SAN JUAN 13 - Dios Rimashcata Quillcashcami

Jesús yachacuccunapac chaquita jahuashcamanta

¹ Pascua fiesta punzhacuna manarac chayacpimi, Jesusca cai pachamanta paipac Taitapacman rina horas chayashcata yacharca. Cai pachapica paita caticcunataca yallitami Jesusca cuyarca. Shinami tucuringacaman cuyarca.

² Jesús manarac paipac yachacuccunahuan micungapac tiyaricpimi, diabloca Simonpac churi Judas Iscariotepac shungupi Jesusta japichina yuyaita churashca carca.

³ Jesusca paiman Dios poderta cushcatapish, Dios cachashca shamushcatapish, paipacman cutina cashcatapish yacharcami.

⁴ Chaimanta jatarishpami, Jesusca jahualla churanata anchuchishpa, shuc lienzota cinturapi churarca.

⁵ Chashnashpaca, yacuta bateapi churashpami, yachacuccunapac chaquita jahuashpa, lienzohuan chaquichi callarirca.

⁶ Simón Pedropac chaquita jahuagricpimi paica: —Apunchic Jesús, ¿canchu ñuca chaquita jahuagringui?— nirca.

⁷ Shina nicpimi Jesusca: —Ñuca cashna ruhuacushcataca manarac entendinguichu, quipamanmi entendingui— nirca.

⁸ Shina nicpimi Pedroca: —¡Jaicapi ñuca chaquita jahuachun, mana saquishachu!— nirca. Shina nicpimi Jesusca: —Cambac chaquita ñuca jahuachun, mana saquishpaca, mana ñuca yachacucchu cangui— nirca.

⁹ Shina nicpimi, Simón Pedroca: —Shinashpaca Apunchic Jesús, ama chaquillata jahuaichu. Umatapish, maquitapish jahuaiyari— nirca.

¹⁰ Shina nicpimi Jesusca: —Maijanpish ña armarishcaca chuyanllami, ashtahuanpish chaquillatami jahuana can. Cancunaca ña chuyanllami canguichic. Shina cashpapish, mana tucuichu chuyanlla canguichic— nirca.

¹¹ Jesusca maijan paita japichigricushcata yachashcamantami: “Mana tucuichu chuyanlla canguichic” nirca.

¹² Jesús chaquita ña jahuashpa, churanata churarishpa, cutin mizapi tiyarishpaca: —¿Imamantatac caita ruhuashcataca entendinguichicchu?

¹³ Cancuna ñucata ‘Yachachic’ shinallatac ‘Apunchic Jesús’ nishpaca, allitami ninguichic. Chaica, chaimi cani.

¹⁴ Ñuca Mandac cashpapish, Yachachic cashpapish, cancunapac chaquita jahuashcanimi. Chaimanta cancunapish, caishucpac, chaishucpac chaquita jahuaichic.

¹⁵ Cancunapish chashnallatac ruhuachunmi, ñucaca chashna jahuashpa ricuchini.

¹⁶ Servicca mana amota yallichu. Cachashcapish mana cachacta yallichu. Chaica chashnatacmi can.

¹⁷ Caicunata entendishpa, chaitatac ruhuashpaca, mai cushicuimi canguichic.

¹⁸ Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi: “Ñucahuan micucucllatacmi ñucataca piñanga” nishca pactachunmi, chashnaca tucunga.

¹⁹ Manarac chaicuna pactacpimi, ñuca pi cashcata cancuna crichun, cunanmanta pacha huillacuni.

²⁰ Maijanpish ñuca cachashcata chasquicca, ñucatami chasquin. Ñucata chasquicca, ñucata Cachactami chasquin. Chaica chashnatacmi can— nirca.

Judas Iscariote Jesusta japichinamanta

²¹ Chaita nishca quipa, Jesús shungupi yallita llaquirishpaca: —Cancunapuramanta shucmi ñucata japichigrin. Chaica chashnatacmi can— nirca.

²² Chaimantami yachacuccunaca pimanta nicushcata mana yachashpa, caishuc chaishuc ricunacurca.

²³ Jesuspac shuc cuyashca yachacucmi paihuan quimirishpa tiyacurca.

²⁴ Paitami Simón Pedroca pimanta chashna nicushcata tapuchun señata ruhuarca.

²⁵ Chai yachacuc Jesuspacman ashtahuan cuchuyashpaca: —Apunchic Jesús, ¿pitac chai japichicca?— nirca.

²⁶ Chashna nicpimi Jesusca: —Maijanmanmi tandata jucuchishpa cuni, chaimi— nirca. Jesusca tandata jucuchishpami, Simón Iscariotepac churi Judasman curca.

²⁷ Judas tandata japincami, Satanasca paipac shungupi yaicurca. Chaimantami Jesusca: —Can imata ruhuagricushcataca utca ruhuailla— nirca.

²⁸ Imamanta Jesús chashna nishcataca, chai mizapi tiyacuccunaca pipish mana entendircachu.

²⁹ Judasca cullquita tandacmi carca. Chaimantami maijan yachacuccunaca: «Judastami fiestapac imallata randichun nicunga, mana cashpaca, huacchacunaman cullquita cuchunmi nicunga» nishpa yuyacurca.

³⁰ Judas tandata japishcahuanmi, llucshishpa rirca. Chashna llucshicpica, ñami tuta carca.

Mushuc mandashcamanta

³¹ Judas llucshishpa ricpimi Jesusca: —Cunanmi Runa Tucungapac shamushca ñucaca jatunyachishca cagrini. Diospish ñucamantami jatunyachishca canga.

³² Dios ñucamanta jatunyachishca cashpaca, Runa Tucungapac shamushca ñucatapish jatunyachingami. Chaitaca utcami ruhuanga.

³³ Cuyashca yachacuccunalla, ashacamanllami cancunahuan cagrini. Cancunaca ñucata mashcanguichicmi. Mandac israelcunata nishca shinami cancunatapish nini: Ñuca maiman ricushcamanca, mana ri pudinguichicchu.

³⁴ Mushuc mandashcatami saquini: Caishuc chaishuc-huan cuyanacuichic. Ñuca ima shinami cuyani, chashnallatac cancunapish cuyanacuichic.

³⁵ Cancuna caishuc chaishuc-huan cuyanacucpimi, tucui cai pachapi causaccunaca ñucapac yachacuccuna cashcata yachangacuna— nirca.

Pedro Jesusta neganamanta

³⁶ Simón Pedro Jesusta tapushpaca: —Apunchic Jesús, ¿maimantac rigringui?— nirca. Chashna nicpimi Jesusca: —Ñuca maiman ricushcamanca mana cati pudinguichu, ashtahuanpish quipatami catingui— nirca.

³⁷ Chashna nicpimi Pedroca: —Apunchic Jesús, ¿ima nishpatac cunanca mana cati pudini? ¡Ñucaca canmanta huañuna cacpipish huañushallami!— nirca.

³⁸ Chashna nicpimi Jesusca: —¿Ñucamantachu huañugringui? Manarac gallo cantacpimi, quimsa cutin ñucata negangui. Chaica chashnatacmi canga— nirca.