JOSUÉ 21 - Dios Rimashcata Quillcashcami

Levitacunapac pueblocunamanta

¹ Levitacunapac huasi ucupurata mandaccunami Eleazar curapacman, Nunpac churi Josuepacman, israelcunata pushaccunapacman shamurca.

² Canaán llactapi cac Silo pueblopi carpacunata shayachishpa causacucpi cuchuyashpa: «Mandac Diosca Moisestaca ñucanchic causana pueblocunataca animalcunata michina pambacunandi ñucanchicman cuchunmi mandarca» nirca.

³ Shina nicpimi, israelcunaca paicunapac llacta pueblocunata Mandac Dios mandashca shina, michina pambacunandi levitacunaman curca.

⁴ Punta suerteta ruhuashpaca, Cohatpac familiacunamanmi curca. Paicunaca Aarón curapac churi levitacunami carca. Paicunamanca Judá, Simeón, Benjamín aillucunapac llactacunamantami suerteta ruhuashpa chunga quimsa pueblota curca.

⁵ Cutin chai puchushca Cohatpac churicunamanca Efraín, Dan aillucunapac, Manasespac chaupi aillupac llactamantami chunga pueblocunata suerteta ruhuashpa curca.

⁶ Gersonpac churicunamanca Isacarpac, Aserpac, Neftalipac aillucunapac, Basán llactapi causac Manasespac chaupi aillupac llactamantami suerteta ruhuashpa, chunga quimsa pueblocunata curca.

⁷ Shinallatac Meraripac aillumanca paicuna mashna cashcata ricushpami Rubenpac, Gadpac, Zabulonpac aillucunapac llactacunamanta suerteta ruhuashpa, chunga ishcai pueblocunata curca.

⁸ Israelcunaca Mandac Dios Moisesta mandashca shinallatacmi suerteta ruhuashpa, levitacunamanca pueblo lado michina pambacunandi curca.

Cohatpac aillucunaman pueblocunata cushcamanta

⁹ Judapac, Simeonpac aillucunapac llactacunamantaca cai pueblocunatami levitacunaman curca.

¹⁰ Cai pueblocunatami Aaronpac churicunapuramanta Levipac churi Cohatpac aillumanca curca. Paicunamanca punta suerteta ruhuashcamantami cai pueblocunata curca.

¹¹ Judá aillupac urcupica Anacpac taitapac cashca Quiriat-arba nishca Hebrón pueblotami muyundi michina pambacunandi curca.

¹² Shina cacpipish, chai pueblo muyundi pambataca uchilla llactacunandimi Jefonepac churi Calebman curca.

¹³ Aarón curapac churicunamanca huañuchishpa miticuna Hebrón pueblotami michina pambacunandi curcacuna. Shinallatac Libna pueblotapish michina pambacunandi,

¹⁴ Jatir, Estemoa pueblocunatapish michina pambacunandi,

¹⁵ Holón, Debir pueblocunatapish michina pambacunandi,

¹⁶ Aín, Juta shinallatac Bet-semes pueblocunatapish michina pambacunandimi curca. Chai ishcai aillucunapac llactamantaca iscun pueblocunatami curca.

¹⁷ Benjamín aillupac llactamantaca Gabaón, Geba pueblocunata michina pambacunandi,

¹⁸ Anatot, Almón pueblocunatami michina pambacunandi curca. Tucuica chuscu pueblocunatami curca.

¹⁹ Aarón curapac churicunaman cushca pueblocunaca chunga quimsa pueblocunatami michina pambacunandi curca.

²⁰ Cohatpac aillucunapuramanta saquirishca levitacunaman pueblocunata cungapac suerteta ruhuashpaca, Efraín aillupac llactamantami

²¹ Efraín urcupi tiyac Siquem pueblota michina pambacunandi curca. Shinallatac huañuchishpa miticuna pueblotapish curcami. Shinallatac Gezer pueblotapish michina pambacunandi,

²² Quibsaim, Bet-horón pueblotapish michina pambacunandimi curca. Tucuica chuscu pueblocunatami curca.

²³ Dan aillupac llactamantaca Elteque, Gibetón pueblocunatami michina pambacunandi,

²⁴ Agalón, Gat-rimón pueblocunatami michina pambacunandi curca. Tucuica chuscu pueblocunatami curca.

²⁵ Manasespac chaupi aillupac llactamantaca Taanac, Gat-rimón pueblocunatami michina pambacunandi curca. Tucuica ishcai pueblocunatami curca.

²⁶ Cohatpac churicunapac saquirishca ailluman cushca tucui pueblocunaca chunga pueblocunami michina pambacunandi carca.

Gersonpac familiaman pueblocunata cushcamanta

²⁷ Gersonpac churi levitacunamanca Manasespac chaupi aillupac Basán llactamantami Golán pueblota michina pambacunandi curca. Shinallatac huañuchishpa miticuna pueblotapish curcami. Beestera pueblotapish michina pambacunandimi curca.

²⁸ Isacar aillupac llactamantaca Cisón, Daberat pueblocunata michina pambacunandi,

²⁹ Jarmut, En-ganim pueblocunatami michina pambacunandi curca. Tucuica chuscu pueblocunatami curca.

³⁰ Aser aillupac llactamantaca Miseal, Abdón pueblocunata michina pambacunandi,

³¹ Helcat, Rehob pueblocunatami michina pambacunandi curca. Tucuica chuscu pueblocunatami curca.

³² Neftalí aillupac llactamantaca Galilea llactapi cac Cedes pueblota, Hamot-dor pueblota, Cartán pueblotami michina pambacunandi curca. Tucuica quimsa pueblocunatami curca. Shinallatac huañuchishpa miticuna pueblotapish curcami.

³³ Gersonpac churicunaman michina pambacunandi cushca pueblocunaca chunga quimsami carca.

Merari familiaman pueblocunata cushcamanta

³⁴ Meraripac churi saquirishca levitacunamanca cai Zabulón aillupac llactamantami Jocneam, Carta pueblocunata michina pambacunandi,

³⁵ Dimna, Naalal pueblocunatami michina pambacunandi curca. Tucuica chuscu pueblocunatami curca.

³⁶ Rubén aillupac llactamantaca Beser, Jahaza pueblocunata michina pambacunandi,

³⁷ Cademot, Mefaat pueblocunatami michina pambacunandi curca. Tucuica chuscu pueblocunatami curca.

³⁸ Gad aillupac llactamantaca Galaadpi tiyac Ramot pueblota, huañuchishpa miticuna Mahanaim pueblota michina pambacunandi,

³⁹ Hesbón, Jaser pueblocunatami michina pambacunandi curca. Tucuica chuscu pueblocunatami curca.

⁴⁰ Meraripac churicunamanta saquirishca levitacunamanca chunga ishcai pueblotami suerteta ruhuashpa, paicuna mashna cashcata ricushpa curca.

⁴¹ Israelcunapac chaupipi levitacunapac pueblocuna michina pambacunandica chuscu chunga pusac pueblomi carca.

⁴² Chai pueblocunaca cada pueblomi muyundipi michina pambacunata charirca. Chashnami tucui pueblo carca.

Israelcuna, paicunapac allpacunapi causai callarishcamanta

⁴³ Shinami Mandac Diosca ñaupa taitacunaman cusha nishpa ari nishca llactataca israelcunaman curca. Chai tucui llactatami paicuna causachun curca.

⁴⁴ Mandac Diosca ñaupa taitacunaman ari nishca shinallatacmi tucui chai llacta muyundipi cushilla causaita curca. Shinami tucui israelcunata piñaccunaca maijanpish macanacungapac mana shayarirca. Chai piñaccunataca Mandac Diosmi tucui israelcunapac maquipi churarca.

⁴⁵ Mandac Dios israelcunaman allita ruhuasha nishcataca shuc rimaillatapish mana saquishpami tucui pactachirca.