JOSUÉ 15 - Dios Rimashcata Quillcashcami

Judapac allpamanta

¹ Judapac churicunamanpish paicuna mashna cashcata ricushpami suerteta ruhuashpa curca. Paicunaca Edom llactacaman, shitashca pamba Zincamanmi inti llucshina ladoman japirca.

² Chai ura lado linderoca Cachi Cucha chaquimanta callarishpa,

³ Acrabim quingraita pasashpa, shitashca pamba Zincamanmi carca. Ura ladomantaca Cades-barnea pueblota huichai rishpa, Hezrón pueblota pasashpa, Adar pueblota huichai catishpa, Carca pueblotami muyucurca.

⁴ Chaimantaca Asmón pueblota pasashpa, Egipto jatun huaicu yacuta catishpa, mama cuchacamanmi carca. Ura lado linderoca caicunami carca.

⁵ Inti llucshina ladomanca Cachi Cuchata catishpa, Jordán yacu mama cucha tucuricamanmi carca. Jahua ladomanca Jordán yacu mama cuchapi tucuricuc pambamanta callarishpa,

⁶ Bet-hogla pueblota huichai rishpa, Bet-haarabá pueblotami pasacurca. Chaimantaca Rubenpac churi Bohanpac rumicamanmi huichai rirca.

⁷ Cutin Acor pugru pambamantaca Debir pueblocaman chayashpa, chaimanta huichaita rishpa, Adumim quingrai chimba ladopi cac Gilgal pueblota muyurca. Chashnami ura lado jatun yacu lado pambacaman carca. En-semes yacuta rishpami En-rogel junducaman carca.

⁸ Shinami Ben-hinompac churipac jatun pugru pambata huichai rishpa, jebuseocunapac urcu quingrai ura ladocaman carca. Hinompac churicunapac pamba ladopi cac Refaim pugru pamba jahua ladomanca urcu lomacamanmi huichai rirca.

⁹ Chai urcu lomamantaca Neftoa Yacu tucyacucman muyushpami Efrón urcu ladopi tiyac pueblocunata pasashpa, Quiriat-jeamir nishca Baala pueblota muyucurca.

¹⁰ Baala pueblomantaca inti tigrana ladoman tiyac Seir urcu ladomanmi muyucurca. Cutin jahua ladota rishpaca, Jearim urcuta rishpami Quesalón puebloman chayacurca. Chaimantaca Bet-semes puebloman urai rishpami Timna pueblocaman carca.

¹¹ Chaimantaca jahua ladota rishpaca, Ecrón pueblota rishpa, Sicrón pueblota, Baala urcuta muyushpami Jabneel pueblota pasashpa mama cuchaman chayarca.

¹² Inti tigrana lado linderoca mama cuchami. Judá ailluman paicuna mashna churicuna cashcata ricushpa cushca llactacunapac linderoca caicunami carca.

Caleb Hebrón, Debir pueblocunata japishcamanta

¹³ Jefonepac churi Calebmanca Mandac Dios Josueta mandashca shinallatacmi Judapac churicuna japishca llactapi allpata curca. Anacpac taitapac Quiriat-arba pueblotami curca. Chai puebloca cunanca Hebrón shutimi.

¹⁴ Calebmi Anacpac churi Sesai, Ahimán, Talmai quimsa churicunata chai llactamanta llucchishpa cacharca.

¹⁵ Chaimantaca Debir pueblopi causaccunahuan macanacungapacmi huichai rirca. Chai Debir puebloca puntaca Quiriat-sefer shutimi carca.

¹⁶ Chaipimi Calebca: —Maijanpish Quiriat-sefer puebloman yaicushpa, chaipi causaccunata atishpa, chai pueblota japicpica, ñuca ushi Acsatami cachun cusha— nirca.

¹⁷ Chai llactataca Cenazpac churi Calebpac sobrino Otonielmi japirca. Chaimantami Calebca paipac ushi Acsata Otonielman curca.

¹⁸ Paipac huarmita ña pushashpa ricushpami, paipac taitaman tarpuna allpata mañachun nirca. Chaimantami chai huarmica burro jahuamanta uricurca. Chashna ricucpimi Calebca: —¿Imatac tucungui?— nirca.

¹⁹ Shina nicpimi paica: —Ñuca mañashcata uyaiyari. Neguev allpata cushpaca yacu allpatapish cuiyari— nirca. Shina nicpimi, Calebca jundu yacu tiyac allpata uramanpish, jahuamanpish curca.

Judá aillucunapac pueblocunamanta

²⁰ Judá ailluman paicuna mashna aillu cashcata ricushpa cushca llactacunaca caicunami.

²¹ Judá aillupac ura Edom llactacaman, ura ladoman cac pueblocunaca caicunami: Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-hadata, Queriot, Hezrón nishca Hazor,

²⁶ Amam, Sema, Molada,

²⁷ Hazar-gada, Hesmón, Bet-pelet,

²⁸ Hazar-sual, Beersaba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín shinallatac Rimón pueblocunami carca. Tucuica ishcai chunga iscun pueblocunami, muyundi uchilla llactacunandi carca.

³³ Sefela jatun pambapi tiyac pueblocunaca Estaol, Zora, Asena,

³⁴ Zanoa, En-ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera, shinallatac Gederotaim pueblocunami carca. Tucuica chunga chuscu pueblocunami muyundi uchilla llactacunandi carca.

³⁷ Shinallatac Zenán, Hadasa, Migdal-gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-dagón, Naama shinallatac Maceda pueblocunami carca. Chunga sucta pueblocunami muyundi uchilla llactacunandi carca.

⁴² Shinallatac Libna, Eter, Asán,

⁴³ Jifta, Asena, Nezib,

⁴⁴ Keila, Aczib, Maresa pueblocunami carca. Iscun pueblocunami muyundi uchilla llactacunandi carca.

⁴⁵ Ecrón pueblocunapish, muyundipi tiyac huasicunapish, uchilla llactacunapishmi carca.

⁴⁶ Ecrón pueblomanta mama cuchacaman, Asdod pueblo muyundi huasicunapish, uchilla llactacunapishmi carca.

⁴⁷ Shinallatac Asdod pueblopish, muyundipi tiyac huasicunapish, uchilla llactacunapishmi carca. Gaza pueblopish muyundipi tiyac huasicunapish, uchilla llactacunapishmi carca. Chai pueblocunaca Egipto llacta jatun yacucaman shinallatac mama cucha patacunacamanmi carca.

⁴⁸ Urcucunapica: Samir, Jatir, Soco,

⁴⁹ Dana, Debir nishca Quiriat-sana,

⁵⁰ Anab, Estemoa, Anim,

⁵¹ Gosén, Holón shinallatac Gilo pueblocunami carca. Chunga shuc pueblomi, muyundi uchilla llactacunandi carca.

⁵² Shinallatac Arab, Duma, Esán,

⁵³ Janum, Bet-tapúaj, Afeca,

⁵⁴ Humta, Hebrón nishca Quiriat-arba shinallatac Sior pueblocunami carca. Iscun pueblocunami, muyundi uchilla llactacunandi carca.

⁵⁵ Shinallatac Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa shinallatac Timna pueblocunami carca. Chunga pueblocunami, muyundi uchilla llactacunandi carca.

⁵⁸ Shinallatac Jalhul, Bet-sur, Gedor,

⁵⁹ Maarat, Bet-anot shinallatac Eltecón pueblocunami carca. Sucta pueblocunami, muyundi uchilla llactacunandi carca.

⁶⁰ Shinallatac Quiriat-jearim nishca Quiriat-baal shinallatac Rabá pueblocunami carca. Ishcai pueblocunami muyundi uchilla llactacunandi carca.

⁶¹ Cutin shitashca pambapica, Bet-aarabá, Midín, Secaca,

⁶² Nibsán, Cachi pueblo shinallatac En-guedi pueblocunami carca. Sucta pueblocunami, muyundi uchilla llactacunandi carca.

⁶³ Ashtahuanpish Judapac churicunaca Jerusalenpi causac jebuseocunataca mana llucchishpa cachai pudircachu. Chaimantami jebuseocunaca Judá ailluhuan cunancaman chaillapitac causan.