca. Jesusta Dios manarac jahua pachaman pushacpimi, Diospac Espirituca manarac shamushca carca.

Gentecuna caita chaita yuyashcamanta

⁴⁰ Chaita uyashpami maijan gentecunaca: «Cai runaca ñucanchic shuyacushca Dios ima nishcata huillacmi» ninacurca.

⁴¹ Cutin shuccunaca: «Paica Cristomi» ninacurca. Shina cacpipish maijancunaca: «¿Cristoca Galilea llactamantachu shamunga?

⁴² ¿Manachu Dios quillcachishcapica: “Cristoca mandac Davidpac aillupuramanta, pai huacharishca Belén pueblomanta shamunga” nin?» ninacurca.

⁴³ Paimanta gentecunapura shucca shuctac, shucca shuctac ninacushpa chicanyarinacurca.

⁴⁴ Maijancuna Jesusta prezushun yuyacushpapish, mana imata ruhuarcachu.

Mandac israelcuna Jesusta mana crishcamanta

⁴⁵ Japichun cachashca soldadocuna fariseocunapacman, curacunata mandac curacunapacman cutimucpi paicunaca: —¿Ima nishpatac Jesusta mana japimunguichic?— nirca.

⁴⁶ Shina nicpimi soldadocunaca: —Chai runa shinaca, jaicapi pi mana rimashcachu— nirca.

⁴⁷ Shina nicpimi fariseocunaca: —¿Cancunatapish crichircachu?

⁴⁸ ¿Mandac israelcunapish, fariseocunapish paita crishcachu?

⁴⁹ ¡Chai gentecunaca Moisés mandashcacunata mana yachanchu! Chaimantami paicunaca llaquita apanga— nirca.

⁵⁰ Shuc tuta Jesuspacman ric, fariseocunapuramanta Nicodemomi chaipi carca. Paica:

⁵¹ —Mandashcapi nishca shinaca, ima ruhuashcata manarac alli yachashpaca, pitapish mana juchanchinallachu canchic— nirca.

⁵² Shina nicpimi paicunaca: —¿Canpish Galilea llactamantachu cangui? Dios quillcachishcata ricui. Chaipica: “Galileamantaca pi huillac mana shamushcachu” ninmi— nirca. [

Huainayac huarmimanta

⁵³ Chai quipaca quiquin huasimanmi rircacuna.