SAN JUAN 3 - Dios Rimashcata Quillcashcami

Nicodemo Jesus-huan parlashcamanta

¹ Fariseocunapuramanta Nicodemo shuti runami tiyarca. Paica israelcunapurapica mandacmi carca.

² Pai Jesuspacman tuta rishpaca: —Yachachic, canca Dios cachashca yachanchicmi. Pipish can ruhuacuc shina, milagrocunataca mana Dios-huan cashpaca, mana ruhuanmanchu— nirca.

³ Shina nicpimi Jesusca: —Maijanpish mana cutin huacharicca, Dios mandacuctaca mana ricungachu. Chaica chashnatacmi canga— nirca.

⁴ Shina nicpimi Nicodemoca: —¿Ima shinatac runaca cutin huacharingayari? ¿Maitatac cutin mamapac huicsapi yaicushpa huacharingayari?— nirca.

⁵ Shina nicpimi Jesusca: —Maijanpish yacumanta, Diospac Espiritumanta mana huacharicca, Dios mandacucmanca manatac yaicungachu. Chaica chashnatacmi canga.

⁶ Aichamanta huacharicca, aichami can. Ashtahuanpish Espiritumanta huacharicca, Espiritumi can.

⁷ Ama ñuca: “Cutin huacharinami can” nishcamanta mancharichu.

⁸ Huairaca maimanta cashpapish pucunllami. Shina pucucpi uyashpapish, maimanta shamuctapish, maiman rictapish mana yachanguichu. Shinallatacmi Diospac Espiritumanta huachariccunaca— nirca.

⁹ Shina nicpimi Nicodemoca: —¿Ima shinatac chashnaca tucunyari?— nirca.

¹⁰ Shina nicpimi Jesusca: —Canca israelcunata yachachicmi cangui. ¿Chashna cashca jahuachu caita mana yachangui?

¹¹ Ñucanchicca imatapish yachashcatami ninchic, imata ricushcatami huillanchic. Ñucanchic huillashcataca mana cringuichicchu. Chaica chashnatacmi can.

¹² Cai pachapi ima tiyashcamanta huillacpi mana crishpaca, ¿ima shinatac jahua pachamanta huillacpica cringuichicyari?

¹³ Jahua pachamanca pi mana rishcachu, ashtahuanpish Runa Tucungapac shamushca ñucallami jahua pachamanta shamurcani. Ñucami jahua pachapi causacca cani.

¹⁴ Ima shinami Moisés shitashca pambapi broncemanta ruhuashca culebrata caspipi huarcushpa ricuchirca, shinallatacmi Runa Tucungapac shamushca ñucapish, caspipi huarcushca cana cani.

¹⁵ Chaica, maijanpish ñucata cricca huiñai causaita charichunmi, chashnaca cana cani.

Dios cai pachapi causaccunata cuyashcamanta

¹⁶ Diosca cai pachapi causaccunata yallita cuyashpami, paipac shuclla Churita cai pachaman cacharca. Pipish paita cricca ama chingarichun, ashtahuanpish huiñai causaita charichunmi, chashnaca cacharca.

¹⁷ Diosca mana cai pachapi causaccunata llaquiman cachachunchu paipac churitaca cacharcachu, ashtahuanpish cai pachapi causaccunata quishpichichunmi cacharca.

¹⁸ Maijanpish Diospac Churita cricca mana llaqui pachaman ringachu, ashtahuanpish paipac shuclla Churita mana cricmi, pai mana crishcamanta llaqui pachaman ringa.

¹⁹ Paicunapac mana alli ruhuacushcacuna ama ricurichunmi Achicyachic shamucpica, mana munashpa amsapi causanallata ashtahuan munarca. Chaimantami juchanchishca canga.

²⁰ Tucui mana allita ruhuaccunaca, paicunapac mana allita ruhuashcacuna ama achicman ricurichunmi, Achicyachictaca piñancuna.

²¹ Cashcata ruhuashpa causaccunaca, Diosllatac ruhuachicushcata yachachunmi, achicman cuchuyancunalla— nirca.

Bautizac Juan huillashcamanta

²² Chai quipami, Jesusca paipac yachacuccunahuan Judea llactaman rirca. Tauca punzhacunata paicunahuan cashpami, gentecunata bautizarca.

²³ Juanpish chai punzhacunallapitacmi, Salim llacta cuchulla Enón llactapi, chaipi achca yacu tiyashcamanta bautizacurca. Chaipimi paipacman shamuc gentecunata bautizacurca.

²⁴ Juantaca manarac carcelpi churarcachu.

²⁵ Chaipimi Juanpac maijan caticcunahuan, maijancunaca, Israel shuc runahuan chuyayanamanta rimanacurca.

²⁶ Chaimanta Juanpacman rishpaca: —Yachachic, Jordán yacu chimbapi canhuan tupanacuc, chai can parlacuc runami bautizacun. Achca gentecunami paipacmanca shamucun— nirca.

²⁷ Chaimantami Juanca: —Dios mana cucpica, pipish imata mana chasqui pudinchu.

²⁸ Ñuca: “Ñucaca mana Cristochu cani, ashtahuanpish paipac ñaupata cachashcallami cani” nishpa huillashcata, cancunallatacmi uyarcanguichic.

²⁹ Shuc bodapica, noviaca noviopacmi. Noviopac ricsishcaca, novio rimashcata uyashpaca cushicunmi. Shinallatacmi ñucapish Novio rimashcata uyashpaca, yallita cushicuni.

³⁰ Paica punzhantami ashtahuan alli nishca cana can. Ashtahuanpish ñucaca punzhantami yangalla nishca cana cani— nirca.

Jahua pachamanta shamucca ima shina cashcamanta

³¹ Jahua pachamanta shamucmi tucuita yallica. Cai pachamanta cacca cai pachapi causaccuna shinallami. Chaimantami cai pachallamanta riman. Ashtahuanpish jahua pachamanta shamucmi tucuita yallica.

³² Paica imatapish ricushcacunallata, imatapish uyashcacunallatami huillan. Shina cacpipish, pai huillashcataca pi mana crinchu.

³³ Maijanllapish pai huillashcata chasquicca, Diosca cashcata nic cashcatami ricuchin.

³⁴ Dios cachashcami, Dios rimashcata riman. Diosca yallitami paipac Espirituta cushca.

³⁵ Diosca paipac Churita yallitami cuyan. Chaimantami tucuita pai mandachun cushca.

³⁶ Maijanpish paita cricca huiñai causaitami charin. Maijanpish paita mana cricca mana huiñai causaita charinchu, ashtahuanpish paitaca Diosca piñacungallami.