JONÁS 4 - Dios Rimashcata Quillcashcami

Mandac Dios-huan Jonás piñarishcamanta

¹ Ashtahuanpish Jonasca Nínive llactapi causaccunata Dios mana llaquichishcamantami yallita piñarirca.

² Chaimantami Mandac Diosta mañashpaca: —Mandac Dioslla, ¿manachu cashna ruhuanataca, ñuca llactapi cashparac yacharcani? ¡Chaimantami Tarsisman miticushpa utca rircani! Can Diosca yallita cuyac, mana utca piñaric, alli shungumi cangui. Llaquicmi cangui, mana llaquichicchu cangui.

³ Cunanca, Mandac Dioslla, ñuca causaita quichuilla. Causanapac randica huañuimi ñucamanca ashtahuan alli— nirca.

⁴ Shina nicpimi, Mandac Diosca: —¿Chashna yallita piñarishpaca, allitachu ruhuangui?— nirca.

⁵ Shina nicpimi, Jonasca chai llactamantaca inti llucshina ladoman rishpa, chucllata ruhuashpa, chaipi tiyarirca. Chai llacta ima tucucta ricungapacmi llandurishpa tiyacurca.

⁶ Chaipi tiyacucpimi, Mandac Diosca inti yallita rupachicucpimi, llanduchichun, higuera yurata huiñachirca. Chaita ricushpami Jonasca yallita cushicurca.

⁷ Cayandi tutamantaca Mandac Diosca chai higuera yurata micuchunmi, shuc curuta churarca. Chai curumi yurataca chaquichirca.

⁸ Mandac Diosca inti llucshimucpimi, yallita rupac huairata cachashpa, Jonaspac umata yalli rupachirca. Shina rupachicpimi, huañunalla tucushpaca: —¡Causanapac randica huañuimi ñucamanca ashtahuan alli!— nirca.

⁹ Shina nicpimi, Mandac Diosca: —¿Chai higuera yura chaquishcamantachu yallita piñaringui?— nirca. Shina nicpimi Jonasca: —¡Ari, huañungacamanmi piñarini!— nirca.

¹⁰ Shina nicpimi, Mandac Diosca Jonastaca: —Canca, mana can tarpushca, mana huiñachishca higuera yura shuc tutalla huiñashca, shuc tutallatac chaquishca yuramantami llaquiringui.

¹¹ Ñucaca, ¿manachu patsac ishcai chunga huaranga runacuna causana Nínive llactamantaca llaquisha? Paicunaca maijan alli lado maqui, lluqui lado maqui cactapish mana yachaccunami. Shinallatac animalcunapish chaipi tiyanmi— nirca.