JOSUÉ 18 - Dios Rimashcata Quillcashcami

Puchushca allpata Josué chaupishpa cushcamanta

¹ Tucui tandanacushca israelcuna chai llactacunata japishca quipaca, Silo pueblopimi tandanacushpa, Dios-huan tupana huasita shayachirca.

² Shina cashpapish Israelpuramanta canchis aillumanca manarac allpata chaupishpa cushcachu carca.

³ Chaipimi Josueca israelcunataca: —Cancunapac ñaupa taitacunata Mandac Dios cushca allpataca, ¿ima horacamantac mana japishpa puricunguichic?

⁴ Llactacunaman rishpa, allpata ricugrichun, ñuca cachangapac cada aillucunamanta quimsa runacunata acllaichic. Paicuna rishpami tucui allpata purishpa, ima shina cashcata ñucaman huillanga. Ñucami paicuna mashna cashcata ricushpa, paicuna japichun cusha.

⁵ Chai allpataca canchis partepimi chaupinga. Judapac ailluca paicunapac ura lado llactallapitac saquirichun. Josepac ailluca jahua lado paicunapac llactallapitac saquirichun.

⁶ Cancunaca allpa ima shina cashcata ricushpa, canchis partepi chaupishpa ñucaman huillangapac shamunguichic. Chaitaca ñucanchicta Mandac Diospac ñaupapi suerteta ruhuashpami cancunaman cusha.

⁷ Ashtahuanpish levitacunaca mana japingachu. Paicuna japinaca Mandac Diospaclla cura canami. Rubenpac, Gadpac aillucunapish, Manasespac chaupi aillupish Jordán yacumanta inti llucshina ladopi cac allpatami ña japirca. Chai allpataca Mandac Diosta servic Moisesmi curca— nirca.

⁸ Shina nicpimi, chai runacunaca jatarishpa, allpacuna ima shina cashcata ricungapac rirca. Shina ricungapac ricucpimi Josueca: —Chai llactaman rishpa, alli ricushpa ñucapacman cutinguichic. Ñucami Silo pueblopi Mandac Diospac ñaupapi suerteta ruhuashpa cusha— nirca.

⁹ Shina nicpimi, chai runacunaca tucui llactata purishpa, ima shina cashcata ricushpa canchis, partepi chaupishpa, chaipi tiyac pueblocunapac shuticunandi shuc carapi dibujarca. Shina ruhuashpaca Josuepacmanmi Silo pueblopi cac carpa huasicunaman cutirca.

¹⁰ Silo pueblopimi Josueca Mandac Diospac ñaupapi suerteta ruhuashpa, allpata chaupishpa israelcunaman curca.

Benjaminpac allpamanta

¹¹ Benjamín ailluman paicuna mashna cashcata ricushpa, suerteta ruhuashpa, cushca allpaca Judá aillupac llactahuan Josepac churicunapac llactahuan tupanacuipimi carca.

¹² Paicunapac allpaca jahua ladomanca Jordán yacumanta callarishpa Jericó pueblo jahua ladocamanmi carca. Chaimantaca inti tigrana ladomanca urcu ladota huichai rishpami Bet-avén shitashca pambacaman carca.

¹³ Chaimantaca Bet-el nishca Luz pueblo ura ladota rishpa, Atarot-adar pueblo ura ladoman tiyac urcumanmi carca. Chai urcupi tiyac Bet-horón pueblo ura ladocamanmi.

¹⁴ Chaimantaca Bet-orón pueblo chimba ladopi cac urcu ura ladotami inti tigrana ladoman muyushpa, Judá aillupac pueblo Quiriat-jearim nishca Quiriat-baal puebloman llucshirca. Chaimi inti tigrana lado linderoca.

¹⁵ Ura ladomanca Quiriat-jearim pueblo esquinamanta callarishpa, inti tigrana ladoman rishpa, Neftoa jundu ladomanmi llucshirca.

¹⁶ Chai linderoca Ben-hinompac churipac pugru pamba chimba ladopi cac urcu chaquicamanmi carca. Chai urcuca Refaim pugru pamba jahua ladocamanmi. Chaimantaca Ben-hinom pugru pambata urai rishpa, jebuseocuna causana ura lado quingraita rishpa, En-rogel jundu yacucamanmi carca.

¹⁷ Chaimantaca jahua ladoman catishpami, En-semes puebloman muyushpa, Adumim huichai rina ñan chimba ladopi cac Gelgal puebloman chayashpa, Rubenpac churi Bohanpac rumicaman carca.

¹⁸ Chaimantaca Bet-haarabá chimba pamba ladomantami Arabá pambaman llucshirca.

¹⁹ Chaimantaca Bet-hogla pueblo jahua ladota rishpa, Jordán yacumanmi llucshicurca. Shina rishpami Cachi Cucha esquinapi tucurirca. Chaimi ura lado linderoca carca.

²⁰ Inti llucshina ladomanca Jordán yacumi lindero carca. Caimi Benjamín ailluman paicuna mashna cashcata ricushpa cushca allpacunapish, muyundi linderopish carca.

²¹ Benjamín ailluman paicuna mashna cashcata ricushpa cushca pueblocunaca caicunami: Jericó, Bet-hogla, Emec-casis,

²² Bet-haarabá, Zemaraim, Bet-el,

²³ Avim, Pará, Ofra,

²⁴ Quefar-haamoní, Ofni shinallatac Gebami carca. Tucuica chunga ishcai pueblocunami, muyundi uchilla llactacunandi carca.

²⁵ Shinallatac Gabaón, Ramá, Beerot,

²⁶ Mizpa, Cafira, Mozah,

²⁷ Requem, Irpeel, Tarala,

²⁸ Zela, Elef, Jerusalén nishca Jebús, Gabaa, Quiriatmi carca. Tucuica chunga chuscu pueblocunami, muyundi uchilla llactacunandi carca. Benjaminpac churicunaman paicuna mashna cashcata ricushpa cushca allpaca chaicunami carca.