JOSUÉ 4 - Dios Rimashcata Quillcashcami

Jordán yacumanta chunga ishcai rumicunata apashcamanta

¹ Israelcuna Jordán yacuta pasacpi, Mandac Dios Josueta rimashpaca:

² «Chunga ishcai Israel aillucunamanta chunga ishcai runata acllai. Cada aillumanta shucta acllashpaca:

³ “Jordán yacu chaupipi chaquishca allpapi curacuna sarushca pushtumanta chunga ishcai rumita apanguichic. Chai rumicunataca cancuna cunan tuta maipimi pacaringuichic, chaipi shayachinguichic” nishpa mandai» nirca.

⁴ Shina nicpimi, Josueca Israel aillucunapuramanta pai acllashca chunga ishcai runacunata cayarca. Paicunaca cada aillumanta shucmi carca.

⁵ Josueca Paicunataca: «Cancunata Mandac Diospac Arca ñaupata rishpa, Jordán yacu chaupicaman richic. Chaimantaca cada Israel aillucunamanta acllashca chunga ishcai runacuna, cada shuc rumita marcashpa apaichic.

⁶ Chai rumicunami cancunapurapica shuc señal canga. Quipa punzhacunapi cancunapac churicuna: “¿Cai rumicunaca imatatac nisha nin?” nishpa tapucpica,

⁷ cancunaca: “Mandac Dios ari nishca quillcata huacaichina Arcata apashpa, Jordán yacuta pasagricpica, yacuca chaupirishpami ishcai ladoman saquirirca. Cai rumicunaca israelcunapac huahua huahuacunapac huiñaita yuyarinami can” ninguichic» nirca.

⁸ Israelcunaca Mandac Dios Josueta mandashca shinallatacmi chunga ishcai rumita aparcacuna. Cada Israel aillucunamanta acllashca chunga ishcai runacunami cada shuc rumita aparca. Chaitaca maipimi paicuna pacarina pushtupimi churarca.

⁹ Shinallatac Josuepish, Jordán yacu chaupipimi Dios ari nishca quillcata huacaichina Arcata huandushpa ric curacuna shayacushca pushtupi chunga ishcai rumicunata shayachirca. Chai rumicunaca cunancamanmi chaillapitac can.

¹⁰ Arcata huandushpa ric curacunaca Josueta Mandac Dios mandashca shinallatacmi Moisés ima nishcata ningacaman Jordán yacu chaupipi shayacurca. Chai quipaca, israelcunaca utcami Jordán yacuta pasarca.

¹¹ Tucui israelcuna ña pasacpica, curacunapish paicunata catishpami Diospac Arcata apashpa pasarca.

¹² Moisés mandashca shinallatacmi Rubenpac, Gadpac aillupish, Manasespac chaupi aillupish macanacunata apashpa, caishuc israelcunapac ñaupata pasarca.

¹³ Macanacungapac allichirishca runacunaca chuscu chunga huaranga shinami macanacunata apashpa Jericó pueblo pambaman Mandac Diospac ñaupata pasarca.

¹⁴ Chai punzhami Mandac Diosca tucui israelcunapac ñaupapi Josuetaca jatunyachirca. Israelcunaca Moisesta cazushca shinallatac paitapish tucui causaipi cazurcacuna.

¹⁵ Chai quipami, Mandac Diosca Josuetaca:

¹⁶ «Ari nishca quillcata huacaichina Arcata huandushpa ric curacunata Jordán yacumanta llucshichun mandai» nirca.

¹⁷ Shina nicpimi, Josueca curacunataca: «Jordán yacumanta llucshichic» nirca.

¹⁸ Mandac Dios ari nishca quillcata huacaichina Arcata huandushpa ric curacuna Jordán yacu chaupimanta llucshishpa, paicunapac chaquicunapish chaquishcapi sarucpica, Jordán yacuca puntaman cashca shinallatacmi ladocunata tallirishpa ri callarirca.

¹⁹ Israelcunaca punta quilla, chunga punzhapimi Jordán yacuta pasashpa, Gilgal pueblo lado pambapi carpacunata shayachishpa tiyarirca. Gilgal puebloca Jericó pueblomantaca inti llucshina ladomanmi carca.

²⁰ Chaipimi Josueca Jordanmanta apamushca chunga ishcai rumicunata shayachirca.

²¹ Chashna shayachishpami, Josueca israelcunataca: «Quipa punzhacuna cancunapac churicuna: “¿Cai rumicunaca imatatac nisha nin?” nishpa tapucpica:

²² “Jordán yacu chaupitami israelcunaca chaquishca allpata pasarca.

²³ Mandac Diosca israelcuna pasachunmi Jordán yacutaca Puca Cuchata ima shinami chaquichirca, chashnallatac chaquichishpa pasachirca.

²⁴ Cai pachapi tucui causaccuna Mandac Diosca imatapish ruhuaclla cashcata yachachun, shinallatac cancunapish cancunata Mandac Diosta tucui causaipi manchashpa causachunmi chashna ruhuarca” ninguichic» nirca.