JONÁS 3 - Dios Rimashcata Quillcashcami

Jonás Nínive llactapi causaccuna Diospacman cutirishcamanta

¹ Mandac Dios cutinllatac Jonasta rimashpaca:

² «Jatari, Nínive llactapi ñuca ima nishcata huillangapac ri» nirca.

³ Shina nicpimi, Jonasca jatarishpa Mandac Dios mandashca shinallatac Nínive llactapi huillagrirca. Niniveca jatun pueblomi carca. Quimsa punzhata purishpami chai llactata tucuchic carca.

⁴ Jonasca llactata shuc punzhata purishpami: «¡Cunanmanta chuscu chunga punzhapica Nínive llactaca tucuringami!» nirca.

⁵ Chashna huillacpimi, Nínive llactapi causaccunaca Mandac Diosta crishpa, uchillamanta callarishpa, yuyaccunacaman sharpa churanata churarishpa ayunarca.

⁶ Nínive llactata jatun mandacpish, chashna huillacpica, pai mandashpa tiyarinamanta jatarishpa, paipac churanata llucchishpa, sharpa churanata churarishpami uchupapi tiyarirca.

⁷ Jatun mandacpish, pai churashca mandaccunapish Nínive llactapi huillachun mandashpaca: «¡Runacunapish, animalcunapish, huagracunapish, ovejacunapish, ima shuctac animalcunapish ama micuchun! ¡Shinallatac ama michichun, ama yacuchichun!

⁸ Gentecunapish, animalcunapish sharpa churanata churarishpa, Mandac Diosta caparishpa mañachun. Mana allita ruhuashcamanta, maijanta llaquichishcamanta llaquirishpa Diosta caparishpa mañachun.

⁹ Mandac Dios pai piñarishcata pasachishpa, ñucanchicta llaquishpa, mana llaquichingapishchari» nichun cacharca.

¹⁰ Mandac Diosca paipacman cutirishpa, mana allita ruhuashpa causanata saquishcamantami llaquichisha nicushpapish, llaquirishpa mana llaquichirca.