SAN JUAN 11 - Dios Rimashcata Quillcashcami

Lázaro huañushcamanta

¹ Betania pueblomanta Lázaro runami ungushca carca. Paica, paipac panicuna Mariahuan, Martahuanmi chai pueblopi causarca.

² Chai Mariami quipamanca Jesuspac chaquicunapi mishquilla ashnacucta churashpa, acchahuan chaquichirca.

³ Lazaropac panicuna Jesuspacman cachashpaca: —Apunchic Jesús, canhuan apanacuc Lazaromi ungushca— nichun cacharca.

⁴ Jesús chaita uyashpaca: —Chai ungüica mana huañuchic ungüichu, ashtahuanpish Diostapish, paipac Churi ñucatapish jatunyachingapacmi— nirca.

⁵ Jesusca Mariatapish, Martatapish, Lazarotapish mai cuyacmi carca.

⁶ Jesusca Lázaro ungushcata yachashpapish, ishcai punzhacamanmi chaillapitac saquirirca.

⁷ Chai quipami, Jesusca paipac yachacuccunataca: —Cutinllatac Judea llactaman jacuchic— nirca.

⁸ Shina nicpimi yachacuccunaca: —Yachachic, sarunllami israelcunaca rumihuan shitashun nircacuna. ¿Chashna cashca jahuachu cutin chaillamantac risha ningui?— nirca.

⁹ Shina nicpimi Jesusca: —¿Manachu punzhaca chunga ishcai horasta charin? Maijanpish punzhapi puricca, mana mitcarinchu.

¹⁰ Maijanpish tuta purishpaca, luzta mana charishcamantami mitcarin— nirca.

¹¹ Chaita nishca quipaca Jesusca: —Ñucanchic-huan apanacuc Lazaromi sueñushca. Paitami ricchachingapac rigrini— nirca.

¹² Yachacuccuna chaita uyashpaca: —Apunchic Jesús, sueñucushpaca alliyangami— nirca.

¹³ Ashtahuanpish Jesusca, Lázaro huañushcamantami chashna nicurca. Cutin yachacuccunaca sueñunamantami nicurca.

¹⁴ Chaimanta Jesús alli entendichishpaca: —Lazaroca huañushcami.

¹⁵ Ñucaca chaipi mana cashcamantaca cushicunimi. Paica cancuna ashtahuan ñucata crichunmi huañushca. Chaimi cancunamanca ashtahuan alli. Cunanca jacuchic, ricushun— nirca.

¹⁶ Shina nicpimi, ishcaipura huacharishca Tomasca caishuc yachacuccunataca: —Ñucanchicpish Jesus-huan huañungapac jacuchic— nirca.

Jesús causachicpish, causaita cucpish cashcamanta

¹⁷ Jesusca Lazarota ña chuscu punzhata enterrashca cacpimi chayarca.

¹⁸ Betania puebloca Jerusalenmanta quimsa kilómetro shinallapimi carca.

¹⁹ Martapac, Mariapac turi huañushcamantaca, tauca israelcunami llaquinacungapac shamushca carcacuna.

²⁰ Jesús shamucucta Marta uyashpaca, tupangapacmi llucshirca. Ashtahuanpish Mariaca huasipimi saquirirca.

²¹ Chashna tupangapac llucshishpami Martaca: —Apunchic Jesús, can caipi cashca cacpica, ñuca turica mana huañunmanchu carca.

²² Shina cacpipish, Diosta mañacpica, Diosca uyangami— nirca.

²³ Shina nicpimi Jesusca: —Cambac turica causaringami— nirca.

²⁴ Shina nicpimi Martaca: —Ari, tucuri punzhapica causaringami. Chaitaca yachanimi— nirca.

²⁵ Shina nicpimi Jesusca: —Ñucami causaita cucpish, huañushcacunata causachicpish cani. Ñucata cricca huañushpapish causaringami.

²⁶ Maijanpish causacushpa, ñucata cricca, mana huiñaita huañungachu. ¿Chaitaca cringuichu?— nirca.

²⁷ Shina nicpimi Martaca: —Ari, Apunchic Jesús crinimi. Canca Diospac Churimi cangui. Cai pachaman shamuna cashca Cristomi cangui— nirca.

Jesús Lazarota enterrashca ladopi huacashcamanta

²⁸ Chaita nishca quipa, Marta huasiman tuctishpa, paipac ñaña Mariata pacallaman cayashpaca: —Yachachicmi caipi. Cantami cayacun— nirca.

²⁹ María chaita uyashpaca, utcami Jesus-huan tupangapac rirca.

³⁰ Jesusca manarac chai puebloman yaicurcachu. Martahuan tupashca pushtupimi carca.

³¹ Huasipi cushichishpa, compañashpa tiyacuc israelcuna María jatarishpa, utca ricta ricushpaca: —Enterrashcapimi huacangapac rin— nishpami, catishpa rircacuna.

³² María Jesuspacman chayashpa, paipac ñaupapi cungurishpaca: —Apunchic Jesús, can caipi cashca cacpica, ñuca turica mana huañunmanchu carca— nirca.

³³ Mariapish, paita compañac israelcunapish huacacucta Jesús ricushpa, shungupi llaquirishpaca:

³⁴ —¿Maipitac enterrarcanguichic?— nishpa tapurca. Shina nicpimi paicunaca: —Apunchic Jesús, shamui, ricungui— nirca.

³⁵ Jesuspish huacarcami.

³⁶ Chaimantami israelcunaca: —Riquichic, Lazarota yallitami cuyashca— ninacurca.

³⁷ Ashtahuanpish maijancunaca: —Cai runaca ñahui mana ricuc runataca alliyachircami. Shina cashpaca, ¿ima nishpatac Lázaro ama huañuchunca imata mana ruhuarca?— nirca.

Lázaro causarishcamanta

³⁸ Cutinllatacmi Jesusca shungupi llaquirishpa, chai enterrashca cuchuman rirca. Chai jutcuca quingraipimi jatun rumihuan jarcashca carca.

³⁹ Chaipimi Jesusca: —Rumita cutichichic— nirca. Shina nicpimi, chai huañushcapac pani Martaca: —Apunchic Jesús, pai huañushcaca ñami chuscu punzha, ashnacungami— nirca.

⁴⁰ Shina nicpimi Jesusca: —¿Manachu ñucaca: “Crishpaca, Dios imatapish ruhuaclla cashcata ricunguimi” nircani?— nirca.

⁴¹ Jesús shina nicpimi, enterrashcata tapashca rumita cutichirca. Jesús jahua pachata huichailla ricushpaca: —Taitalla, ñuca mañashcata uyashcamanta pagui ninimi.

⁴² Ñuca mañashcata can uyac cashcataca yachanimi. Caipi ñucahuan cac gentecuna ñucata can cachashcata crichunmi, cashna nini— nirca.

⁴³ Chaita nishca quipaca: —¡Lázaro, chaimanta llucshi!— nishpami, sinchita caparirca.

⁴⁴ Chashna caparicpimi, chai huañushcaca chaqui, maqui pillushca, umapish lienzohuan pillushca llucshimurca. Shina llucshimucpimi Jesusca: —Pai purichun, pillushcata pascaichic— nirca.

Jesusta huañuchingapac yuyarinacushcamanta

⁴⁵ Mariata compañac tauca israelcuna Jesús imata ruhuashcata ricushpaca, paita crircacunami.

⁴⁶ Cutin maijancunaca fariseocunamanmi Jesús imata ruhuashcata huillangapac rircacuna.

⁴⁷ Shina huillacpi, curacunata mandac curacunapish, fariseocunapish mandaccunapura tandanacushpaca: —Chai runataca, ¿imatatac ruhuanchic? Paica tauca milagrocunatami ruhuacun.

⁴⁸ Chashnalla saquicpica, tucuimi paita cringacuna. Shina cacpica, Roma llacta gentecuna shamushpami Diosta mañana huasitapish, ñucanchic gentecunatapish tucuchinga— nirca.

⁴⁹ Shina nicpi, paicunapuramanta chai huatapi curacunata mandac Caifasca: —Cancunaca imatapish mana yachanguichicchu.

⁵⁰ Ñucanchic llacta tucui gentecuna tucurinapac randica, shuc runalla tucui israelcunamanta huañunami ashtahuan alli. ¿Chaitaca manachu yachanguichic?— nirca.

⁵¹ Chaitaca mana paipac yuyaimantachu nirca, ashtahuanpish chai huatapi curacunata jatun mandac cashcamantami, Dios yuyaita cucpi, israelcunamanta Jesús huañuna cashcata huillarca.

⁵² Mana chai llactallamantachu huañuna carca, ashtahuanpish caita chaita rishpa causacuc Dios acllashcacunata tandarishpa, shucllata ruhuangapacmi huañuna carca.

⁵³ Chai punzhamanta pachami, Jesusta ima shina huañuchinata yuyarinacurca.

⁵⁴ Chaimantami Jesusca israelcunapurapica ña mana purirca, ashtahuanpish chaimanta llucshishpa, shitashca pamba cuchulla Efraín puebloman rishpa, chaipi paipac yachacuccunahuan carca.

⁵⁵ Israelcunapac Pascua fiesta punzhacunaca ñami caillapi carca. Chaimantami chai punzhacuna manarac chayamucpi, achca gentecuna chuyayangapac Jerusalenman rircacuna.

⁵⁶ Chaipi Jesusta mashcashpa, Diosta mañana huasipi yaicushpaca: —¿Imatatac ninguichic? ¿Manachu fiestaman shamunga?— ninacurca.

⁵⁷ Fariseocunapish, curacunata mandac curacunapish Jesusta japingapacmi, maijan ricushpaca, paicunaman huillachun mandarca.