JOSUÉ 1 - Dios Rimashcata Quillcashcami

Diospac Josueta rimapayasqan Mandac Dios Josueta mandachun cayashcamanta

¹ Moisés huañucpi, Mandac Dios Moisesta ayudac Nunpac churi Josueta cayashpaca:

² «Ñucata servic Moisesca ña huañushcami. Cunanca, canmi tucui israelcunata pushashpa, ñuca paicunaman cushca llactaman yaicungapac Jordán yacuta pasana cangui.

³ Ñuca Moisesta nishca shina, cancuna maipimi sarunguichic, chai llactataca cancunaman curcani.

⁴ Cancunapac allpaca shitashca pambamanta Libanota catishpa, Eufrates jatun yacucaman, shinallatac tucui heteocunapac llactata catishpa, inti tigrana lado jatun mama cuchacamanmi canga.

⁵ Cambac tucui causaipimi canhuanca pipish mana macanacui pudinga. Ima shinami Moises-huan carcani, shinallatacmi canhuanpish casha. Cantaca mana saquishachu.

⁶ Ama manchaichu, ashtahuanpish sinchi cai. Canmi ñaupa taitacunaman ñuca cungapac ari nishca allpataca cai tucui gentecunaman chaupishpa cungui.

⁷ Ñucata servic Moisés mandashcata tucui pactachingapacca, mana manchashpa, sinchi cai. Tucui causaipi ima ruhuashcacuna alli llucshichunca cai mandashcacunamantami lluqui ladomanpish, alli ladomanpish mana ladoyana cangui.

⁸ Mandashcacunata quillcashca libropi tucui nishcacunata pactachingapacca tutapish, punzhapish yuyaricunguilla. Amatac saquinguichu. Chashna ruhuacpimi, tucui can ruhuashcacunaca alli llucshinga, shinallatac allita causangui.

⁹ Riqui cantaca sinchi, cari cari cai nishpami mandani. Ama manchaichu, ama shaicuichu. Canta Mandac Dios ñucaca can maita ricpipish, canhuanmi casha» nirca.

¹⁰ Josueca israelcunata mandaccunata cayashpaca:

¹¹ «Carpa huasicunaman rishpaca: “Quimsa punzha quipaca ñucanchicta Mandac Dios cusha nishca llactaman yaicungapacmi Jordán yacuta pasagrinchic. Chaimanta micunata allichichic” nigrichic» nirca.

¹² Josueca Rubenpac, Gadpac ailluta, shinallatac Manasespac chaupi ailluta rimashpaca:

¹³ —Mandac Diosta servic Moisés mandashcata yuyarichic. Pai mandashpaca: “Cancunata Mandac Diosca samachishcami, cai allpatapish cushcami.

¹⁴ Jordán yacumanta inti llucshina ladoman Moisés cushca llactapimi cancunapac huarmicunapish, huahuacunapish, animalcunapish saquiringa. Shina cacpipish, sinchita macanacuc runacunaca cancunapac huauqui israelcunata ayudangapac macanacunahuan pasachun.

¹⁵ Chashnami cancunata Mandac Dios cancunata pasachishca shinallatac, cancunapac huauquicunata samachingacaman, shinallatac paicunapish Mandac Dios cushca allpata japingacaman ayudana canguichic. Chai quipaca Jordán yacumanta inti llucshina ladoman Mandac Diosta servic Moisés cancunaman cushca llactaman cutinguichicllami” nishcata yuyarichic— nirca.

¹⁶ Shina nicpimi, paicunaca Josuetaca: —Ñucanchicca can tucui mandashcacunatami pactachishun. Maiman richun nicpipish rishunllami.

¹⁷ Moisés mandashcata ima shinami cazurcanchic, shinallatacmi cantapish cazushun. Mandac Dios ima shinami Moises-huan carca, chashnallatacmi canhuanpish cachun munanchic.

¹⁸ Maijanpish can mandashcata mana cazushpa, cariyacca huañunami can. ¡Ama manchaichu, sinchi cailla!— nirca.