JOSUÉ 23 - Dios Rimashcata Quillcashcami

Josué israelcunata rimashcamanta

¹ Mandac Dios israelcunata paicunapac muyundipi causac piñaccunamanta samachishca tauca huatacuna quipami, Josueca tauca huatayuc, ña yuyac cashpa,

² tucui israelcunata, paicunata pushac yuyaccunata, paicunata mandaccunata, juezcunata, quipa mandaccunatapish cayarca. Chashna cayashpaca: «Ñucaca tauca huatayuc, ña yuyacmi cani.

³ Cancunata Mandac Dios cancunamanta tucui cai llactacunapi causaccunata imata ruhuashcataca cancunallatacmi ricurcanguichic. Chaica, cancunata Mandac Diosmi cancunamanta chai llactacunapi causaccunahuanca macanacurca.

⁴ Riquichic, ña japishca llactacunatapish, mana japishca llactacunatapish suerteta ruhuashpami, cancunapac aillucunaman curcani. Inti llucshina lado Jordán yacumantaca inti tigrana ladoman cac mama cuchacamanmi curcani.

⁵ Cancunata Mandac Diosmi chai llactapi causaccunataca cancunapac ñaupamanta cancuna ricucucpi, llucchishpa shitanga. Chai allpataca cancunata Mandac Dios huillashca shinallatacmi cancunaman cunga.

⁶ Moisés mandashpa quillcashca libropi tucui nishcata cazushpa ruhuangapacca alli sinchi caichic. Chai mandashcacunamantaca alli ladomanpish, lluqui ladomanpish ama ladoyanguichicchu.

⁷ Chai llactapi saquirishpa, cancunapac chaupipi causaccunahuanca ama tandanacunguichicchu. Paicunapac dioscunapac shutipi ama imatapish ari ninguichicchu. Paicunapac shutitaca ama rimanguichicchu. Chai dioscunata ama servinguichicchu. Ama paicunapac ñaupapi cumuringuichicchu.

⁸ Cunancaman caticushca shinallatac cancunata Mandac Diosllatac catinguichic.

⁹ Mandac Diosmi mai jatun sinchi llactacunatapish cancunapac ñaupamanta llucchishpa cacharca. Cunan punzhacamanca cancunahuanca maijan llactapish mana macanacui pudishcachu.

¹⁰ Cancunapuramantaca shuc runallami huaranga runata callpachinga. Cancunata Mandac Diosca pai pactachishami nishca shinallatacmi cancunamanta macanacunga.

¹¹ Chaimanta cancunallatac allita cuidarichic. Cancunata Mandac Diosta cuyangapac sinchiyashpa, tucui almahuan cazuichic.

¹² Diosmanta anchurishpa, chai saquirishca cancunapac chaupipi causac gentecunahuan tandanacushpa, chai huarmicunahuan cazarashpa, paicunahuan familia tucucpica,

¹³ cancunata Mandac Diosca chai llactapi causaccunataca cancunapac ñaupamanta mana ashtahuan llucchishpa cachanataca yachanami canguichic. Ashtahuanpish paicunaca cancunapacca tuclla shina mitcachic, cancunapac lomopi huactana angu shina, ñahuipi yaicushca casha shinami canga. Chashnami cancunata Mandac Dios cancunaman cushca sumac llactapi cancuna tucuringacaman chashna canga.

¹⁴ Riquichic, ñucaca cai pachapi tucui causaccuna rina ñanta japishpa, ña rinallami cani. Cancunata Mandac Diosca pai sumacta ruhuashpa ricuchisha nishcataca shucllatapish mana saquishpami tucuita pactachishca. Pai shina nishcataca tucui pactachishcamantami tucui shunguhuan, tucui almahuan pagui nina canguichic. Tucuitami cancunamanca pactachishca.

¹⁵ Imatapish mana saquishpami, cancunata Mandac Diosca cancunaman tucui allita pactachishca. Chashnallatacmi cancunata Mandac Dios cushca allpamanta tucuchingacaman paipac mana alli nishcacunapish pactanga.

¹⁶ Cancunata Mandac Dios-huan ari nishcacunata mana cazushpa, shuctac ruhuashcalla dioscunata servishpa cumuricpica, Mandac Diosca nina japiric shinami cancunahuanca piñaringa. Chashna piñaricpica, pai cushca sumac allpapica utcami tucui tucuringuichic» nirca.