JOSUÉ 13 - Dios Rimashcata Quillcashcami

Josué japigricuc llactamanta

¹ Josueca achca huatayuc, ña yuyac cacpimi, Mandac Diosca: «Canca ña unai huatacunata causashpa, ña yuyacmi cangui. Shina cacpipish, achca llactacuna japina tiyanracmi.

² Cai llactacunami tiyanrac: Filisteocuna causana, gesurcuna causana tucui llactacuna,

³ Egiptomanta inti llucshina ladoman cac Sihor yacumanta jahua Ecrón pueblocamanmi tiyanrac. Chai allpaca, cananeocunapacmi nincuna. Gaza, Asdod, Ascalón, Gat, Ecrón pueblocunami tiyanrac. Aveocunapac llactapish tiyanracmi.

⁴ Cutin ura ladomanca cananeocunapac tucui llactacuna, sidoniocunapac llactacunaca Ara pueblomanta amorreocunapac ladopi cac Afec pueblocamanmi tiyanrac.

⁵ Shinallatac giblitascunapac llactapish, inti llucshina ladoman cac Líbano tucui llactapish tiyanracmi. Hermón urcu chaquipi tiyac Baal-gad pueblomanta Lebo-hamat pueblocamanmi tiyanrac.

⁶ Tucui urcu ladopi cac llactacunapish, Libanomanta Misrefot-maim pueblocaman, shinallatac tucui Sidón llactacunami japina tiyanrac. Tucui chai gentecunataca ñucami israelcunapac ñaupamanta llucchishpa cachasha. Canca chai llactacunataca ima shina ñuca mandashca shinallatac suerteta ruhuashpa, israelcunaman chaupishpa cungui.

⁷ Cunanca, cai allpataca iscun aillucunaman, shinallatac Manasespac chaupi ailluman chaupishpa cungui» nirca.

⁸ Ashtahuanpish Rubenpac, Gadpac aillucuna, shinallatac Manasespac chaupi ailluca ñami japirca. Paicunamanca Mandac Diosta servic Moisesmi Jordán yacumanta inti llucshina ladoman tiyac llactacunata curca.

⁹ Arnón yacu patapi tiyac Aroer pueblomanta jatun pugru pamba chaupipi tiyac pueblo ladocaman, shinallatac tucui Medeba pueblo lado pambata Dibón pueblocaman,

¹⁰ shinallatac amorreocunata mandac Sehón Hesbón pueblota mandacushca tucui pueblocunataca Amón llacta linderocamanmi curca.

¹¹ Galaad llactatapish gesurcuna, maacateocuna causana llactatapish, Hermón urcutapish, shinallatac tucui Basán llactatapish Salca pueblocamanmi curca.

¹² Jatun mandac Og mandacuc Basán llactatapish curcami. Chai jatun mandacca Astarot, Edrei pueblotami mandac carca. Paica refaitapuramanta saquirishcami carca. Paicunatami Moisesca atishpa llucchishpa cacharca.

¹³ Shina cashpapish, israelcunaca gesurcunata, maacateocunataca mana llucchishpa cacharcachu. Ashtahuanpish paicunaca cunancamanmi israelcunapac chaupipi causancuna.

¹⁴ Ashtahuanpish Levipac aillumanca mana allpata curcachu. Paicunaca Dios mandashca shina, israelcuna Mandac Diosman animalcunata cushpa huañuchishca aichatami japina carca.

Rubenpac, Gadpac Manasespac allpacunamanta

¹⁵ Moisesca Rubenpac aillumanca paicuna mashna cashcata ricushpami allpata curca.

¹⁶ Paicunapac allpataca Arnón yacu ladopi tiyac Aroer pueblomantaca jatun pamba chaupipi tiyac pueblotapish, shinallatac tucui urcu pambacunatapishmi Medeba pueblocaman carca.

¹⁷ Hesbón pueblotapish, urcu pambacunapi tiyac uchilla llactacunandimi curca. Dibón, Bamot-baal, Bet-baal-maón,

¹⁸ Jahaza, Cademot, Mefaat pueblocunatapish,

¹⁹ shinallatac jatun pambapi tiyac urcucuna jahuapi cac Quiriataim, Sibma, Zeret-hasájar pueblocunatapish curcami.

²⁰ Shinallatac Bet-peor, Bet-jesimot pueblocunatapish, Pisga quingraicunatapish curcami.

²¹ Urcu pambapi tiyac pueblocunatapish, amorreocunata jatun mandac Sehón Hesbón pueblomanta mandashpa tiyacushca llactacunatapish curcami. Moisesmi chai jatun mandactapish, Madián llactata uchilla mandactapish atirca. Shinallatac jatun mandac Sehón churashca Evita, Requemta, Zurta, Hurta, Rebata mandaccunatapish atircami. Paicunaca chai llactallapitacmi causarca.

²² Shinallatac Israelcunaca Beorpac churi Balaam yachac runatapish espadahuan huañuchircami.

²³ Rubenpac aillu allpa linderoca Jordán yacumi carca. Rubenpac aillumanmi paicuna mashna cashcata ricushpa, chai allpatapish, chai pueblocunatapish, chai ladopi tiyac uchilla llactacunandi curca.

²⁴ Shinallatac Moisesca Gadpac aillumanpish paicuna mashna cashcata ricushpami allpata curca.

²⁵ Paicunapac allpaca Jazer pueblomanta Galaad llacta tucui pueblocunapish, Amón chaupi llactapish, Rabá pueblo chimba ladopi cac Aroer pueblocamanmi carca.

²⁶ Hesbón pueblomantaca Ramat-mizpa shinallatac Betonim pueblocamanmi carca. Cutin Mahanaim pueblomantaca Debir llactacamanmi carca.

²⁷ Yacu lado pambapica Bet-aram, Bet-nimra, Sucot, Zafón pueblocunapishmi carca. Shinallatac Hesbón pueblopi causaccunata jatun mandac Sehón mandacushca pueblocamanmi carca. Chaica, Jordán yacu inti llucshina ladomantaca Cineret mama cucha tucuricamanmi carca.

²⁸ Cai llactacunami Gadpac churicunaman paicuna mashna cashcata ricushpa cushca pueblocunapish, chai ladopi tiyac uchilla llactacunapish can.

²⁹ Moisesca Manasespac chaupi aillumanpish mashna cashcata ricushpami allpata curca.

³⁰ Paicunapac llactaca Mahanaim pueblomantaca tucui Basán llacta, shinallatac Basán llactapi causac Jairpac sucta chunga uchilla llactacunapishmi carca. Basán llactataca jatun mandac Ogmi mandacurca.

³¹ Basán llactata mandac Og mandacushca chaupi Galaad llactatami Astarot, Edrei pueblocunandi Manasespac churi Maquirpac chaupi ailluman, paicuna mashna cashcata ricushpa curca.

³² Moisesca cai llactacunatami Jordán yacumanta chimba ladopi cac, Jericó pueblomanta inti llucshina ladoman cac Moab jatun pambacunata chaupishpa curca.

³³ Ashtahuanpish Moisesca Levipac aillumanca allpata mana curcachu. Paillatac nishca shinaca israelcunata Mandac Diosmi paicunapac japina shinaca.