JOSUÉ 16 - Dios Rimashcata Quillcashcami

Efrainpac, Manasespac llactacunamanta

¹ Josepac churicunaman suerteta ruhuashpa, allpata cushcaca inti llucshina ladomanca Jericó pueblo lado Jordán yacumantaca Jericó yacuta catishpa, chai pueblo lado shitashca pambata urcu ladoman huichai rishpa, Bet-el pueblocamanmi carca.

² Bet-el pueblomantaca Luz pueblota, arquitacunapac llactata rishpa, Atarot pueblocamanmi carca.

³ Chaimantaca inti tigrana ladoman rishpaca, jafletitacunapac llactata pasashpa, Bet-horoncaman, Gezer pueblocamanmi carca. Chaimantaca mama cuchacamanmi carca.

⁴ Chashnami Josepac churicuna Manasespish, Efrainpish cai allpata japirca.

⁵ Efrainpac aillucuna mashna cashcata ricushpa, cushca llactacunaca inti llucshina ladomanca Atarot-adar pueblomanta Bet-horón pueblocamanmi carca.

⁶ Chai linderoca mama cucha jahua ladopi tiyac Micmetat pueblocaman chayashpa, chaimantaca inti llucshina ladota muyushpami Taanat-silo pueblocaman carca. Chaimantaca Janoa pueblocamanmi carca.

⁷ Janoa pueblomantaca Atarot, Naarat pueblo ladoman rishpami Jericó pueblo tupanacui Jordán yacucaman carca.

⁸ Tapúa pueblomantaca inti tigrana ladota rishpa, Caná jatun yacuta pasashpa, mama cuchacamanmi carca. Cai allpami Efrainpac ailluman paicuna mashna churicuna cashcata ricushpa cushca carca.

⁹ Shinallatac Manasespac ailluman cushca llacta chaupipipish, Efrainpac ailluman chicanyachishca maijan pueblocunapish, muyundi uchilla llactacunandimi carca.

¹⁰ Shina cacpipish, Efrainpac ailluca Gezer pueblopi causac cananeocunataca mana llucchishpa cacharcachu. Chaimantami cananeocunaca impuestota cushpa cunancaman paicunapac chaupipi causancuna.