SAN JUAN 21 - Dios Rimashcata Quillcashcami

Paipac yachacuccunaman Jesús cutin ricurishcamanta

¹ Chai quipaca, cutinllatacmi Tiberias jatun cucha patapi paipac yachacuccunaman Jesusca cai shina ricurirca:

² Chaipica Simón Pedropish, ishcaipura huacharishca Tomaspish, Galileapi tiyac Caná pueblomanta Natanaelpish, Zebedeopac churicunapish, shinallatac Jesuspac yachacuccunapuramanta caishuc ishcai yachacuccunapishmi carca.

³ Chaipi cashpami Pedroca: —Ñucaca challuatami japigrini— nirca. Chashna nicpi, caishuc yachacuccunaca: —Ñucanchicpish canhuan challuata japingapac rishun— nirca. Chashna ninacushpami, canoapi huichicushpa rirca. Shina rishpapish, chai tutaca ima challuata mana japircacunachu.

⁴ Chai tuta ña achicyamucucpimi, Jesusca yacu patapi ricurirca. Shina ricuricpipish, yachacuccunaca Jesús cashcataca mana yacharcacunachu.

⁵ Chashna cacpimi Jesusca: —Huahuacuna, ¿manachu ima challuata japishcanguichic?— nishpa tapurca. Chashna tapucpi paicunaca: —Imata mana japinchicchu— nirca.

⁶ Chashna nicpimi Jesusca: —Canoamanta alli ladoman linchita shitaichic. Chaipica challuacunata japinguichicmi— nirca. Chashna nicpica, pai nishca shinallatacmi linchita yacupi shitarcacuna. Chashna shitashpaca, challuacuna yallimana linchipi junda cacpimi, linchita mana llucchi pudircacuna.

⁷ Chashna tucucpimi, Jesuspac mai cuyashca yachacucca Pedrotaca: —Paica Apunchic Jesusmi— nirca. Pedroca “Apunchic Jesusmi” nicta uyashcahuanmi, churanata churarishpa yacuman shitarirca. Challuata japicushcamantami Pedroca lluchulla carca.

⁸ Caishuc yachacuccunaca challua junda linchitaca aisashpallami, canoahuanca yacu pataman cuchuyamurca. Paicunaca yacu patamanta patsac metro shinallapimi carca.

⁹ Paicuna canoamanta uricushpaca, nina brazas jahuapi challua cusaricuctapish, tanda chaipi tiyacuctapish ricurcacunami.

¹⁰ Chaipimi Jesusca: —Ñaca japishca maijan challuacunata apamuichic— nirca.

¹¹ Chashna nicpimi, Simón Pedroca canoaman huichicushpa, jatun challuacuna junda linchita japishpa, aisashpalla yacu pataman cuchuyachirca. Challuacunaca patsac pichca chunga quimsami carca. Chashna cai tucui challuacunahuan cashpapish, linchica mana lliquirircachu.

¹² Chaipimi Jesusca: —Shamuichic, micunguichic— nirca. Yachacuccunaca Apunchic Jesús cashcata yachashpami maijanllapish: “¿Canca pitac canguiyari?” nishpaca, mana tapusha nircacuna.

¹³ Chai quipaca cuchuyashpa tandata japishpami, Jesusca paicunaman curca. Challuacunatapish shinallatacmi curca.

¹⁴ Jesús chaipi ricurishcahuanca, quimsa cutinmi yachacuccunamanca huañushcacunapuramanta causarishca quipaca ricurirca.

Simón Pedrohuan Jesús parlashcamanta

¹⁵ Micushca quipami, Jesusca Simón Pedroman tapushpaca: —Juanpac churi Simón, ¿caishuccunata atishpachu ñucata cuyangui?— nishpa tapurca. Chashna tapucpi Pedroca: —Ari, Apunchic Jesús, canta cuyac cashcataca canllatac yachanguimi— nirca. Chashna nicpimi Jesusca: —Shinashpaca ñuca pactalla ovejacunata cuidangui— nirca.

¹⁶ Chashna nicpipish, cutinllatacmi Jesusca: —Juanpac churi Simón, ¿ñucataca cuyanguitacchu?— nishpa tapurca. Chashna tapucpi Pedroca: —Ari, Apunchic Jesús, canta cuyac cashcataca canllatac yachanguimi— nirca. Shina nicpimi Jesusca: —Shinashpaca, ñuca ovejacunata cuidangui— nirca.

¹⁷ Ña quimsa cutinhuan Jesús tapushpaca: —Juanpac churi Simón, ¿ñucataca cuyanguitacchu?— nirca. Ña chaihuanca quimsa cutin tapushcamantami, Pedroca llaquilla tucushpaca: —Apunchic Jesús, canllatacmi tucuita yachangui. Shina cashpaca, canllatac ñuca canta cuyac cashcataca yachanguimi— nirca. Shina nicpimi Jesusca: —Shinashpaca, ñuca ovejacunata cuidangui.

¹⁸ Huambrarac cashpaca, canllatacmi chumbillirishpa maiman risha nishpapish ric carcangui. Shina cacpipish yuyac cacpica, rigrata chutacpimi, cantaca shuc chumbillichinga, shinallatac can mana risha nishcamanmi pushanga. Chaica chashnatacmi canga— nirca.

¹⁹ Jesús chashna nishpaca, Pedro ima shina huañunamanta, shinallatac huañushpa Dios jatun cashcata ricuchinamantami entendichicurca. Chai quipaca: —Ñucata catilla— nircami.

Jesuspac cuyashca yachacucmanta

²⁰ Pedro huashata tigrarishpa ricushpami, Jesuspac cuyashca yachacuc caticushcata ricurca. Chai yachacucllatacmi Jesús Pascuata yuyarishpa micucucpica, paipac ladopi quimirishpa tiyacushca carca. Shinallatac paillatatacmi: “Apunchic Jesús, ¿pitac chai canta japichicca?” nishpa tapushca carca.

²¹ Chaita Pedro ricushpami: —Apunchic Jesús, ¿paica imatac tucugrin?— nishpa tapurca.

²² Chashna tapucpi Jesusca: —Ñuca cutimungacaman paita causacuchunlla nicpipish, ¿canmanca imatac curinyari? Ashtahuanpish canca ñucata catilla— nirca.

²³ Chaimantami Jesusta caticcunapurapica: “Chai yachacucca jaicapi mana huañungachu” nishpa parlanacui tiyarca. Jesusca mana chai yachacuc huañunamantachu nicurca, ashtahuanpish: “Ñuca cutimungacaman paita causacuchunlla nicpipish, ¿canmanca imatac curinyari?” nishcami carca.

²⁴ Chai yachacucllatacmi caicunamanta huillacpish, caicunata quillcacpish can. Shinallatac pai huillashcaca mana llulla cashcatapish yachanchicmi.

²⁵ Jesusca mana caicunallatachu ruhuarca, ashtahuanpish shuctac taucacunatami ruhuarca. Chashna tucui chaicunata shucllancaman shucllancaman quillcacpica, cai pachapi maipi librota churanallapish mana pactanmanchu.