JOSUÉ 17 - Dios Rimashcata Quillcashcami

Manasespac llactamanta

¹ Manasesca Josepac punta churimi carca. Chaimantami Manasespac aillumanca suerteta ruhuashpa Galaad, Basán llactacunata curca. Manasespac punta churica Maquirmi carca. Paica Galaad llactapi causaccunapac taitami carca. Macanacunatapish allita yachacmi carca.

² Shinallatac Manasespac caishuc churicunamanpish paicunapac aillucuna mashna cashcata ricushpami suerteta ruhuashpa allpata curca. Manasespac churicunaca Abiezer, Helec, Ezriel, Siquem, Hefer, Semidami carca. Manasesca Josepac churimi carca.

³ Heferpac churi Zelofehadca mana churicunata charircachu. Ashtahuanpish ushicunatami charirca. Paicunaca Magla, Noa, Hogla, Milca, Tirsami carca. Heferca Galaadpac churimi carca. Galaadca Maquirpac churimi carca. Maquirca Manasespac churimi carca.

⁴ Chai ushicunami Eleazar curapacman, Nunpac churi Josuepacman, israelcunata pushaccunapacman rishpaca: «Mandac Diosca ñucanchic turicunaman cushca llactallapitac ñucanchicman allpa cuchunmi Moisestaca mandarca» nirca. Shina nicpimi, Josueca Mandac Dios mandashca shinallatac paicunapac taitacunapac huauquicunaman cushcallapitac allpata curca.

⁵ Chaimantami Manasespac churicunaca Jordán yacu chimba ladopi cac Galaad, Basaán llactacunata japishca jahua chunga pushtupi allpata japirca.

⁶ Manasés aillupac ushicunapish paicunapac turicunapurapimi allpata japina carca. Shina cacpipish, Galaad llactataca Manasespac caishuc churicunami japirca. Egipto runacunaca,

⁷ Manasés aillupac allpaca Aser pueblomantaca Siquem pueblo chimba ladopi cac Micmetat pueblocamanmi carca. Ura ladomanca Tapúa pueblopi causaccunapac ladocamanmi carca.

⁸ Tapúa pueblo lado allpaca Manasés aillupacmi carca. Manasespac llactahuan tupanacuipi cac Tapúa puebloca Efrainpac aillucunapacmi carca.

⁹ Chaimantaca Caná jatun yacucamanmi carca. Chai yacumanta inti llucshina ladomanca Efrainpac aillucunapacca pueblohuan Manasespac pueblohuan tupanacuitami carca. Manasés aillupac allpaca jatun yacumanta mama cuchacamanmi carca.

¹⁰ Efraín aillupac llactaca Caná yacumanta ura ladomanmi carca. Manasés aillupac llactaca chai yacumanta jahua ladomanmi carca. Chai llactacunaca mama cuchacamanmi carca. Jahuamanca Manasés aillupac llactahuan, cutin uramanca Aser aillupac llactahuanmi tupanacurca. Shinallatac inti llucshina ladomanca Isacar aillupac llactahuanmi tupanacurca.

¹¹ Manasespac ailluca Isacarpac, Aserpac aillucunapac llactapipish cai pueblocunata charircami. Chai pueblocunaca Bet-seán pueblo, Ibleam pueblo uchilla llactacunandimi carca. Dor pueblopi causaccunapish uchilla llactacunandi, Endor pueblopish uchilla llactacunandi, Taanac pueblopi causaccunapish uchilla llactacunandi, Meguido pueblopi causaccunapish uchilla llactacunandimi paipac carca. Quimsaniqui llactaca Nafotmi carca.

¹² Ashtahuanpish Manasespac churicunaca chai pueblopi causac cananeocunataca mana llucchishpa cachai pudircachu. Chaimantami cananeocunaca chai llactamanta mana llucshishpa, chaipi causarca.

¹³ Shina cacpipish, israelcunaca ashtahuan sinchi tucushpami, cananeocunataca impuestota pagachishpa causarca. Chai llactamantaca mana tucui llucchishpa cacharcachu.

¹⁴ Chai quipaca Josepac churicunaca Josuetaca: —Ñucanchicca Dios bendiciacpimi, cunancamanca achca canchic. ¿Chashna cashca jahuachu ñucanchicmanca shuc suertellata ruhuashpa, shuc parte allpallata cungui?— nirca.

¹⁵ Shina nicpimi Josueca: —Cancuna achca cashpa, Efraín urcucunata mana pactachishpaca ferezeocunapac, refaitacunapac llactaman rishpa, sachacunata anchuchishpa, cancunapac allpata ruhuaichic— nirca.

¹⁶ Shina nicpimi, Josepac churicunaca: —Chai urcu allpaca ñucanchicmanca mana pactangachu. Chaipac jahuapica, chai pambapi causac cananeocunapish, Bet-seán pueblopi causaccunapish, chai muyundi uchilla llactacunapi causaccunapish, Jezreel pambapi causaccunapish fierromanta ruhuashca carretacunatami charincuna— nirca.

¹⁷ Chaimantami Josueca Josepac churi Efrainpac, Manasespac aillucunataca: —Cancunaca achcami canguichic. Shinallatac sinchicunami canguichic. Chaimanta mana ashalla allpallatachu japinguichic,

¹⁸ ashtahuanpish tucui sacha allpatami japinguichic. Chai allpamantaca cancunami sachacunataca anchuchinguichic. Cancunapac allpa linderoca achca carutami canga. Cananeocuna fierromanta ruhuashca carretacunata charicpipish, paicuna sinchi cacpipish, llucchishpami cachanguichic— nirca.