JOSUÉ 7 - Dios Rimashcata Quillcashcami

Acán pandarishcamanta

¹ Ashtahuanpish israelcunaca Mandac Dios tucuchingapac chicanyachishcata pacalla japishpami pandarircacuna. Judapac aillupuramanta Acanmi chaitaca ruhuarca. Paica Carmipac churi, Zabdipac nieto, Zerapac bisnietomi carca. Chaimantami Mandac Diosca israelcunahuan nina japiric shina piñarirca.

² Chai quipami Josueca Jericó pueblomanta Hai puebloman runacunata cacharca. Chai puebloca Bet-el pueblomanta inti llucshina ladopi tiyac Bet-avén pueblo ladollapimi carca. Chaiman cachashpaca: «Huichai rishpa, chai llactata ricugrichic» nirca. Shina nicpi, Hai pueblota ricushpa,

³ Josuepacman cutishpaca: «Hai pueblopi causaccunaca ashallami. Chaimanta ishcai huaranga, mana cashpaca quimsa huaranga runacunalla llucshichun. Chai pueblotaca paicunallami quichunga. Ama tucui mashna rishpa, yanga shaicuichicchu» nirca.

⁴ Shina nicpimi, israelcunaca quimsa huaranga shina runacuna huichai ricpipish, Hai pueblopi causaccunaca paicunata atishpa macacpimi, miticushpa callparcacuna.

⁵ Hai pueblopi causaccunaca israelcunataca quimsa chunga sucta runacunatami huañuchirca. Chashnami chai pueblo pungumanta Sebarím pambacaman catishpa, chai urai rina ñanpi macashpa atirca. Chaimantami israelcunaca chucchushpa, yallita mancharca.

⁶ Chaimantami Josueca yallita llaquirishpa, churanata lliquishpa Mandac Diospac Arca ñaupapi israelcunata pushac yuyaccunandi tutayangacaman pambacaman cumurirca. Shinallatac llaquirishpami, uchupata umapi churarirca.

⁷ Chashna cashpami Josueca: —¡Mandac Dioslla! ¿Imapactac cai gentecunataca amorreocuna tucuchichun Jordán yacuta pasachishpa, cai puebloman apamurcangui? ¡Jordán yacu chimba ladopi saquirishpachari alli canchicman carca!

⁸ ¡Mandac Dioslla! Israelcunata piñaccuna macashpa mishashpa, catishpa cachacpica, ¿imatatac nishayari?

⁹ Chashna tucushcata cananeocunapish, cai llactapi tucui causaccunapish yachashpaca, ñucanchicta muyunacushpami, ñucanchic shuticunatapish cai pachamanta chingachinga. Chashna ruhuacpica, cambac jatun shuti alli nishca catichunca, ¿imatatac ruhuagringuiyari?— nirca.

¹⁰ Shina nicpimi, Mandac Diosca Josuetaca: —Jatari. ¿Ima nishpatac pambacaman cumuringui?

¹¹ Israelcunaca juchallishcacunami. Pactachingapac ñucahuan ari nishcataca mana cazushcacunachu. Ñuca tucuchingapac chicanyachishcataca shuhuashcacunami, llullashcacunami. Chai shuhuashcata paicuna charishcacunapimi pacashca.

¹² Chaimantami israelcunaca paicunata piñaccunahuan macanacunata mana pudincuna. Ashtahuanpish paicunata piñaccunapac ñaupamantaca manchashpami callpangacuna. Paicunapish ñuca tucuchingapac chicanyachishtaca cancunapac chaupimanta mana anchuchishpa chingachicpica, ñucaca mana ashtahuan cancunahuan cashachu.

¹³ Jatari, israelcuna chuyanlla tucuchunca: “Cayapac mapa illac tucuichic. Mandac Diosca: ‘Israelcunalla, cancunapac chaupipimi ñuca tucuchingapac chicanyachishca tiyacun. Cancunapac chaupimanta ñuca tucuchingapac chicanyachishcata anchuchingacaman cancunata piñaccunata mana ati pudinguichicchu’ ninmi” nirca.

¹⁴ Cayaca aillucunapuralla tandanacushpami cuchuyana canguichic. Maijan aillucunata Mandac Dios ñuca cayacpica, chai aillupurami cuchuyanga. Chai aillupuramanta maijanta Mandac Dios ñuca cayacpica, huasi ucupuramantami cuchuyanga. Shinallatac huasi ucupuramanta Mandac Dios cayacpica, caripuramantami cuchuyanga.

¹⁵ Maijan cancunapurapi Dios tucuchingapac chicanyachishca tariricpica, paica pai charishcacunandimi rupachishca canga. Paica Mandac Dios-huan ari nishcata mana cazushpa, israelcunapurapi mana allita ruhuashcamantami chashna rupachishca canga— nirca.

¹⁶ Josué cayandi tutamanta utca jatarishpa, Israel aillucunamanta paicunapac ailluta catishpa cayacpica, Judá aillumi cuchuyarca.

¹⁷ Judá ailluta cayacpica, Zerapac churicunapac aillucunami cuchuyarca. Zerapac aillucunata cayacpica, Zabdipac aillumi cuchuyarca.

¹⁸ Paicunapac huasi ucupura caricunata cayacpica, Carmipac churi Acanmi cuchuyarca. Carmica Zabdipac, Zerapac churicunamanta, Judá aillucunapurami carca.

¹⁹ Chashna cuchuyacpica, Acanta Josué tapushpaca: —¡Ñuca huahualla, can imata ruhuashcata huillashpa israelcunata Mandac Diosta sumacmari cangui, allimari cangui niyari! ¡Can imata ruhuashca cashpapish ama pacaichu!— nirca.

²⁰ Shina nicpimi, Acanca Josuetaca: —Israelcunata Mandac Diospac ñaupapica juchallishcanimi. Caitami ruhuarcani:

²¹ Tucui japishcapurapimi Babilonia llactamanta randishca jahualla sumac ishcai patsac kilo pezac cullquita, pichca chunga siclos pezac curi barrata munashpa pacalla japircani. Chaicunaca ñuca carpa huasi ucu chaupi allpapimi pambashca. Cullquipish, chai ucullapitacmi can— nirca.

²² Josué huillaccunata cachacpi, paicuna callpashpa rishpaca, Acanpac carpa huasiman chayashpami chaipi pacashcatapish, chai ucupi cullqui tiyacushcatapish tarircacuna.

²³ Paicunaca carpa huasi ucupi tarishpami Josuepacman, shinallatac israelcunapacman apashpa, Mandac Diospac ñaupapi churarcacuna.

²⁴ Chai quipaca, Josueca tucui israelcunahuan tandanacushpami Zerapac churi Acanta japishpa, pai shuhuashca cullquindi, jahualla churanandi, curi barrandi, paipac churicunandi, ushicunandi, huagracunandi, burrocunandi, ovejacunandi, carpa huasindi, tucui charishcacunandi Acor pambamanmi aparca.

²⁵ Chaipimi Josueca: —¿Ima nishpatac ñucanchicta chashna llaquipi churarcangui? Cantapish, Mandac Dios cunan punzha llaquichichun— nirca. Chai quipaca, tucui israelcunami rumihuan shitashpa huañuchirca. Shina huañuchishca quipaca tucuimi rupachirca.

²⁶ Chashna paita rupachishca jahuapica rumicunatami montonarca. Chai montonca cunancamanmi tiyan. Chashna rupachicpimi, Mandac Diosca pai nina japiric shina piñarishcataca pasachirca. Chaimantami chai pugru pambataca cunan punzhacaman Acor pamba nincuna.