JOSUÉ 8 - Dios Rimashcata Quillcashcami

Israelcuna Hai pueblopi causaccunata macanacushpa atishcamanta

¹ Mandac Diosca Josuetaca: «Ama manchaichu, ama shaicushca shina caichu. Alli macanacuc runacunata pushashpa, Hai puebloman ri. Riqui, cambac maquipimi Hai pueblota mandactapish, chaipi causaccunatapish, pueblocunatapish, chai allpatapish churani.

² Hai pueblotapish, chai llactata jatun mandactapish, ima shinami ruhuarcangui shinallatacmi Jericó pueblotapish, chai llactata jatun mandactapish ruhuana cangui. Ashtahuanpish paicuna charishcacunallata, paicunapac huagracunallata japinguichic. Shinallatac cungailla puebloman yaicungapacca chai pueblo huashata maijan runacunata cachangui» nirca.

³ Josueca macanacuc runacunahuanmi Hai pueblopi causaccunahuan macanacungapac llucshirca. Josueca quimsa chunga huaranga sinchi macanacuc runacunata acllashpami cacharca.

⁴ Paicunataca: «Riquichic, puebloman cungailla yaicungapac chai pueblo huashaman rishpa maijancunata churanguichic, ama caruyanguichicchu, allichirishpa shuyanguichic.

⁵ Ñucapish, caipi cac tucui macanacuc runacunapish pueblo ñaupa ladotami yaicushun. Paicuna puntaman ima shina ñucanchic-huan macanacungapac llucshic shinallatac llucshicpica, paicunapac ñaupamantami callpashun.

⁶ Paicunaca ñucanchicta chai pueblomanta achcata caruyangacamanmi catingacuna. Paicunaca: “Puntapi shinallatacmi ñucanchicpac ñaupamanta callpancuna” nishpami catingacuna. Chashnami paicunapac ñaupamanta achcata rishun.

⁷ Chashna catishpa caruyacpica, cancunaca pueblo huashamanta cungailla llucshishpa, chai pueblota japinguichic. Chaica Mandac Dios chai pueblotaca ñucanchic maquipimi churashca.

⁸ Ña chai pueblota japishpaca, Mandac Dios mandashca shinallatac rupachinguichic. Riquichic, caicunataca ñucami mandani» nirca.

⁹ Josué shina mandacpi, paicuna rishpaca, Bet-el pueblohuan, Hai pueblohuan tupanacuipi chapangapacmi rircacuna. Chai pushtuca Hai pueblomanta inti tigrana ladopimi carca. Josueca chai tuta gentecunapac chaupipi pacarishpami,

¹⁰ cayandi tutamanta utca jatarishpa, gentecunata ricungapac rirca. Chai quipaca Josuepish, israelcunata pushac yuyaccunapish gentecunapac ñaupatami Hai pueblopi causaccunahuan macanacungapac rirca.

¹¹ Tucui paihuan saquirishca macanacuc runacunami paihuan huichai rishpa, Hai puebloman cuchuyarca. Chai pueblo jahua ladoman chayashpami chai pueblo chimba ladopi carpacunata shayachishpa tiyarirca. Paicuna Hai puebloman chayangapacca jatun pamballami tiyarca.

¹² Chaipimi Josueca inti tigrana ladopi, chaica Bet-el pueblohuan, Hai pueblohuan, tupanacuipi pichca huaranga macanacuc runacunata pacalla chapachun churarca.

¹³ Chai shinami shuc parte gentecunaca chai pueblo jahua ladopi, caishuc cuidac runacunaca inti tigrana ladopi carca. Josueca chai tutaca jatun pamba chaupicamanmi rirca.

¹⁴ Hai pueblota jatun mandac chaita ricushpami tutamanta utca jatarishpa, chai pueblopi causaccunata pushashpa, israelcunahuan Arabá chimba pampapi macanacungapac llucshirca. Paicunaca maijan israelcuna Hai pueblo huashapi chapacucta mana yachashpami chashna llucshirca.

¹⁵ Josueca tucui israelcunandimi miticushpa callpacuc shina, paicunapac ñaupamanta shitashca pambata callparca.

¹⁶ Shina callpacpimi, tucui Hai pueblopi causaccunaca catingapac tandanacurca. Shina tandanacushpami Josueta catishpa, chai pueblomanta carucaman catirca.

¹⁷ Tucui Hai pueblopi, tucui Bet-el pueblopi causaccunami shucllapish mana saquirishpa, israelcunata catircacuna. Israelcunata catingaraicumi pueblo pungutapish pascashpa rircacuna.

¹⁸ Chashna cacpimi, Mandac Diosca Josuetaca: «Cambac maquipi charicuc lanzata Hai pueblo ladoman ricuchi. Chai pueblotaca ñucami cambac maquipi churasha» nirca. Chaimantami Josueca chai pueblo ladoman chai lanzata ricuchirca.

¹⁹ Chashna ricuchicpimi, chaipi pacalla chapacuc runacunaca miticushca pushtumanta utca llucshishpa, Hai puebloman yaicurca. Chaiman yaicushpami, chai pueblota utca ninata churashpa rupachirca.

²⁰ Hai pueblopi causaccunaca paicunapac pueblota tigrarishpa ricushpaca, chai pueblo rupashpa, cushni jahua pachaman ricuctami ricurcacuna. Paicuna shitashca pambata caticucpi, israelcuna paicunahuan macanacungapac cutimucucpimi, maimanpish mana callpai pudircacuna.

²¹ Josuepish, tucui israelcunapish, pacalla chapacuc runacunapish Hai pueblota japishcata, shinallatac chai pueblomanta cushni llucshicucta ricushpami, cutishpa tucui Hai pueblopi causaccunata huañuchirca.

²² Chashna cacpica, caishuc israelcuna Hai pueblomanta llucshishpami tupangapac shamurca. Chashna shamucpimi, Hai pueblopi causaccunaca israelcunapac chaupipi saquirirca. Shuccunaca caishuc ladomanta, chaishuccunaca chaishuc ladomanta shamushpami, chaupinchishpa shucllatapish mana saquishpa, tucui huañuchirca.

²³ Shinallatac Hai pueblota jatun mandacta japishpaca, Josuepacmanmi aparcacuna.

²⁴ Israelcunaca, paicunata macangapac catic tucui Hai pueblopi causaccunata shitashca pambapi espadahuan tucui huañuchishca quipaca, Hai puebloman cutishpami, chaipi saquiriccunata espadahuan tucui huañuchirca.

²⁵ Chai punzhapi huañushcacunata caricunatapish, huarmicunatapish yupacpica, chunga ishcai huarangami carca. Chai huañushcacunaca Hai pueblopi causaccunami carca.

²⁶ Josueca Hai pueblopi causaccunata tucui tucuchingacamanmi chai pueblo ladoman lanzata ricuchishpa shayacurca.

²⁷ Mandac Dios Josueta mandashca shinami, israelcunaca Hai pueblopi causaccunapac animalcunallata, tucui ima tiyashcacunallatami japirca.

²⁸ Josueca Hai pueblota rupachishpami huiñaipac tucuita tucuchishpa, rumi montón shinata saquirca. Chashnami Chaica cunancamanmi chashnallatac can.

²⁹ Cutin Hai pueblota jatun mandactaca tutayangacamanmi jatun yurapi huarcushpa saquirca. Ña tutayacpimi, Josueca chai huañushcata yuramanta uricuchishpa, Hai pueblo yaicunapi shitashpa, chai jahuapica rumicunata montonachun mandarca. Cunancamanmi chai montonca tiyan.

Mandashcata Ebal urcupi rezashcamanta

³⁰ Chai quipami Josueca israelcunata Mandac Diosman shuc altarta Ebal urcupi,

³¹ Mandac Diosta servic Moisés israelcunata mandashca shinallatacmi ruhuarca. Moisés quillcashpa mandashcapica: Mana labrashca, mana fierro tupashca rumihuan shuc altarta ruhuangui. Chai altarpimi Mandac Diosman animalcunata cushpa tucui rupachingui. Shinallatac Dios-huan alli tucungapacpish, animalcunata cushpa rupachingui ninmi.

³² Shinallatac israelcunapac ñaupapi Moisés mandashpa quillcashcatami Josueca rumipi quillcarca.

³³ Chaillapitacmi pushac uyaccunapish, juezcunapish, quipa mandaccunapish, shuctac llactamanta shamushcacunapish tucui israelcuna Arca ladopi, levita curacunapac ladopi ishcai ladoman shayacurca. Paicunaca Mandac Diosta servic Moisés mandashca shinallatacmi chaupica Gerizim urcu ladopi, shuc chaupica Ebal ladopi shayacurca. Israelcunarac bendicionta japingapacmi chashnaca shayacurca.

³⁴ Chai quipaca, mandashcata quillcashca libropi bendicionmantapish, maldicionmantapish ima shina mandashcapi nishca shinami rezarca.

³⁵ Josueca Moisés mandashcataca shuc rimaillatapish mana saquishpami tucui israelcunapac ñaupapi rezarca. Chashnami huarmicunapac, huahuacunapac, caru llactamanta shamushcacunapac ñaupapi rezarca.