SAN JUAN 4 - Dios Rimashcata Quillcashcami

Jesús Samaria llacta huarmihuan parlashcamanta

¹ Fariseocunaca: «Jesusca Juanta atishpami tauca caticcunata charin, shinallatac bautizacun» nishpami puricurca.

² (Jesusca mana bautizacchu carca, ashtahuanpish paipac yachacuccunami bautizac carca).

³ Fariseocuna chashna nicucta yachashpami, Jesusca Judea llactamantaca Galilea llactaman cutishpa rirca.

⁴ Chaiman rishpaca, Samaria llactatami pasana carca.

⁵ Chashna ricushpami, Samaria llacta Sicar puebloman chayarca. Chai puebloca Jacobo paipac churi Joseman cushca allpa ladopimi carca.

⁶ Chaipimi Jacobopac yacu junduca tiyarca. Chaupi punzha shina cacpimi, Jesusca shaicushpa, yacu jundu cuchupi tiyarirca.

⁷ Chaimanmi Samaria llactamanta huarmi yacuta apangapac chayarca. Chaipimi Jesusca: —Ashalla yacuta carai— nirca.

⁸ Chai horasca paipac yachacuccunaca micunata randingapacmi puebloman rishca carca.

⁹ Samaria huarmica Jesustaca: —¿Ima shinatac canca israelcunapura cashca jahua ñucaman yacuta mañangui? Ñucaca Samaria huarmimi cani— nirca. (Israelcunaca Samaria llactapi causaccunahuanca mana apanacucchu carca).

¹⁰ Shina nicpimi Jesusca: —Canca Dios imata cusha nicushcatapish, pi yacuta mañacuctapish mana yachanguichu. Yachashpaca, canracmi: “Yacuta carai” ninguiman. Chashna mañacpica, causaita cuc yacutami cuiman— nirca.

¹¹ Shina nicpimi, chai huarmica: —Amito, yacu jundupish ucumi. Imahuan llucchinatapish mana charinguichu. ¿Ima shinatac causaita cuc yacutaca cunguiyari?

¹² Cai yacu jundutaca ñucanchic taita Jacobomi saquirca. Caimantami paipish, paipac huahuacunapish, paipac animalcunapish ubiac carca. ¿Canca taita Jacobota yallichu cangui?— nirca.

¹³ Shina nicpimi Jesusca: —Maijanpish cai jundumanta yacuta ubiacca, cutin yacunayachingami.

¹⁴ Ashtahuanpish maijanpish ñuca cushca yacuta ubiacca, jaicapi mana yacunayachingachu. Ñuca cushca yacuca paipica huiñai causaita cuc, tucyacuc yacu shinami canga— nirca.

¹⁵ Shina nicpimi, chai huarmica: —Amito, ama cutin cai jundumanta yacuta apac shamungapac, ama cutin yacunayachingapac chai yacuta cuiyari— nirca.

¹⁶ Shina nicpimi Jesusca: —Ri, cambac cusata cayamugri— nirca.

¹⁷ Shina nicpimi, chai huarmica: —Ñucaca mana cusayucchu cani— nirca. Shina nicpimi Jesusca: —Can: “Mana cusayucchu cani” nishpaca, allitami nishcangui.

¹⁸ Canca pichca cusatami charircangui. Cunan canhuan causacucca mana cambac cusachu. Shina nishpaca, mana llullashcanguichu— nirca.

¹⁹ Shina nicpimi, chai huarmica: —Amito, canca Dios ima nishcata huillacmi yuyachingui.

²⁰ Ñucanchic ñaupa taitacunaca cai urcupimi Diosta mañac carca. Cutin cancunaca “Jerusalenpimi Diosta mañana canchic” ninguichicmi— nirca.

²¹ Jesusca chai huarmitaca: —Mana cai urcullapi, mana Jerusalenllapi Diosta mañana punzhacuna chayamucunmi. Chaitaca crinami cangui.

²² Cancunaca pita mañacushcata mana yachanguichicchu. Ñucanchicca pita mañacushcataca yachanchicmi. Diosca israelcunapuramantami Quishpichicta cachasha nishca.

²³ Diosta ima shina mañana cashca shina mañana punzhacuna chayamucunmi, cunanllatacmi chai punzhaca. Diospac Espíritu yuyaita cucpimi, Dios ima shina cashcata yachashpa mañanga. Chashna mañaccunatami Diosca munan.

²⁴ Diosca Espiritumi. Chaimantami paita mañacca Diospac Espíritu yuyaita cucpi, ima shina mañana cashca shina mañancuna— nirca.

²⁵ Shina nicpimi, chai huarmica: —Cristo nishca Mesías shamuna cashcataca yachanimi. Pai shamushpami, tucuita alli huillanga— nirca.

²⁶ Shina nicpimi Jesusca: —Chaica, canhuan parlacucllatacmi cani— nirca.

²⁷ Shina ratomi paipac yachacuccunaca shamurca. Jesús chai huarmihuan parlacucta ricushpami mancharirca. Chashna cacpipish pi: «¿Imatatac tapucungui? ¿Imatatac chai huarmihuanca parlacungui?» nishpaca, mana tapurcachu.

²⁸ Chai huarmi puñuta chaipi saquishpa, puebloman cutishpa, chaipi causaccunataca:

²⁹ —Shamuichic, shuc runata ricunguichic. Paica tucui ñuca imata ruhuashpa causacushcatami huillan. ¿Manachu paica Cristo canga?— nirca.

³⁰ Chaimantami gentecunaca chai pueblomantaca Jesus-huan tupangapac shamurca.

³¹ Chai gentecuna manarac chayamucpimi, Jesuspac yachacuccunaca: —Yachachic, micuiyari— nirca.

³² Shina nicpimi Jesusca: —Ñucaca cancuna mana ricsishca micunatami charini— nirca.

³³ Shina nicpimi yachacuccunaca: —¿Pishi micunata carashca canga?— ninacurca.

³⁴ Shina nicpimi Jesusca: —Ñuca micunaca, ñucata cachac Diospac munaita ruhuanami, pai imata ruhuachun nishcata tucuchinami.

³⁵ ¿Manachu cancunaca: “Chuscu quillami cosechangapacca faltan” nicunguichic? Ashtahuanpish ñucaca: Chagrata alli ricushpaca, cosechanalla cashcata ricuichic, ninimi.

³⁶ Granota tandacca, pagota charinmi. Chai tandashca granoca huiñai causaipacmi. Chaimantami granota tandacca tarpuc-huan cushicunga.

³⁷ Gentecuna nishca shinaca shucca tarpun, shucca cosechanmi. Chaica chashnatacmi.

³⁸ Ñucaca, mana cancuna trabajashca chagrata cosechachunmi cachani. Shuccunami llaquita apashpa trabajarca. Shina cacpipish, cancunami chai trabajashcamantaca japinguichic— nirca.

³⁹ Chai huarmi: «Ñuca imata ruhuashpa causacushcatami huillan» nishcata uyashpami, Samaria llacta pueblopi causaccunaca Jesusta crircacuna.

⁴⁰ Chaimantami gentecuna Jesuspacman shamushpa chaipi saquirichun mañarca. Shina mañacpimi, Jesusca ishcai punzhata chaipi saquirirca.

⁴¹ Jesús ima nishcata uyashpacarin, achca gentecunami crirca.

⁴² Chaimantami chai huarmitaca: —Cunancarin mana can huillashcallamantachu crinchic, ashtahuanpish ñucanchicllatacmi pai ima nishcataca uyashcanchic. Chaimantami cai pachapi causaccunata quishpichingapac shamushcata yachanchic— nirca.

Jesús mandacpac churita alliyachishcamanta

⁴³ Jesús Samaria llactapi ishcai punzhata cashpaca, Galilea llactamanmi rirca.

⁴⁴ Chaica, Jesusllatacmi: “Dios ima nishcata huillactaca quiquin llactaca mana alli chasquishcachu canga” nishpa huillarca.

⁴⁵ Galilea llactapi causaccunapish Pascua fiesta punzhapi Jerusalenman rishpa, tucui imallata ruhuashcata ricurca. Chaimantami, paicunapac llactaman Jesús chayacpica, cushicushpa chasquirca.

⁴⁶ Jesusca Galilea llacta Caná pueblomanmi cutirca. Chai pueblopimi yacumanta vinota ruhuashca carca. Chaipimi jatun mandac churashca mandacpish causarca. Chai mandacpac churimi Capernaúm pueblopi ungushca carca.

⁴⁷ Chai mandacca Jesús Judea llactamanta Galilea llactaman shamushcata yachashpami, ungushpa huañugricuc paipac churita alliyachic shamuchun mañarca.

⁴⁸ Chashna mañacpimi Jesusca: —Milagrocunata ruhuacta manarac ricushpaca, ñucata mana cringuichicchu— nirca.

⁴⁹ Shina nicpimi, chai mandacca: —Amito, utca jacu. Ñuca churi atishpa huañungami— nirca.

⁵⁰ Shina nicpimi Jesusca: —Cutilla, cambac churica ñami alli— nirca. Chai mandacca Jesús nishcata crishpami huasiman cutirca.

⁵¹ Pai huasiman cuticucpi, paipac serviccuna tupangapac llucshishpaca: —Cambac churica ñami alli tucun— nirca.

⁵² Chashna huillacpimi, mandacca ima horas alli tucushcata tapurca. Chashna tapucpi paicunaca: —Caina chaupi punzha shinatami fiebreca pitirirca— nirca.

⁵³ Chaimantami ungushca huahuapac taitaca, chai horasllapitac Jesús: «Cambac churica ñami alli» nishcata yuyarirca. Chaimantami paipish, paipac tucui huasi ucupuracunapish Jesusta crirca.

⁵⁴ Chai ishcai milagrotami Jesusca Judea llactamanta Galilea llactaman shamushca quipa ruhuarca.