JOSUÉ 6 - Dios Rimashcata Quillcashcami

Jericó pueblota israelcuna japishcamanta

¹ Jericó pueblopi causaccunaca israelcunata manchashpami, puebloman yaicuna pungutapish alli huichcarca. Chaimantaca pipish mana llucshircachu, shinallatac mana yaicurcachu.

² Ashtahuanpish Mandac Diosca Josuetaca: «Riqui, ñucami Jericó pueblopi causaccunatapish, paicunata jatun mandactapish, paicunapac soldadocunatapish cambac maquipi churani.

³ Chai pueblotaca macanacunata alli yachac tucui soldadocunahuan cada punzha shuc cutin sucta punzhacaman muyuichic.

⁴ Canchis curacunami oveja gachumanta ruhuashca canchis cornetata apashpa, Arca ñaupata ringa. Canchis punzha tucucpica, canchis cutin chai pueblota muyunguichic. Cutin curacunaca chai gachu cornetapimi tocangacuna.

⁵ Oveja gachucunapi unaita tocashpa uyaricpica, tucui gentecunami sinchita caparinga. Chaipica, pueblota jarcashca pircaca urmangami. Shina tucucpica, chai puebloman rishpami llaquichigrina canguichic» nirca.

⁶ Nunpac churi Josué curacunata cayashpaca: «Dios ari nishca quillcata huacaichina Arcata apaichic. Canchis curacunaca oveja gachucunamanta ruhuashca canchis cornetata apashpami, Arcata huanduccunapac ñaupata ringacuna» nirca.

⁷ Shinallatac israelcunataca: «Chai pueblota muyugrichic. Macanacungapac allichirishca caricunaca Diospac Arcata apaccunapac ñaupatami pasangacuna» nirca.

⁸ Josué gentecunata chashna nincami canchis curacunaca oveja gachumanta ruhuashca canchis cornetata apashpa, Mandac Diospac Arca ñaupata rishpa tocarcacuna. Cutin Mandac Diospac Arcaca catishpami rirca.

⁹ Macanacungapac allichirishca caricunaca gachucunapi tocashpa ricuc curacunapac ñaupatami rirca. Cutin caishuccunaca Arcata apaccunapac huashatami rirca. Gachucunapica tocacurcacunallami.

¹⁰ Josueca gentecunataca: «Cancunaca ama caparinguichicchu, allillapish ama rimanguichicchu. Shuc rimaillatapish ama rimanguichicchu. Ima horas ñuca: “Caparichic” nicpimi, caparina canguichic» nirca.

¹¹ Shinami Josueca Diospac Arcahuan, chai pueblota shuc cutin muyushpa, paicunapac carpaman cutishpa chaipi pacarirca.

¹² Cayandi tutamanta Josueca utcami jatarirca. Cutin curacunaca Mandac Diospac Arcatami aparca.

¹³ Oveja gachumanta ruhuashca canchis cornetata apac canchis curacunaca Mandac Diospac Arcata huanduccunapac ñaupatami tocashpa rirca. Paicunapac ñaupataca macanacungapac allichirishca caricuna, cutin caishuccunaca Mandac Diospac Arcata huanduccunapac huashatami rirca. Gachucunapica tocacurcacunallami.

¹⁴ Quipa punzhapish, ñaupa punzha shinallatacmi chai pueblota muyushpa, paicunapac carpacunaman cutirca. Chashnami sucta punzhacaman muyurcacuna.

¹⁵ Canchisniqui punzha tucucpica, manarac punzhayacpimi, jatarishpa ñaupa punzha shinallatac canchis cutin, chai pueblota muyurcacuna. Chai punzhallami canchis cutin muyurcacuna.

¹⁶ Canchis cutin curacuna oveja gachupi tocacpimi, Josueca israelcunataca: «Mandac Diosmi cai pueblotaca ñucanchic maquipi churan. Chaimanta caparichic.

¹⁷ Shina cacpipish, Mandac Diosca cai pueblopi causaccunataca chaipi tucui imalla tiyashcacunandi tucuchingapacmi chicanyachishca. Huainayashpa causac Rahab huarmillami paipac huasipi tiyaccunandi mana huañunga. Paica ñucanchic cachashca pacalla ricuc runacunata pacashpa, mana huañuchichun saquishcamantami mana huañuchishca canga.

¹⁸ Ashtahuanpish, cunanca Dios tucuchingapac chicanyachishcataca, imatapish ama tuparinguichicchu, ama japinguichicchu pacta israelcunapac carpacuna Dios llaquichina tucunman.

¹⁹ Ashtahuanpish curipish, cullquipish, broncemanta, fierromanta ruhuashca imacunapish Mandac Diospaclla chicanyachishcami. Chaimanta Mandac Diospac imapish valishcacunata churana ucupimi churana can» nirca.

²⁰ Israelcuna caparicpimi, curacunapish oveja gachupi tocarcacuna. Chai tocashcata uyashpaca, sinchitami caparircacuna. ¡Shina caparicpica, jatun pircapish urmarcami! Chaipica, tucui israelcunami paicunapac ñaupata rishpa puebloman yaicurcacuna.

²¹ Chaiman yaicushpaca, chaipi tucui causaccunatami espadahuan huañuchishpa, caricunatapish, huarmicunatapish, quipa huiñaicunatapish, yuyaccunatapish tucuchirca. Chashnallatac huagracuna, ovejacuna, burrocunacamanmi tucuchirca.

²² Josueca chai llactata ricungapac ric ishcai runacunataca: «Huainayashpalla causac huarmipac huasiman chayashpa, cancuna pactachingapac ari nishca shina, chai huarmitapish, paipac tucui charishcacunatapish apaichic» nirca.

²³ Chai runacunaca Rahab huarmipac huasiman yaicushpami paitapish, paipac taitatapish, mamatapish, turicunatapish, paipac tucui charishcacunatapish, paipac familiatapish llucchishpami, israelcunapac carpa huasimanta carupi churarca.

²⁴ Chai pueblotaca chaipi imalla tiyashcacunandi rupachishpa tucuchirca. Cullquita, curita shinallatac broncemanta, fierromanta ruhuashcacunatami Mandac Diospac alli valishcata huacaichina ucupi churarca.

²⁵ Ashtahuanpish, Josueca chai huainayashpalla causac Rahab huarmitapish, paipac taitapac familiatapish, paipac tucui charishcacunatapish mana tucuchircachu. Chaimantami Rahab huarmica cunancaman israelcunahuan causacun. Jericó pueblota ricuchun Josué cachashca runacunata pacashcamantami paitaca mana tucuchirca.

²⁶ Chai punzhacunapimi Josueca pactachingapac ari nishpaca: «¡Maijanpish cai Jericó pueblota cutinllatac allichishpa shayachicca Mandac Diospac ñaupapi mana alli nishca cachun! Cai pueblo callari pircataca paipac punta churipac jahuapi churachun. Cai pueblo pungutaca quipa churipac jahuapi churachun» nirca.

²⁷ Mandac Diosca Josuehuanmi carca. Chaimantami Josuepac shutica tucui cai pachapi ricsishca can.