JOSUÉ 11 - Dios Rimashcata Quillcashcami

Josué jatun mandac Jabinta atishcamanta

¹ Chaita uyashpami Hazor pueblota mandac Jabinca Madón pueblota mandac Jobabmanpish, Simrón pueblota, Acsaf pueblota jatun mandaccunamanpish huillachun cacharca.

² Shinallatac jahua lado urcupi tiyac pueblocunata mandaccunamanpish, Cineret mama cucha ura ladopi tiyac pueblocunata mandaccunamanpish, Sefela llacta mandaccunamanpish, inti llucshina ladopi tiyac Nafot-dor pueblota mandaccunamanpish huillachun cacharca.

³ Chashnallatac inti tigrana ladopi, inti llucshina ladopi causac cananeocunamanpish, urcupi causac amorreocunamanpish, heteocunamanpish, ferezeocunamanpish, urcucunapi causac jebuseocunamanpish, Mizpa llacta Hermón urcu chaquipi causac heveocunamanpishmi huillachun cacharca.

⁴ Chashna huillacpimi, paicunapish tucui macanacuc runacunandi llucshirca. Paicunaca mama cucha patapi tiyac tiyu shina achca gentecunami achca caballocunahuan, achca carretacunahuan llucshirca.

⁵ Tucui chai jatun mandaccunami tandanacushpa israelcunahuan macanacungapac Merom yacu ladopi carpa huasicunata shayachishpa tiyarirca.

⁶ Shina cacpimi, Mandac Diosca Josuetaca: «Paicunataca ama manchaichu, caya cai horasllatami paicunataca israelcunapac ñaupapi churasha. Canca caballocunapac chaquicunata paquishpa, carretacunatapish rupachingui» nirca.

⁷ Josueca tucui paipac macanacuc runacunahuan rishpami cungailla Merom yacu ladopi japirca.

⁸ Israelcunapac maquipi Mandac Dios churacpimi, paicunata atishpa, Sidón jatun pueblocaman, Misrefot-maim pueblocaman inti llucshina ladopi tiyac Mizpa pugru pambacaman catishpa rircacuna. Chashnami shucllatapish mana saquishpa, tucui huañuchircacuna.

⁹ Josueca Mandac Dios mandashca shinallatacmi paicunataca huañuchishpa, caballocunapac chaquicunata paquishpa, carretacunatapish rupachirca.

¹⁰ Chai quipaca Josué cutishpami Hazor pueblota japishpa, jatun mandactaca espadahuan huañuchirca. Hazor pueblomi tucui caishuc llactacunamanta ashtahuan jatun carca.

¹¹ Chaipica shucllatapish mana saquishpami, espadahuan tucui tucuchishpa, Hazor pueblotapish rupachirca.

¹² Shinallatac Josueca chai jatun mandaccunapac tucui pueblocunapi causaccunata chaipi cac tucui jatun mandaccunandimi huañuchirca. Mandac Diosta servic Moisés mandashca shinallatacmi espadahuan huañuchishpa tucuchirca.

¹³ Ashtahuanpish israelcunaca lomacunapi tiyac pueblocunataca mana rupachircachu. Hazor pueblollatami Josueca rupachirca.

¹⁴ Israelcunaca chai pueblocunapi tucui ima tiyashcacunatapish, animalcunatapishmi japirca. Ashtahuanpish chaipi causac gentecunataca shucllatapish, mana saquishpami espadahuan tucui huañuchirca.

¹⁵ Ima shinami Mandac Dios paita servic Moisesta mandashca shinallatacmi Moisesca Josueta mandarca. Mandac Dios Moisesta mandashcataca Josueca imata mana saquishpami tucuita ruhuarca.

Josué tucui llactacunata quichushcamanta

¹⁶ Josueca chashnami tucui llactacunata japirca. Urcucunapi tiyac pueblocunata tucui Neguev pambacunata, Gosén tucui llactacunata, jatun pamba Sefelata, Arabá llactata, Israel urcucunatapish pugru pambacunandimi japirca.

¹⁷ Seir llactaman ric Halac urcumanta Líbano pambapi tiyac Baal-gad llactacaman, Hermón urcu pambacamanmi japirca. Shinallatac chai llactacunapi causaccunapac jatun mandaccunatapish chugrichishpami huañuchirca.

¹⁸ Josueca chai jatun mandaccunahuanca tauca huatatami macanacurca.

¹⁹ Israelcunahuan sumacta causanata munac puebloca mana tiyarcachu. Ashtahuanpish Gabaón pueblopi causac heveocunallami israelcunahuanca sumacta causarca. Caishuc pueblocunataca macanacushpa atishpami japirca.

²⁰ Mandac Diosca Moisesta mandashca shinami paicunataca israelcunahuan macanacuchun, chashna macanacushpaca mana llaquishpa tucuchishca cachun, sinchi shunguta ruhuarca.

²¹ Chai punzhallatami Josueca Hebrón, Debir, Anab, Judá aillucunapac, tucui Israel urcucunapi causac anaquitacunata tucui huañuchirca. Josueca tucui chai pueblocunandimi tucuchirca.

²² Anaquitacunaca israelcunapac llactapica shucllapish mana saquirircachu. Ashtahuanpish maijancunallami Gaza, Gat, Asdod pueblocunapi saquirirca.

²³ Mandac Dios Moisesta mandashca shinallatacmi Josueca tucui chai llactata japirca. Chai llactacunataca Israel aillucuna mashna aillu cashca shinallatacmi, chaupishpa curca. Shinami chai llactaca ña mana macanacui tiyacpi samarirca.