SAN JUAN 17 - Dios Rimashcata Quillcashcami

Jesús yachacuccunamanta Diosta mañashcamanta

¹ Chaicunata nishca quipa Jesús jahua pachata huichailla ricushpaca: —Ñuca Taitalla, ñucata japichina pachaca ñami chayamushca. Chaimanta cambac Churi canta jatunyachichun, cambac Churitapish jatunyachiyari.

² Canca ñucaman cushcacunaman huiñai causaita cuchunmi, tucui gentecunata ñuca maquipi churarcangui.

³ Cai huiñai causaitaca, shuclla Dios cashcata crishpa, Jesucristoca Dios cachashca cashcata crishpami chasquinga.

⁴ Ñucaca cai pachapica canta jatunyachishcanimi, shinallatac imata ruhuachun nishcatapish tucuchishcanimi.

⁵ Cunanca ñuca Taitalla, cai pacha manarac tiyacpi, ima shinami cambac ladopi jatunyachishca carcani, Chashnallatac cunanpish jatunyachiyari.

⁶ Cai pacha gentecunamanta can acllashpa, ñucaman cushcacunamanca, ñami can pi cashcataca huillashcani. Cambacmi carcacuna, canmi ñucaman curcangui. Paicunaca can rimashcacunata cazushcacunami.

⁷ Cunanca tucui ñucaman cushcacunaca, canmanta shamushca cashcatami yachancuna.

⁸ Can huillachun nishcata huillarcani. Paicuna chasquishpami, ñucataca Dios cachashcata yachac chayashpa crincuna.

⁹ Ñucaca paicunamantami mañani. Mana cai pachapac caccunamanta mañanichu, ashtahuanpish ñucaman cushcacunaca cambac cashcamantami paicunamanta mañani.

¹⁰ Tucui cambac cashcacunaca ñucapacmi, ñucapac cashcacunaca cambacmi. Paicunamantami jatunyachishca cani.

¹¹ Ñucaca ña mana cai pachapi cagrinichu, cambacmanmi rigrini. Ñucata caticcunaca cai pachapimi saquirin. Jucha illac Taitalla, ima shinami canhuan shuc shinalla canchic, chai shinallatac paicunapish shuc shinalla cachun, cambac poderhuan cuidaiyari.

¹² Cai pachapi paicunahuan cashpaca, cambac poderhuanmi cuidarcani. Can cushcacunataca tucuitami cuidarcani. Shucllapish mana chingarircachu, ashtahuanpish chingaringapac cashca runallami can quillcachishcapi nishca shina pactachun chingarirca.

¹³ Can maipi cashcamanmi rini. Ñuca shinallatac paicunapish yallita cushicuchunmi, cai pachapi cashparac cashna mañani.

¹⁴ Can rimashcata paicunaman huillashcanimi. Chaimantami cai pachapac caccunaca paicunata piñancuna. Paicunaca ña mana cai pachamantachu, ñucapish mana cai pachamantachu cani.

¹⁵ Mana cai pachamanta paicunata anchuchichunchu mañanichu, ashtahuanpish tucui millaimanta huacaichichunmi mañani.

¹⁶ Paicunaca mana cai pachamantachu, ñucapish manallatac cai pachamantachu cani.

¹⁷ Paicunata cambaclla cachun cambac rimashca shimihuan millaimanta huacaichingui. Canca cashcata nicmi cangui.

¹⁸ Ima shinami cai pacha gentecunapacman cacharcangui, chashnallatacmi paicunatapish cai pacha gentecunapacman cachacuni.

¹⁹ Paicunapish cashcata nic rimashcahuan cambaclla tucuchunmi, ñucapish paicunapac allipac cambaclla tucuni.

²⁰ Mana paicunallamantachu mañani, ashtahuanpish paicunapac huillashcata uyashpa, ñucata criccunamantapishmi mañani.

²¹ Taitalla, ima shinami ñucaca canhuan, canca ñucahuan shuc shinalla canchic, chai shinallatac paicunapish ñucanchic-huan shuc shinalla cachunmi mañani. Cai pachapi causaccuna can ñucata cachashcata crichunmi, chashna mañani.

²² Canca ñucata jatunyachishcanguimi. Ñucanchic ima shinami shuc shinalla canchic, chai shinallatac paicunapish shuc shinalla cachunmi paicunatapish jatunyachini.

²³ Ñucaca paicunahuan, canca ñucahuan cacpimi, paicunaca shuc shinalla canga. Shina cacpimi, cai pachapi causaccunaca can cachashcata, shinallatac ñucata ima shinami cuyangui, chashnallatac paicunatapish cuyac cashcata yachangacuna.

²⁴ Taitalla, cai pacha manarac tiyacpimi, ñucataca cuyashcangui. Chaimantami can cushcacunaca ñuca maipimi cani, paicunapish chaipi cachun munani. Chaipi cashpami ñuca jatunyachishca cashcata ricunga.

²⁵ Cashcata ruhuac Taitalla, cai pachapac causaccuna canta mana ricsicpipish, ñucaca ricsinimi. Can ñucaman cushcacunapish, can ñucata cachashcata yachanmi.

²⁶ Can ñucata cuyac shinallatac paicunapish cuyanacuchun, shinallatac ñucahuan shuc shinalla cachunmi, can rimashcacunataca ricsichini, shinallatac ricsichishpa catishami— nirca.