SAN JUAN 12 - Dios Rimashcata Quillcashcami

Betaniapi Jesusta chaquipi mishquilla ashnacuc-huan cahuishcamanta

¹ Pascua fiestapac sucta punzha siricpimi, Jesusca Betania puebloman rirca. Jesús causachishca Lazaropish chaipimi causarca.

² Chaipimi Jesusman shuc cenata ruhuarca. Chaitaca Martami caracurca. Lazaropish Jesus-huanmi mizapi micushpa tiyacurca.

³ Chaipimi Mariaca achca valishca chaupi litro nardo nishca mishquilla ashnacucta apamushpa, Jesuspac chaquita cahuirca. Chaimantaca acchahuanmi chaquichirca. Chashna cahuicpica, tucui huasi ucumi mishquilla ashnacuc saquirirca.

⁴ Chashna ruhuacpimi, yachacuccunapuramanta quipaman Jesusta japichigricuc Judas Iscarioteca:

⁵ —Cai mishquilla ashnacuctaca, quimsa patsac denario cullquipi catushpa huacchacunaman cunachari, ashtahuan alli canman carca— nirca.

⁶ Judasca mana huacchacunata llaquishcamantachu chaitaca nirca, ashtahuanpish shuhuac cashcamantami chashna nirca. Paimi cullquita tandashpa huacaichic carca. Chashnami maijan cutinca shuhuac carca.

⁷ Shina nicpimi Jesusca: —Paica ñuca enterrana punzhapacmi mishquilla ashnacucta huacaichishpa charicushca, saquilla.

⁸ Huacchacunaca punzhantami cancunahuan. Ashtahuanpish ñucaca mana cancunahuan causacushallachu— nirca.

Lazarota huañuchingapac yuyarinacushcamanta

⁹ Tauca israelcunami Jesús Betaniapi cashcata chayac chayashpaca, chaiman rircacuna. Mana Jesusta ricungapacllachu rircacuna, ashtahuanpish Jesús causachishca Lazarota ricuna yuyaihuanpishmi rircacuna.

¹⁰ Curacunata mandac curacunaca Lazarota huañuchinatami yuyarinacurca.

¹¹ Chaica, Lázaro causarishcamantami achca israelcuna paicunamanta caruyashpa, Jesusta crircacuna.

Jesús Jerusalenpi yaicushcamanta

¹² Quipa punzha, Jerusalén Pascua fiestaman ric achca gentecuna Jesús Jerusalenman shamucucta uyashpami,

¹³ ramacunata pitishpa tupangapac llucshirca. Chashna llucshishpaca: —¡Quishpichicca alli nishca cachun! ¡Mandac Diospac shutipi shamuc, israelcunata Jatun Mandacca tucuipac alli nishca cachun!— nishpami caparirca.

¹⁴ Dios quillcachishcapi nishca shinami, Jesusca pactalla burropi tiyarishpa shamurca.

¹⁵ Chai quillcashcapica: «Sión pueblopi causaccunalla, ama mancharichicchu. Jatun Mandacca shuc pactalla burropimi montashpa shamucun» ninmi.

¹⁶ Cai nishcataca yachacuccunaca chai horasca mana entendircacunachu. Ashtahuanpish Jesús causarishca quipami, paimanta ñaupaman quillcachishca pactashcataca yuyarircacuna.

¹⁷ Jesus-huan cac gentecunaca Lazarota enterrashca jutcumanta cayashpa, causachishcatami tucuiman huillashca huillarca.

¹⁸ Chaimantami gentecunaca Jesús milagrota ruhuaclla cashcata yachashpa, paihuan tupangapac llucshirca.

¹⁹ Ashtahuanpish fariseocuna parlanacushpaca: —Riquichic, tucuimi paita caticun. Ñucanchicca imata mana ruhuai pudinchicchu— nicurca.

Griego gentecuna Jesusta mashcashcamanta

²⁰ Jerusalén fiestapi Diosta alli ningapac riccunapurapica, maijan griego gentecunapishmi carca.

²¹ Paicunami Galilea llacta Betsaida pueblomanta Felipepacman chayarca. Chashna chayashpaca: —Amito, Jesus-huanmi tupashun ninchic— nirca.

²² Felipeca Andresmanmi huillarca. Chaimantami ishcai tucushpa Jesusman huillarca.

²³ Shina huillacpimi Jesusca: —Runa Tucungapac shamushca ñucata jatunyachina punzhami chayamushca.

²⁴ Trigo muyu allpapi mana urmashpa, mana huañushpaca paillami saquirin. Ashtahuanpish allpapi urmashpa, huañushpaca achcatami pucun. Chaica chashnatacmi can.

²⁵ Maijanpish quiquin causaita cuyacca chingaringami. Ashtahuanpish maijanpish quiquin causaita cai pachapi mana cuyacca huiñaitami causanga.

²⁶ Maijanpish ñucata servisha nicca ñucata catichun. Ñucata servicca maipimi ñuca cani, chaipimi canga. Maijanpish ñucata servictaca ñuca Taitami alli ninga.

Jesús pai huañunata huillashcamanta

²⁷ Cunanca yallita llaquillami cani. ¿Cunanca imatac nisha? ¿Taitalla, cai llaquimanta anchuchiyari nishachu? Mana chashna nishachu, llaquita apangapacmi shamurcani.

²⁸ ¡Taitalla, cambac shutita jatunyachiyari!— nirca. Shina nicpi, jahua pachamantaca: «Ña jatunyachircanimi. Cutinpish ricuchishami» nishcami uyarirca.

²⁹ Chaipi cac maijan caccuna chaita uyashpaca: “Urcumi tulun ninacun” nircami. Cutin shuccunaca: “Angelmi rimacun” ninacurca.

³⁰ Chaimantami Jesusca: —Cai rimashcaca mana ñucamantachu uyarin, ashtahuanpish cancunamantami uyarin.

³¹ Cunanmi cai pachapi causaccunaca taripashca canga. Cunanmi cai pachata mandactapish llucchishpa shitashca canga.

³² Caspipi jahuaman huarcushca cashpami, tucuita ñucapacman pushamusha— nirca.

³³ Chaitaca pai ima shina huañuna cashcata entendichingapacmi nirca.

³⁴ Chaipi caccunaca: —Dios quillcachishcapica “Cristo huiñaitami causanga” ninmi. ¿Ima nishpatac canca: “Runa Tucungapac shamushcaca caspipi huarcushcami canga” nicungui? ¿Pitac chai Runa Tucungapac shamushcaca?— nirca.

³⁵ Chaimantami Jesusca: —Asha punzhacamanllami Achicyachicca cancunahuan canga. Achicyachic cancunahuan cashcacamanca, achicpi purichic. Amsapi puricca maiman ricushcatapish mana yachanchu.

³⁶ Cancunahuan Achicyachic cacpirac Achicyachicta crichic. Chashnami Achicyachicpac huahua canguichic— nirca. Shina nishca quipaca, Jesusca paicunapacmanta rishpa chingarircallami.

Israelcuna Jesusta mana crishcamanta

³⁷ Jesús tauca milagrocunata ruhuacucpipish, israelcunaca mana crircacunachu.

³⁸ Dios ima nishcata huillac Isaías huillashca pactachunmi chashna tucurca. Pai huillashpaca: «Dioslla, ¿pitac huillashcataca crishcayari? Diospac podertaca, ¿pitac ricushcayari?» nishcami.

³⁹ Chaimantami mana crircacuna. Chaica, Isaiasllatacmi:

⁴⁰ «Paicunapac ñahuita huichcarcami. Paicunapac shungutapish sinchiyachircami. Ñahuicunahuan ama ricuchun, paicunapac shungu ama yuyaita japichunmi cashna ruhuarca. Chaimantami ñucapacman mana cutimunga. Paicunataca mana alliyachishachu» nishcami.

⁴¹ Isaiasca Jesuspac sumaimana cashcata ricushpami, paimanta chashna huillarca.

⁴² Chashna cacpipish, mandac israelcunacamanmi taucacuna crirca. Ashtahuanpish tandanacuna huasimanta fariseocuna llucchishpa cachanata manchashpami, mana piman huillarca.

⁴³ Paicunaca Dios alli nishca canapac randica, gentecunapac alli nishca canatami ashtahuan munarca.

Jesuspac rimashcacuna taripana cashcamanta

⁴⁴ Jesús sinchita rimashpaca: —Maijanpish ñucata cricca mana ñucallatachu crin, ashtahuanpish ñucata cachac Taitatami crin.

⁴⁵ Maijanpish ñucata ricucca, ñucata cachac Taitatami ricun.

⁴⁶ Maijanpish ñucata cricca ama amsapi cachunmi, ñucaca achicyachic luz shina cai pachaman shamurcani.

⁴⁷ Maijanpish ñuca rimashcata uyashpapish mana cazuctaca, mana ñucachu taripasha. Mana cai pachapi causaccunata juchanchingapacchu shamurcani, ashtahuanpish quishpichingapacmi shamurcani.

⁴⁸ Maijanpish ñucata piñashpa ñuca rimashcata mana cazucca, taripashcami canga. Ñuca rimashcallatacmi, tucuri punzhapica juchanchinga.

⁴⁹ Mana ñuca munaimantachu rimacuni, ashtahuanpish ñucata cachac Taita imata mandashcallatami huillashpa rimani.

⁵⁰ Ñuca Taita mandashcacunaca huiñai causaita cuc cashcatami yachani. Chaimantami ñuca rimashpaca, ñuca Taita mandashcallata huillacuni— nirca.