JOSUÉ 19 - Dios Rimashcata Quillcashcami

Simeonpac aillucunapac allpamanta

¹ Allpata cungapac ishcainiqui suerteta ruhuacpica, Simeón aillumi mashna cashca shinallatac Judá aillupac chaupipi japirca.

² Paicuna japishca pueblocunaca: Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot, shinallatac Saruhén pueblocunami carca. Tucuica chunga quimsa pueblocunami, muyundi uchilla llactacunandi carca.

⁷ Shinallatac Aín, Rimón, Eter shinallatac Asán pueblocunatapish japircami. Tucuica chuscu pueblocunami, muyundi uchilla llactacunandi carca.

⁸ Chai pueblocunataca muyundi uchilla llactacunandimi Simeón aillu mashna cashca shinallatac Ramat-neguev llactapi cac Baalat-beer pueblocaman allpata japirca.

⁹ Simeón ailluca Judá aillupac maijan allpatami japirca. Judá aillupacca yalli achcami carca. Chaimantami Simeonpac ailluca Judá aillupac llacta ucupi allpata japirca.

Zabulonpac aillucunapac allpamanta

¹⁰ Allpata cungapac quimsaniqui suerteta ruhuacpica, Zabulón aillumi japirca. Paicuna mashna cashca shinallatacmi ura ladomanca Sarid pueblocaman japirca.

¹¹ Cutin inti tigrana ladomanca Maralá pueblota huichai rishpa, Dabe-set pueblocaman, Jocneam pueblo chimba ladota ric jatun yacucamanmi carca.

¹² Sarid pueblomantaca inti llucshina ladoman muyushpami Quislot-tabor puebloman chayashpa, Jafía pueblocamanmi huichai ricurca.

¹³ Chaimantaca inti llucshina ladoman rishpami, Gat-hefer, Ita-cazím pueblota pasashpa, Nea pueblota muyushpa, Rimón pueblocaman carca.

¹⁴ Quipaca jahua ladota rishpa, Hanatón pueblota muyushpa, Jefteel pugru pambamanmi chayarca.

¹⁵ Shinallatac Catat, Naalal, Simrón, Idala, Belén pueblocunatami japirca. Tucuica chunga ishcai pueblocunami, muyundi uchilla llactacunandi japirca.

¹⁶ Chai pueblocunataca Zabulón aillumi paicuna mashna cashca shinallatac japirca. Chai pueblocunataca muyundi uchilla llactacunandimi japirca.

Isacarpac aillucunapac allpamanta

¹⁷ Allpata cungapac chuscuniqui suerteta ruhuacpica, Isacar, shinallatac paipac churicunami paicuna mashna cashca shinallatac allpata japirca.

¹⁸ Paicunapac pueblocunaca: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, Em-hada shinallatac Bet-pases pueblocunami carca.

²² Chai llactaca Tabor, Sahazima shinallatac Bet-semes pueblocunata pasashpami Jordán yacucaman carca. Tucuica chunga sucta pueblocunami, muyundi uchilla llactacunandi carca.

²³ Chai pueblocunataca Isacar aillumi paicuna mashna cashca shinallatac japirca. Chai pueblocunataca muyundi uchilla llactacunandimi japirca.

Aserpac aillucunapac allpamanta

²⁴ Allpata cungapac pichcaniqui suerteta ruhuacpica, Aser aillumi paicuna mashna cashca shinallatac allpata japirca.

²⁵ Paicunapac pueblocunaca: Helcat, Halí, Betén, Acsaf,

²⁶ Alamelec, Amad, Misealmi carca. Inti tigrana ladomanca Carmelo urcucaman, Sihor-libnat pueblocamanmi carca.

²⁷ Chaimanta inti llucshina ladoman cutishpa, Bet-dagón puebloman chayashpa, jahuamanca Zabulón llactahuan Jefteel pugru pambahuan tupanacuicaman carca. Chaimantaca Bet-emec, Neiel puebloman chayashpa, Cabul pueblo jahua ladocamanmi carca.

²⁸ Shinallatac Hebrón, Rehob, Hamón, Caná pueblocunata rishpa, jatun pueblo Sidoncamanmi carca.

²⁹ Chaimantaca Ramá pueblo ladoman cutishpa, muyundi pircashca Tiro pueblocamanmi carca. Chai pueblomantaca Hosa pueblota muyushpa, mama cuchacamanmi carca. Shinallatac Mahaleb, Aczib,

³⁰ Uma, Afec, Rehob pueblocunatapish japircami. Tucuica ishcai chunga ishcai pueblocunatami, muyundi uchilla llactacunandi japirca.

³¹ Chai pueblocunataca Aser aillumi paicuna mashna cashca shinallatac japirca. Chai pueblocunataca muyundi uchilla llactacunandimi japirca.

Neftalipac aillucunapac allpamanta

³² Allpata cungapac suctaniqui suerteta ruhuacpica, Neftalí aillumi paicuna mashna cashca shinallatac allpata japirca.

³³ Paicunapac llactaca: Helef, Alon-saananim, Adami-neceb shinallatac Jabneel pueblomantaca Lacum pueblota pasashpa, Jordán yacucamanmi llucshirca.

³⁴ Chaimantaca inti tigrana ladoman cutishpa, Aznot-tabor pueblomanmi muyucurca. Chaimantaca Hucoc pueblota rishpa, ura ladomanca Zabulonpac llactahuan, cutin inti tigrana ladomanca Aserpac llactahuanmi tupanacurca. Inti llucshina ladomanca Jordán yacuhuanmi tupanacurca.

³⁵ Muyundita pircashca pueblocunaca: Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat, Bet-semesmi carca. Tucuica chunga iscun pueblocunami, muyundi uchilla llactacunandi paicunapac carca.

³⁹ Chai pueblocunataca Neftalipac aillucunami paicuna mashna cashca shinallatac japirca. Chai pueblocunataca muyundi uchilla llactacunandimi japirca.

Danpac aillucunapac allpamanta

⁴⁰ Allpata cungapac canchisniqui suerteta ruhuacpica, Dan aillumi paicuna mashna cashca shinallatac allpata japirca.

⁴¹ Paicunapac pueblocunaca Zora, Estaol, Ir-semes,

⁴² Saalabín, Ajalón, Jetlat,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Benei-berac, Gat-rimón,

⁴⁶ Mejarcón, Racón pueblocunami carca. Shinallatac Jope pueblo chimba lado llactacunandimi carca.

⁴⁷ Danpac aillumanca allpaca mana pactarcachu. Chaimantami paicunaca Lesem puebloman huichai rishpa, chaipi causaccunahuan macanacurca. Chashnami paicunaca espadahuan huañuchishpa, chai llactata japishpa, chaipi causarca. Paicunapac ñaupa taita Dan cashcamantami chai Lesem pueblotaca Danta shutichirca.

⁴⁸ Chai pueblocunataca Danpac churicunami paicuna mashna cashca shinallatac japirca. Chai pueblocunataca muyundi uchilla llactacunandimi japirca.

Josueman allpata cushcamanta

⁴⁹ Israelcuna cai allpata chaupishpa cushca quipaca Nunpac churi Josuemanmi paipac chaupillapitac allpata curca.

⁵⁰ Josuemanca Mandac Dios mandashca shinami pai mañashca Efraín urcu llactapi Timnat-sera pueblota curca. Chai pueblota cucpimi, cutin allichishpa, chaipi causarca.

⁵¹ Eleazar curapish, Nunpac churi Josuepish, huasi ucupurata pushaccunapish Mandac Diospac ñaupapi suerteta ruhuashpa, israelcunaman chaupishpa cushca allpaca chaicunami carca. Chaitaca Silo pueblopi Dios-huan tupana huasi pungupimi curca. Chashnami chai allpataca chaupishpa tucuchirca.