SAN JUAN 5 - Dios Rimashcata Quillcashcami

Jesús paralisis ungüihuan cac runata alliyachishcamanta

¹ Chai quipaca, israelcunapac fiestami carca. Chaimantami Jesusca Jerusalenman rirca.

² Jerusalenpimi ovejacuna yaicuna pungu ladopimi, shuc cucha tiyarca. Chai cuchaca hebreo rimaipica Betesda shutimi can. Chaimanca pichca pungutami yaicuna carca.

³ Chai yaicunapica tauca ungushcacunami tiyac carca. Paicunaca ñahui mana ricuccuna, suchucuna, paralisis ungushcacunami carca.

⁴ Chaica, shuc angelmi jahua pachamanta cuchaman shamushpa, maijan cutinlla yacuta cuyuchic carca. Maijanpish utca yacuman yaicushpami ima ungüimantapish alliyac carca.

⁵ Chaipica, quimsa chunga pusac huatata ungushca shuc runami tiyarca.

⁶ Jesusca chai runata ricushpaca, unai huatacunata ungushca cashcatami yacharca. Chaimantami chai runataca: —¿Alliyasha ninguichu?— nirca.

⁷ Chai ungushca runaca: —Amito, yacuta cuyuchicpi, pi ñucata apacmi mana tiyan. Ñuca yacuman yaicungacamanca shuccunaracmi atishpa yaicun— nirca.

⁸ Shina nicpimi Jesusca: —Jatarishpa, canta huandumushcata apashpa rilla— nirca.

⁹ Chashna nincami, chai runaca alliyashpa, paita huandumushcata apashpa puri callarirca. Chai punzhaca samana punzhami carca.

¹⁰ Chaimantami mandac israelcunaca chai alliyashca runataca: —Cunanca samana punzhami. Canta huandumushcataca mana apanachu cangui— nirca.

¹¹ Shina nicpimi, chai runaca: —Ñucata alliyachicmi: “Canta huandumushcata apashpa rilla” nirca. Chaimantami apashpa ricuni— nirca.

¹² Shina nicpimi paicunaca: —¿Pitac: “Huandumushcata apashpa rilla” nircayari?— nirca.

¹³ Alliyashca runaca pi alliyachishcata mana yacharcachu. Chaica, Jesusca achca gentecunapurapimi carca.

¹⁴ Jesús, Diosta mañana huasipi chai runahuan tupashpaca: —Uyai, ña alliyashcanguimi. Ama ashtahuan juchallinguichu. Pacta ashtahuan llaquita apanguiman— nirca.

¹⁵ Chai alliyashca runa rishpa, mandac israelcunaman huillashpaca: “Jesusmi alliyachirca” nishpami huillarca.

¹⁶ Samana punzhapi alliyachishcamantami mandac israelcunaca Jesusta piñai callarirca.

¹⁷ Ashtahuanpish Jesusca: —Ñuca Taitaca cunancamanmi caicunataca ruhuacun. Ñucapish caicunata ruhuacunimi— nirca.

¹⁸ Chaimantami mandac israelcunaca Jesusta huañuchinata munarca. Mana samana punzhapi alliyachishcallamantachu piñai callarircacuna, ashtahuanpish “ñuca Taitaca Diosmi” nishpa Dios tucushcamantami ashtahuan piñashpa, huañuchisha nicurca.

Dios Jesusman tucui poderta cushcamanta

¹⁹ Chaimantami Jesusca: —Ñucaca Diospac Churi cashpapish, mana quiquin munaimanta ruhuanichu, ashtahuanpish ñuca Taita munashcallatami ruhuani. Imatami ñuca Taita ruhuan, chaitami ñucapish ruhuani. Chaica chashnatacmi can.

²⁰ Ñuca Taitaca ñucata cuyashcamantami, tucui pai ruhuacushcata ricuchin. Ashtahuan caicunamanta yalli ruhuashcacunatami ricuchinga. Chaita ricushpaca, mancharishpami saquiringuichic.

²¹ Ima shinami ñuca Taitaca huañushcacunata causachishpa, causaita cun, chashnallatacmi paipac Churi ñucapish maijanman causaita cusha nishpaca cuni.

²² Ñuca Taitaca pitapish mana taripangachu, ashtahuanpish ñucatami taripachun churarca.

²³ Chaica, maijanpish Taitata alli nic shinallatac Churita alli nichunmi chashnaca churarca. Maijanpish Churita mana alli nicca, ñucata cachac Taitami mana alli nin.

²⁴ Maijanpish ñuca nishcata uyashpa, ñucata cachac Taitata cricca, huiñai causaita charinmi. Paica huañushcamanta causaiman pasashcamantami, llaquimanca mana ringa. Chaica chashnatacmi can.

²⁵ Huañushcacuna Diospac Churi rimashcata uyana pachaca chayamucunmi. Chaita, cunanllatacmi. Chaita uyaccunaca causaita charingami. Chaica chashnatacmi can.

²⁶ Ima shinami ñuca Taitaca quiquinllatac causaita charin, chai shinallatac ñucapish causaita cuchunmi cacharca.

²⁷ Runa Tucungapac shamushca ñuca paipac Churi cashcamantami, taripachun ñucaman poderta curca.

²⁸ Tucui huañushcacuna ñuca rimashcata uyana pachami chayamucunmi. Chaimanta ama cai nishcata uyashcallamanta mancharichicchu.

²⁹ Allita ruhuaccunaca causaita japingapacmi causaringacuna, ashtahuanpish mana allita ruhuaccunaca Dios juchanchishca cangapacmi causaringacuna.

Jesús pi cashcata huillaccunamanta

³⁰ Ñuca munaimantaca imata mana ruhuai pudinichu. Ñucata cachac Taita nishcata uyashpami taripani. Mana ñuca quiquin munaimanta, ashtahuanpish ñuca Taita munaimantami juchanchini. Chaimantami cashcata ruhuashpa juchanchini.

³¹ Ñuca quiquinllamanta huillacucpica, ñuca huillashcaca yangallami canman.

³² Ashtahuanpish ñucamanta huillacca, shucmi. Chai huillacca ñuca ima shina cashcatami huillan.

³³ Cancuna Juanman tapuchun cachacpica, paica mana llullashpami huillarca.

³⁴ Mana gentecuna huillashcatachu huillani, ashtahuanpish cancuna quishpirichunmi, pai huillashcata huillani.

³⁵ Juan huillashcaca luz achicyachicuc shinami carca. Cancunaca ashacamanllami achicpi canata munarcanguichic.

³⁶ Ñuca ruhuashcaca Juan huillashcamanta yallimi ñucamanta huillacun. Ñuca Taita ruhuachun nishcacunallatami ruhuacuni. Chai ruhuashcacunami ñuca Taita pi cashcatapish, ñuca pi cashcatapish ricuchin.

³⁷ Ñucata cachac Taitapish ñucamantami huillan. Shina cacpipish, cancunaca jaicapi paitaca mana ricushcanguichicchu, pai rimashcatapish mana uyashcanguichicchu.

³⁸ Dios ñucata cachashcatapish mana cringuichicchu, pai huillashcatapish cancunapac shungupica mana charinguichicchu.

³⁹ Huiñai causaita japisha nishpami, Dios quillcachishcataca allita ricushpa yachacunguichic. Chai quillcashcacunami ñucamanta huillan.

⁴⁰ Cancunaca huiñai causaita charingapac mana ñucapacman shamushun ninguichicchu.

⁴¹ Gentecunalla ñucata alli nichunca mana munanichu.

⁴² Ñucaca cancuna Diosta mana cuyac cashcatami yachani.

⁴³ Ñuca Taitapac shutipi shamucpipish chasquinguichicchu, ashtahuanpish maijan pai quiquinllamanta shamucpica chasquinguichicmanmi.

⁴⁴ Cancunaca, cancunapura alli ninacunallatami munanguichic, ashtahuanpish shuclla Diospac alli nishca canataca mana munanguichicchu. Shina cashpaca, ¿ima shinatac ñucataca cringuichicyari?

⁴⁵ Ñuca Taitapac ñaupapi, ñuca juchanchina cashcataca ama yuyanguichicchu. Ashtahuanpish cancuna shunguta churashpa, shuyacushca Moisesmi juchanchinga.

⁴⁶ Moisés nishcata crishpaca, ñucatapish cringuichicmanmi. Moisesca ñucamantami quillcarca.

⁴⁷ Pai quillcashcata mana crishpaca, ¿ima shinatac ñuca nishcataca cringuichicyari?— nirca.