SAN JUAN 18 - Dios Rimashcata Quillcashcami

Jesusta prezu japishcamanta

¹ Jesusca chashna nishca quipaca, paipac yachacuccunahuanmi Cedrón yacu chimbaman rirca. Chaipimi shuc huerta tiyarca. Chaimanmi Jesusca paipac yachacuccunahuan yaicurca.

² Jesusca tauca cutinmi paipac yachacuccunahuan chaipi tandanacuc carca. Chaimantami, japichic Judaspish chai huertata ricsirca.

³ Chaimanmi Judasca achca soldadocunahuan, curacunata mandac curacunahuan, fariseocuna cachashca Diosta mañana huasita cuidaccunahuan chayarca. Paicunaca macanacunahuan, lamparacunahuan, linternacunahuanmi chayarca.

⁴ Jesusca, pai ima tucunata ña yachashpami paicunataca: —¿Pitatac mashcacunguichic?— nirca.

⁵ Shina nicpimi paicunaca: —Nazaret pueblomanta Jesusta— nirca. Shina nicpimi Jesusca: —Ñucami cani— nirca. Jesusta japichic Judaspish chaipimi paicunahuan carca.

⁶ Jesús: “Ñucami cani” nicpica, huashaman cutirishpami, azhacman urmarcacuna.

⁷ Jesús cutinllatac tapushpaca: —¿Pitatac mashcacunguichic?— nirca. Shina nicpimi, paicunaca: —Nazaret pueblomanta Jesusta— nirca.

⁸ Chaimantami Jesusca: —Ña: “Ñucami cani” nircanica. Ñucata mashcacushpaca, cai ñucata caticcuna richun saquichic— nirca.

⁹ Jesusca utcaman: “Taitalla, can cushcacunataca shucllapish mana chingarircachu” nishca pactachunmi, chashnaca nirca.

¹⁰ Chaimantami Simón Pedroca paipac espadata llucchishpa, jatun mandac curata servic Malco runapac alli lado ringrita huactashpa pitirca.

¹¹ Chaimantami Jesusca Pedrotaca: —Espadata maipi charicushcallapitac huacaichi. Ñuca Taita cushca cai jayac ubiana shina llaquitaca ¿manachu apana cani?— nirca.

Mandac Anaspac ñaupaman Jesusta apashcamanta

¹² Shinami soldadocunapish, soldadocunata mandacpish, Diosta mañana huasita cuidaccunapish Jesusta japishpa huatashpa,

¹³ puntaca Anaspacman aparcacuna. Anasca Caifaspac suegromi carca. Caifasca chai huatapica, curacunata jatun mandac curami carca.

¹⁴ Utcamanmi Caifasca mandac israelcunataca: “Tucui israelcuna chingarinapac randica, shuc runallami huañuna alli canga” nishpa, yuyaita cushca carca.

Anaspac huasi canzhapi Pedroca cashcamanta

¹⁵ Simón Pedropish, caishuc yachacucpishmi Jesustaca catishpa rirca. Chai yachacucca, curacunata jatun mandac curapac ricsishca cashpami, Jesus-huan jatun mandac curapac huasi ucuman yaicurca.

¹⁶ Ashtahuanpish Pedroca canzhallapimi saquirirca. Chaimantami jatun mandac curapac ricsishca yachacucca canzhaman llucshishpa, huasita cuidac huarmihuan parlashpa Pedrotaca ucuman yaicuchirca.

¹⁷ Chashna yaicucpimi, chai huasita cuidac huarmica Pedrotaca: —¿Manachu canpish chai runapac yachacuc cangui?— nirca. Shina nicpica Pedroca: —¡Mana chaichu cani!— nirca.

¹⁸ Yalli chiri cashcamantami Diosta mañana huasita cuidaccunapish, serviccunapish ninata japichishpa masharicurca. Pedropish chaillapitacmi paicunahuan masharicurca.

Anás Jesusta tapushcamanta

¹⁹ Curacunata mandac Anasmi paipac yachacuccunamanta, paipac yachachishcamanta Jesusta tapurca.

²⁰ Chashna tapucpimi Jesusca: —Ñucaca tandanacuna huasicunapipish, Diosta mañana huasipipish tucuipac ñaupapimi yachachircani. Mana pacalla yachachishcanichu.

²¹ ¿Imamantatac ñucata tapungui? Ñuca nishcata uyaccunaman tapui. Paicunami imata nishcataca yachancuna— nirca.

²² Jesús chashna nicpica, Diosta mañana huasita cuidac shuc runami: —¿Chashnachu mandac curata ningui?— nishpa, ñahuipi huactarca.

²³ Chashna huactacpimi Jesusca: —Mana alli rimashca cacpica, ima mana allita rimashcata ni. Ashtahuanpish allita nishca cacpica, ¿imamantatac huactangui?— nirca.

²⁴ Anasca curacunata jatun mandac Caifaspacmanmi Jesusta huatashpa cacharca.

Pedro Jesusta negashcamanta

²⁵ Pedroca ninapi masharishpami shayacurca. Chaipimi paihuan caccunaca: —¿Manachu canpish chai runapac yachacuc cangui?— nirca. Chashna nicpi, Pedro negashpaca: —¡Ñucaca mana chaichu cani!— nirca.

²⁶ Cutinllatacmi curacunata jatun mandacpac servicca: —¿Manachu cantapish Jesus-huan ricurcani?— nirca. Paica Pedro ringrita pitishca runapac aillumi carca.

²⁷ Cutinllatacmi Pedro negarca. Chai ratomi galloca cantarca.

Mandac Pilatopacman Jesusta apashcamanta

²⁸ Curacunata mandac Caifaspac huasimantaca, Roma llactata mandashpa tiyana huasimanmi Jesusta aparcacuna. Ña tutamantami carca. Chaimantami Pascua micuita micungapacca ama mapayashun nishpa, israelcunaca jatun mandacpac ucuman mana yaicurca.

²⁹ Chaimantami mandac Pilato llucshishpaca: —¿Cai runataca imamantatac juchanchishpa apamunguichicyari?— nirca.

³⁰ Shina nicpimi paicunaca: —Cai runa ima millaita mana ruhuashca cacpica, manachari apamunchic carca— nirca.

³¹ Chaimanta Pilatoca: —Cancunapac mandashcapi nishca shina, taripashpa llaquichingapac apaichic— nirca. Shina nicpimi, mandac israelcunaca: —Ñucanchicca mana pita huañuchinallachu canchic— nirca.

³² Chashnami, Jesús pai ima shina huañunata huillashcaca pactarca.

³³ Pilato pai mandashpa tiyana ucuman cutin yaicushpa, Jesusta cayashpaca: —¿Canchu israelcunata Jatun Mandac cangui?— nirca.

³⁴ Chashna nicpimi Jesusca: —¿Cambac yuyaimantachu chashna ningui? Mana cashpaca, ¿maijanchu chashnaca huillarca?— nirca.

³⁵ Shina nicpimi Pilatoca: —¿Ñucaca Israel runachu cani? Cambac llacta gentecunallatacmi curacunata mandac curacunahuan ñucapacman apamurca. ¿Imatatac ruhuarcanguiyari?— nirca.

³⁶ Shina nicpimi Jesusca: —Ñuca mandanaca mana cai pachapichu. Cai pachapi mandana cacpica, ñucata caticcuna macanacushpa, israelcuna japichun mana saquinmanchu. Ñuca mandanaca mana caipichu— nirca.

³⁷ Chaimantami Pilatoca: —Shinashpaca, ¿canca jatun mandacchu cangui?— nirca. Shina nicpimi Jesusca: —Ari, can nishca shinallatacmi cani. Ñucaca cashcata huillangapacmi cai pachapi huacharingapac shamurcani. Cashcata rimashcata cazuccunallami, ñuca rimashcata uyancuna— nirca.

³⁸ Chaimantami Pilatoca: —¿Imatac chai cashcata ninaca?— nirca. Shina nishpami, Pilatoca cutin llucshishpa israelcunataca: —Ñucaca ima mana allita mana cai runapi tarinichu.

Jesusta “huañunami cangui” nishcamanta

³⁹ Shina cacpipish, cancunaca Pascua fiestapi shuc prezuta cacharichun ninatami yachanguichic. ¿Manachu israelcunata Jatun Mandacta cacharichun ninguichic?— nirca.

⁴⁰ Shina nicpi, tucui mashna caparishpaca: —¡Paitaca ama cacharichu, Barrabasta cachari!— nircacuna. Barrabasca millai shuhuacmi carca.