JOSUÉ 3 - Dios Rimashcata Quillcashcami

Israelcuna Jordán yacuta pasashcamanta

¹ Josueca cayandi tutamantami Sitim pambamanta tucui israelcunahuan, Jordán yacu ladoman chayarca. Chaipimi yacuta manarac pasashpa samarircacuna.

² Ña quimsa punzha quipami israelcunata quipa mandaccunaca carpacuna chaupiman rishpa,

³ israelcunataca: «Mandac Dios ari nishca quillcata huacaichina Arcata levita curacuna huandushpa ricpica, cancuna tiyacushcamanta catishpa ringuichic.

⁴ Shina catishpami, maita rinata yachanguichic. Cancunaca cai ñantaca mana rishcanguichicchu. Arcataca shuc kilómetro caruta catinguichic. Chaimanca ama cuchuyanguichicchu» nirca.

⁵ Josué israelcunata rimashpaca: «Chuyayashpa, Diospaclla tucuichic. Mandac Diosca cayami cancunaman sumaimanacunata ruhuagrin» nirca.

⁶ Quipata curacunata Josué rimashpaca: «Dios ari nishca quillcata huacaichina Arcata huandushpa, israelcunapac ñaupata richic» nirca. Shina nicpimi, Arcata huandushpa, israelcunapac ñaupata rircacuna.

⁷ Chashna nishca quipami Mandac Diosca Josuetaca: «Cunan punzhamanta pachami cantaca israelcunapac ñaupapi jatunyachigrini. Chashna ruhuacpimi, Moises-huan ima shinami carcani, chashnallatac canhuanpish, cashcata yachangacuna.

⁸ Ñuca ari nishca quillcata huacaichina Arcata huandushpa ric curacunataca: “Jordán yacu pataman chayashpa, chaipi shuyanguichic” ningui» nirca.

⁹ Josueca israelcunataca: «Cancunata Mandac Dios rimashcata uyangapac caiman cuchuyaichic.

¹⁰ Cancunaca caita ricushpami, causac Dios cancunapac chaupipi cashcataca yachanguichic. Paimi cunanca cananeocunatapish, heteocunatapish, heveocunatapish, ferezeocunatapish, gergeseocunatapish, amorreocunatapish, jebuseocunatapish cancunapac ñaupamanta llucchishpa cachanga.

¹¹ Tucui cai pachata Mandac Dios ari nishca quillcata huacaichina Arcaca cancunapac ñaupatami Jordán yacuta pasanga.

¹² Cunanca chunga ishcai Israel aillucunamanta chunga ishcai runacunata acllaichic. Cada aillumanta shucta acllaichic.

¹³ Tucui cai pachata Mandac Diospac Arcata huandushpa ric curacuna chaquita Jordán yacupi churacpica, chai yacuca chaupiringami. Jahuamanta shamuc yacuca pirca tucushpami saquiringa» nirca.

¹⁴ Israelcunaca Jordán yacuta pasangapac paicunapac carpa huasicunamanta llucshicpica, Dios ari nishca quillcata huacaichina Arcata huanduc curacunaca israelcunapac ñaupatami rirca.

¹⁵ (Chai yacuca cosecha punzhacunapica, patacamanmi jundac carca). Ashtahuanpish Diospac Arcata huanduccuna Jordán yacu pataman chayashpami, chai huandushpa ric curacuna chaquicunata apyacpica,

¹⁶ jahuamanta shamuc yacuca Saretán pueblo ladopi tiyac Adam pueblomanta ashtahuan carupimi tandarishpa saquirirca. Shinami Arabá cuchaman, Cachi Cuchaman ric yacuca chaupirishpa chaquirirca. Shina tucucpica, israelcunaca Jericó puebloman pasarcacunallami.

¹⁷ Ashtahuanpish Mandac Dios ari nishca quillcata huacaichina Arcata huandushpa ric curacunaca Jordán yacu chaupipimi chaquishca allpapi tucui gentecuna pasangacaman shayacurcacuna. Chashnami Jordán yacuca tucui israelcuna pasangacaman chaquishca carca.