JOSUÉ 9 - Dios Rimashcata Quillcashcami

Gabaonitacuna israelcunahuan parlanacushcamanta

¹ Israelcuna chashna ruhuashcataca Jordán yacu ladopi causac jatun mandaccunapish, urcucunapi causac mandaccunapish, mama cucha ladopi causac mandaccunapish, tucui Líbano llactata jatun mandaccunapish yachac chayarcami. Chaicunaca heteocuna, amorreocuna, cananeocuna, ferezeocuna, heveocuna, jebuseocunami,

² tucui mandaccunaca shuc yuyailla tucushpa Josuehuan, israelcunahuan macanacungapac tandanacurca.

³ Ashtahuanpish Josué Jericó pueblopi, Hai pueblopi causaccunata imata ruhuashcata Gabaón pueblopi causaccuna yachashpaca,

⁴ llullashpa umanatami yuyarirca. Chashna yuyarishpami shuc huillacta paya sacocunata, vino churanatapish paya remendashcata burrocunapi apachishpa,

⁵ shinallatac paicunamanpish paya remendashca ushutata churachishpa, paya churanacunata churachishpa cacharca. Ñanpi micuna tandatapish chaquishca verdiyashcatami aparcacuna.

⁶ Gilgal pambapi Josuepish, israelcunapish carpa huasicunata shayachishpa tiyacushcaman chayashpaca: —Ñucanchicca caru llactamantami shamunchic. Cunanca, imatapish pactachingapac ari nichunmi cancunahuan parlanacungapac shamunchic— nirca.

⁷ Shina nicpimi, israelcunaca heveocunataca: —Cancunaca ñucanchic chaupillapitacmi causanguichic. Shina cacpica, ¿ima shinatac cancunahuanca ari ninacushunyari?— nirca.

⁸ Shina nicpimi, paicunaca Josuetaca: —Ñucanchicca canta serviccunami canchic— nirca. Shina nicpimi Josueca: —Cancunaca, ¿picunatac canguichic? ¿Maimantatac shamunguichic?— nishpa tapurca.

⁹ Shina tapucpi paicunaca: —Canta servic ñucanchicca caru llactamantami shamunchic. Chaica, canta Mandac Dios mai allicunata ruhuashcata shinallatac Egiptopi imata ruhuashcata yachashpami shamunchic.

¹⁰ Shinallatac Jordán yacumanta chimba ladopi causac amorreocunata ishcai jatun mandaccunata imata ruhuashcatapish uyarcanchicmi. Chai mandaccunaca Astarot llactapi Hesbón pueblota mandac Sehón, shinallatac Basán pueblota jatun mandac Ogmi carca.

¹¹ Chaimantami ñucanchicta pushac yuyaccunapish, ñucanchic llactapi tucui causaccunapish ñucanchicta rimashpaca: “Ñanpi micungapac cucayuta apashpa, paicunata tupangapac richic. Paicunapacman chayashpaca: ‘Ñucanchicca cancunata serviccunami canchic. Ñucanchic-huan imatapish pactachingapac ari niyari’ ninguichic” nirca.

¹² Cancunahuan tupangapac huasimanta llucshimui punzhapica cai ñucanchic ñanpi micuna cucayuca cunucllaracmi carca. Riquichic, cunanca ña chaquishpa verdiyashcami.

¹³ Shinallatac vino churana capachupish ñucanchic vinota churacucpica, mushucmi carca. Riquichic, cunanca payayashpami ña lliquirishca. Cai ñucanchic churanacunapish, ushutacunapish yalli caruta purishcamantami payayashca— nircacuna.

¹⁴ Israelcunaca chai runacuna apamushca micunata chasquircami. Ashtahuanpish Mandac Diosmanca mana tapurcachu.

¹⁵ Chai quipami Josueca paicunahuan apanacushpa causangapac, mana huañuchingapac ari nirca. Chashnallatacmi tandanacushca israelcunata mandaccunapish ari nirca.

¹⁶ Chashna ari nishcamanta quimsa punzha quipami, chai runacunaca paicunapac chaupillapitac causaccuna cashcata yachac chayarca.

¹⁷ Chaimantami israelcunaca chai runacuna causana pueblocunaman mashcangapac rishpa, quimsa punzhapi chayarca. Paicunapac pueblocunaca Gabaón, Cafira, Beerot, Quiriat-jearimmi carca.

¹⁸ Chaiman chayashpaca, tandanacushca israelcunata mandaccunallata paicunata Mandac Diospac shutipi ari nishcamantami chaipi causaccunataca mana huañuchirca. Chaimantami tandanacushca tucui israelcunaca paicunata mandaccunata rimarirca.

¹⁹ Chashna rimacpimi, tucui mandaccunaca tandanacushca israelcunata: —Ñucanchicmi israelcunata Mandac Diospac shutipi ari nircanchic. Chaimanta cunanca, chai runacunataca imatapish mana ruhuai pudinchic.

²⁰ Paicunahuanca caitami ruhuana canchic: Paicunataca causachun saquinallami canchic. Paicunahuan ari nishca jahua paicunata huañuchicpica, Diosca ñucanchic-huan yallita piñaringami. Chaimanta mana huañuchinachu canchic— nirca.

²¹ Shinallatac israelcunata mandaccunaca: «Causachun saquichiclla» nircami. Chaimantami paicunaca israelcunata mandaccuna nishca shinallatac tandanacushca israelcunaman yantata, yacuta ashtac tucurcacuna.

²² Josueca chai runacunata cayashpaca: —¿Ima nishpatac cancunaca: “Ñucanchic chaupillapitac causacushpa, caru llactamantami canchic” nishpa llullarcanguichic?

²³ Chaimanta cunanca mana alli nishcami canguichic. Cancunaca ñucanchicta servishpa, ñucanchicman yantata pitishpa, ñucanchic Taita Diosman yacuta ashtashpami causanguichic— nirca.

²⁴ Shina nicpimi, paicunaca Josuetaca: —Canta servic ñucanchicca canta Mandac Dios paita servic Moisesman huillashpa, tucui llactacunapi causaccunata tucuchishpa, chai llactacunata cancunaman cusha nishcatami allita yacharcanchic. Chaimantami cancuna ñucanchicta huañuchinata yallita manchashpa chashna ruhuarcanchic.

²⁵ Cunanca, cancunapac maquipimi canchic. Imata ruhuana alli cana cacpica, chaita ruhuailla— nirca.

²⁶ Chashnami Josueca paicuna nishca shinallatac ruhuashpa, israelcunapac maquimanta cacharichishpa, mana huañuchirca.

²⁷ Chai punzhami Josueca gabaonitacunataca yantata pitic cachun, tandanacushca israelcunamanpish, Mandac Diospac altarmanpish yacuta ashtachun churarca. Mandac Dios acllashca pushtupimi chashna ruhuashpa, causachun churarca. Cunancamanmi chaita ruhuashpa causancuna.