SAN JUAN 16 - Dios Rimashcata Quillcashcami

¹ Caicunataca ñucata crinata ama saquichunmi huillacuni.

² Tandanacuna huasicunamanta llucchishpa cachangami. Shinallatac cancunata huañuchishpa, Diosmanmi alli ruhuanchic nina punzhami chayamunga.

³ Ñuca Taitatapish, Ñucatapish mana ricsishcamantami chashna ruhuanga.

⁴ Caicunataca chai punzhacuna shamucpi, ñuca utcaman nishcata yuyarichunmi nicuni. Ñuca cancunahuan cashcamantami, caicunataca callaripica mana huillarcani.

Diospac Espíritu imata ruhuac cashcamanta

⁵ Cunanca ñucata cachac Taitapacmanmi rigrini. Shina cacpipish pipish: “¿Maimantac ringuichic?” nishpa mana tapunguichicchu.

⁶ Ashtahuanpish caicunaman chashna huillashcamantami yallita llaquiringuichic.

⁷ Shina cacpipish, cancunapac allipac rinami cani. Chashna ñuca mana ricpica, cancunata Cushichicca mana cancunapacman shamungachu. Ñuca rishpami, paitaca cachasha. Chaica chashnatacmi canga.

⁸ Pai shamushpami, cai pachapi imami jucha cashcatapish, mana jucha cashcatapish, Dios taripana cashcatapish ricuchinga.

⁹ Paimi ñucata mana crishpaca juchayuc cashcata ricuchinga.

¹⁰ Ñuca Taitapacman rishpa, mana ricuricpimi, imami cashcata ruhuanata ricuchinga.

¹¹ Cai pachata mandacta Dios ña juchanchishca cashcamantami, imami taripana cashcataca ricuchinga.

¹² Cancunaman imata ninata chariniracmi. Shina cacpipish, cunanca mana tucui entendinguichicchu.

¹³ Cashcata nic Diospac Espíritu shamushpaca, mana paipac munaillamantachu rimanga, ashtahuanpish imata uyashcallatami huillanga. Chaimantami cashcata ruhuanata yachachinga. Shinallatac tucui imalla tucugricushcatapish yachachinga.

¹⁴ Paica ñucamanta chasquishpami cancunaman yachachinga. Chaimantami ñucata jatunyachinga.

¹⁵ Tucui imapish Taitapac cacca ñucapacmi. Chaimantami “Diospac Espirituca ñucamanta chasquishpa, cancunamanca yachachinga” nircani.

¹⁶ Asha pacha quipaca ñucata mana ricunguichicchu. Shina cacpipish, asha quipami cutin ricunguichic— nirca.

Llaquica cushiman tigrana cashcamanta

¹⁷ Chaimanta maijan Jesuspac yachacuccuna tapunacushpaca: —Pai: “Ñuca Taitapacmanmi rigrini, asha quipaca mana ricunguichicchu, asha quipami cutin ricunguichic” nishpaca, ¿imatatac nisha nin?

¹⁸ Pai: “Asha quipaca” nishpaca, ¿imatatac nisha nin? Chaitaca mana entendinchicchu— ninacurca.

¹⁹ Paicuna tapunata munacucta yachashpami, Jesusca: —Ñuca: “¿Asha quipaca ñucata mana ricunguichicchu, cutin asha quipami ricunguichic” nishcamantachu tapunacucunguichic?

²⁰ Cancuna llaquilla cacpipish, huacailla cacpipish, cai pachapac causaccunaca cushicungami. Shina cacpipish, cancunapac llaquica cushicuimi tucunga.

²¹ Shuc huarmica sajuarina punzha chayacpica, nanaihuanmi llaquirin. Shina cacpipish sajuarishca quipaca, shuc huahua cai pachaman apamushcamantami tucui nanaita cungarishpa cushicun.

²² Shinallatacmi cancunaca llaquiringuichic. Shina cashpapish, ñuca cutimucpica, cancunapac shungupi yallitami cushicunguichic. Chai cushicuitaca pi mana quichungachu.

²³ Chai punzhacunapica ña mana ashtahuan imata tapunguichicchu. Ñuca shutipi ñuca Taitaman mañacpica paica cungami. Chaica chashnatacmi canga.

²⁴ Cunancamanca, ñuca shutipi imata mana mañashcanguichicchu. Cancunapac shungupi yallita cushicui tiyachun mañaichic, chasquinguichicmi.

Jesús mana allicunata mishashcamanta

²⁵ Tucui caicunataca chimbapurashpallami parlarcani. Ña mana ashtahuan chimbapurashpa parlana punzha chayamucpica, ñuca Taita ima shina cashcatatacmi huillasha.

²⁶ Chai punzhacunapica cancunallatacmi ñuca shutipi mañanguichic. Ña mana cancunamanta ñuca Taitata mañashachu,

²⁷ ashtahuanpish ñuca Taitallatacmi cancunataca cuyan. Chaica, ñucata cuyashcamanta, ñuca Diosmanta shamushca cashcata crishcamantami chashna cuyan.

²⁸ Ñuca Taitapacmantami cai pachaman shamurcani. Cunanca cai pachata saquishpami, ñuca Taitapacman cutigrini— nirca.

²⁹ Shina nicpimi yachacuccunaca: —Cunanmi entendinallatac parlacungui, ashtahuanpish ña mana chimbapurashpachu parlacungui.

³⁰ Cunanmi can tucuita yachac cashcata yachanchic. Pipish manarac tapucpimi, canca yachangui. Chaimantami cantaca Diosmanta shamushca cashcata crinchic— nirca.

³¹ Shina nicpimi Jesusca: —¿Cunanca cringuichicchu?

³² Chai punzhaca chayamun, ña caillapimi. Cancunaca ñucallata saquishpa, caita chaita ringuichic. Shina cacpipish, mana ñucallachu cani, ashtahuanpish ñuca Taitaca ñucahuanmi.

³³ Tucui caicunataca ñucahuan yallita cushicuita charichunmi nini. Cai pachapica llaquita apanguichicmi. Shina cacpipish, cai pacha mana allicunata ñuca atishcamanta ñucata crichic— nirca.