JOSUÉ 5 - Dios Rimashcata Quillcashcami

Circuncisionta Gilgalpi ruhuashcamanta

¹ Jordán yacu chimba lado, inti tigrana ladoman causac amorreocunata jatun mandaccunapish, mama cucha ladopi causacuc cananeocunata jatun mandaccunapish, Jordán yacuta israelcuna pasachun Mandac Dios ima shina chaquichishcata yacharcacunami. Chaimantami paicunapac shungupi yallita manchaihuan israelcunapac ñaupapica shaicushca shina tucurcacuna.

² Chai punzhacunapimi Mandac Diosca Josuetaca: «Rumimanta cuchillota ruhuashpa, israelcunata cutin circuncisionta ruhuai» nirca.

³ Shina nicpimi, Josueca fino cuchillota ruhuashpa tucui caricunataca Aralot lomapi circuncisionta ruhuarca.

⁴ Chaica, Egiptomanta llucshimushca macanacunata yachac caricunaca shitashca pambapimi tucui huañurca.

⁵ Egiptomanta llucshic tucui caricunami circuncisionta ruhuashca carcacuna. Cutin Egiptomanta llucshimushpa shitashca pambapi huacharishcacunaca mana circuncisionta ruhuashcachu carca.

⁶ Israelcunaca chuscu chunga huatatami Egiptomanta llucshimushca macanacuc caricuna tucuringacaman shitashca pambata purirca. Chai caricunaca Mandac Dios rimashcata mana cazushcamantami chashna tucurirca. Mandac Diosmi lechepish, mishquipish yacu shina callpacuc llactata cungapac cancunapac ñaupa taitacunaman ari nishca carca.

⁷ Chai huañushca runacunapac randi paicunapac churicunata Mandac Dios pushamushcatami Josueca circuncisionta ruhuarca. Paicunaca ñanpi huacharishcamantami mana circuncisiontaca ruhuashca carca.

⁸ Ña tucui gentecunata circuncisionta ruhuashca quipaca alli tucungacamanmi chaillapitac carpacunata shayachishpa tiyarirca.

⁹ Chaipimi Mandac Diosca Josuetaca: «Cunanmi Egipto llactapi pingaichishcata anchuchini» nirca. Chaimantami chai lomataca Gilgalta shutichirca. Shinami cunancaman chai shuti can.

¹⁰ Israelcunaca Gilgalpi carpacunata shayachishpa tiyacushpami punta quilla, chunga chuscu punzha chishi Jericó pueblo pambapi Pascua fiestata ruhuashpa, cushicushpa micurca.

¹¹ Chai Pascua cayandi punzhaca chai allpapi pucushca granocunatami: levadura illac tandata, punta pucushca trigo umata cusashpa micurca.

¹² Chai llactapi pucushca granocunata micui callarishca cayandi punzhaca maná shuti micunaca tucurircami. Israelcunaca maná shuti micunataca mana ashtahuan charircacunachu. Ashtahuanpish chai huatacunaca ñami Canaán llactapi pucushca granota micurca.

Mandac Diospac soldadomanta

¹³ Shuc punzhami Josueca Jericó pueblo cuchullapi cashpa huichai ricushpaca, shuc runa espadata huacaichinamanta llucchishpa, maquipi apashpa paipac ñaupapi shayacucta ricurca. Josué paipac ladoman cuchuyashpaca: —¿Canca ñucanchicpurachu cangui? ¿Mana cashpaca, ñucanchicta piñacpurachu cangui?— nishpa tapurca.

¹⁴ Shina tapucpi chai runaca: —Mana, ashtahuanpish Mandac Diospac soldadocunata mandacmi cani— nirca. Shina nicpi, Josueca pambacaman cumurishpa, allimari cangui nishpaca: —Ñucata mandaclla canta servictaca, ¿imatatac ruhuachun ninguiyari?— nirca.

¹⁵ Shina nicpimi, Mandac Diospac soldadocunata mandacca Josuetaca: —Cambac chaquimanta ushutata llucchi. Can maipi shayacuc allpaca, Diospaclla chicanyachishcami— nirca. Shina nicpica, Josueca pai mandashcatami ruhuarca.