JOSUÉ 14 - Dios Rimashcata Quillcashcami

Canaán llactata suerteta ruhuashpa japishcamanta

¹ Canaán llactapica cai allpatami israelcunaca japirca. Cai allpataca Eleazar cura, Nunpac churi Josué, Israel aillucunapac huasi ucupurata pushaccunami chaupishpa curca.

² Chai allpataca Mandac Dios Moisesta mandashca shinallatacmi iscun aillucunamanpish, Manasespac chaupi aillumanpish suerteta ruhuashpa curca.

³ Rubenpac, Gadpac cai ishcai aillumanpish, Manasespac chaupi aillumanpish ñami Moisés Jordán yacu chimba ladopi tiyac allpata cushca carca. Shina cashpapish levitacunamanca mana curcachu.

⁴ Josepac churicunamantaca ishcai aillucunami tucurca. Chaica Manasés, Efraín aillucunami carca. Levitacunamanca allpata mana curcachu, ashtahuanpish paicuna causachunca pueblo ladocunapi huagracunata, ovejacunata michichunmi asha allpata curca.

⁵ Mandac Dios Moisesta mandashca shinami, israelcunaca allpata chaupinacurca.

Calebman Hebrón pueblota cushcamanta

⁶ Judapac churicunami Gilgal pueblopi Josuehuan parlangapac rirca. Chashna rishpami genezeocunapuramanta Jefonepac churi Calebca: —Cades-barnea pueblopi canmantapish, ñucamantapish Mandac Dios paita servic Moisesta imata nishcataca canllatac yachanguimi.

⁷ Llactata ricushpa cutichun, Mandac Diosta servic Moisés Cades-barnea pueblomanta ñucata cachai punzhapica chuscu chunga huatatami charircani. Chai llactata ricushpa cutishpaca, ñuca shungupi ima shina yuyashcatami huillarcani.

⁸ Ashtahuanpish ñucahuan huichai ric huauquicunaca israelcunamanca manchai shungutami curca. Shina cacpipish, ñucaca ñucata Mandac Dios imata nishcatami tucui shunguhuan cazurcani.

⁹ Chai punzhapi Moisés ari nishpaca: “Ñucata Mandac Diosta tucui shunguhuan cazushcamantaca maipimi cambac chaqui sarun, chai allpaca cambacpish, cambac cati churicunapacpishmi tucui causaipac canga” nirca.

¹⁰ Riqui, cunanca Mandac Diosmi pai nishca shinallatac cunancaman causaita cushca. Shitashca pambapi israelcuna puricui punzhacunapi Mandac Diosca Moisesta chashna nishca punzhamanta cunancamanca chuscu chunga pichca huatacunami tucushca. Riqui, cunanca pusac chunga pichca huatatami charini.

¹¹ Shina cashpapish Moisés chai llactata ñucata ricuchun cachacui punzhacunapi cashca shinallatacmi sinchirac cani. Macanacungapac llucshingapacpish, yaicungapacpish chai punzhacunapi shinallatacmi cunanpish sinchirac cani.

¹² Chai punzhapi Mandac Dios nishca shinallatac chai urcucunataca ñucaman cuiyari. Chai punzhacunapica canllatacmi chai llactapi anaquitacuna causashcata, pueblocunapish muyundi pircashca cashcata, jatun pueblocuna cashcatapish uyarcangui. ¡Shina cacpipish, Mandac Dios nishca shina, pai ñucahuan cashcamantaca chai runacunataca chai pueblocunamanta llucchishpa cachashallami!— nirca.

¹³ Shina nicpimi, Josueca Jefonepac churi Calebta bendiciashpa, Hebrón pueblota curca.

¹⁴ Chaimantami Hebrón puebloca cenezeopura Jefonepac churi Calebpac cunan punzhacaman can. Paica israelcunata Mandac Diosta tucui shunguhuan allita catishcamantami chai pueblota paiman curca.

¹⁵ Hebrón pueblopi utca huatapica anaquitapuramanta mai jatun Arbami causarca. Chaimantami utca huatapica chai puebloca Quiriat-arba shuti carca. Shinami chai llactapi mana macanacui tiyacpi samarirca.