JOSUÉ 2 - Dios Rimashcata Quillcashcami

Jericó llactata ricuchun cachashcamanta

¹ Nunpac churi Josué ishcai runata Sitim pambamanta pacalla ricumuchun cachashpaca: «Chai llactatapish, Jericó pueblotapish imalaya cashcata allita ricumugrichic» nirca. Paicuna rishpaca, huainayashpalla causac Rahab huarmipac huasiman chayashpami, chaipi pacarirca.

² Chaita Jericó llactata mandacman maijancuna huillashpaca: —Israelcunapuramanta maijan runacunami cunan tuta cai llactata pacalla ricungapac shamushca— nishpa huillarca.

³ Chashna huillacpimi, Jericó llactata jatun mandacca Rahab huarmipacman huillacta cachashpaca: —Cambac huasiman shamushca runacunata llucchishpa cachai. Paicunaca tucui cai llactata ricungapacmi shamushca— nichun cacharca.

⁴ Ashtahuanpish, chai runacunata chasquishpa, pacashpa charicuc huarmica: —Ari, ñuca huasiman shamurcacunami. Paicuna maimanta cashcataca, mana yacharcanichu.

⁵ Ña tuta cacpi, cai pueblo pungu huichcarigricpimi, chai runacunaca llucshishpa rircacuna. Paicuna maiman rishcatapish, mana yachanichu. Paicunata utca catishpa richic, japinguichicmi— nirca.

⁶ Ashtahuanpish chai runacunataca huasi jahuaman huichicuchishpami, lino chaquichishca ucupi pacarca.

⁷ Chai catic runacunaca Jordán yacuman rina ñanta catishpami, chai yacu ladocaman rircacuna. Chai caticcuna llucshincami chai punguca huichcarirca.

⁸ Rahab huarmica chai pacashca runacuna manarac sueñucpimi, huasi jahuaman huichicushpa paicunataca:

⁹ —Mandac Dios cai llactata cancunaman cushcataca yachanimi. Chaimantami paica cancunata manchachun, manchaita shungupi churashca. Tucui llactapi causaccunami cancunataca yallita manchaihuan chucchushpa, imatapish mana ruhuai pudincuna.

¹⁰ Cancuna Egiptomanta llucshicucpi, cancuna pasachun, Puca Cuchata Mandac Dios chaquichishcata, shinallatac Jordán yacu chimba ladopi causac amorreocunata jatun mandac Sehontapish, Ogtapish imata ruhuashcataca yachanchicmi. Paicunata tucui tucuchishcata uyarcanchicmi.

¹¹ Chaita uyashpaca, ñucanchic shunguca yallita shaicushca shinami tucurca. Cancunata manchashpami, tucui gentecuna ima cushicuitapish, mana charincuna. Cancunata Mandac Diosca jahua pachapipish, cai pachapipish Diosmi.

¹² Cunanca, ñuca taitapac familiata mana llaquichingapac Mandac Diospac shutipi ari ni. Ñuca cancunata llaquishpa cuidashca shinallatac ñucanchictapish, llaquishpa cuidanguichic. Chaita pactachingapacca, shuc señalta ricuchichicyari.

¹³ Ñuca taitatapish, ñuca mamatapish, ñuca turicunatapish, ñuca ñañacunatapish ama huañuchinguichicchu. Tucui ñucanchicta causacta saquinguinchicyari— nirca.

¹⁴ Shina nicpimi, chai runacunaca: —Cancuna ñucanchicmanta mana huillashpa, upalla cacpica, ñucanchicca causashunmi, shinallatac cancunapish causanguichicmi. Cai llactata ñucanchicman Mandac Dios cucpica, ñucanchicpish cancunata llaquishpa, mana huañuchishunchu. Chaitaca pactachishuntacmi— nirca.

¹⁵ Shina nicpimi, chai huarmica huascahuan huatashpa, ventanata uricuchirca. Chai huasica pueblo muyundi jatun pirca jahuapimi carca.

¹⁶ Chashna uricuchishpaca: —Mashcashpa caticcuna cancunahuan ama tupachunca, urcuman richic. Cancunata caticcuna cutimungacaman quimsa punzhata chaipi miticugrichic. Chai quipaca, cancunapac ñanta catishpa ringuichicllami— nirca.

¹⁷ Shina nicpimi, chai runacunaca: —Ñucanchic canta mana llaquichingapac ñucanchic ari nishca pactachunca,

¹⁸ cai llactaman ñucanchic yaicumucpi, ñucanchicta uricuchishca ventanallapitac cai puca huascata huarcuchingui. Shinallatac cambac taitatapish, mamatapish, turicunatapish, cambac taitapac tucui familiacunatapish, cambac huasipi tandachingui.

¹⁹ Chai huasimanta maijanpish llucshishpa huañushpaca, paillatacmi juchayuc canga. Maijanpish cambac huasiman yaicushpa huañuchicpica, chai huañushcamantaca ñucanchicmi juchayuc cashun.

²⁰ Shinallatac ñucanchicmanta can huillacpipish, ñucanchic ari nishcaca yangallami saquiringa— nirca.

²¹ Shina nicpimi, chai huarmica: —Cancuna nishca shinallatacmi pactachisha— nirca. Caya minchacaman nicpimi, chai runacunaca rircacunalla. Chai quipami, chai huarmica puca huascata ventanapi huarcuchirca.

²² Paicuna chaimanta rishpaca, urcuman chayashpami, caticcuna cutingacaman quimsa punzhata miticushpa carcacuna. Paicunata caticcunaca tucui ñancunata mashcashpapish, mana tarircacunachu.

²³ Chai ishcai runacunaca urcumanta cutin urai shamushpami, Jordán yacuta pasarca. Nunpac churi Josuepacman chayashpaca, paicuna ima tucushcata imata ricushcatami parlarcacuna.

²⁴ Paicunaca Josuetaca: —Mandac Diosca chai tucui llactatami ñucanchic maquipi churashca. Chai llactapi causaccunaca tucuimi manchashpa chucchucuncuna— nirca.