JONÁS 2 - Dios Rimashcata Quillcashcami

Jonás Mandac Diosta mañashcamanta

¹ Jonás challuapac huicsa ucumanta Mandac Diosta

² mañashpaca: «Ñuca llaquihuan cashpa, Mandac Dios canta mañacpica, uyarcanguimi. Seolmanta caparishpa mañacpica, ñuca mañashcata uyarcanguimi.

³ Ñucata, mama cucha chaupipi shitacpica, yallita callpacuc yacumi muyundita taparca. Cambac timbucuc yacupish, caiman chaiman cuyuricuc yacupish ñuca jahuatami pasarca.

⁴ Chaimantami ñucaca: “Cambac ñaupamanta catishpa cachashcami cani. Shina cashpapish, cambaclla huasitaca ricusharacmi” nishpa yuyarcani.

⁵ Yacuca ñucataca cungacamanmi pillurca. Jatun yacupimi muyundita pillurca. Yacu quihuacunami ñuca umapi pillurirca.

⁶ Urcu callarimanmi rircani. Allpaca huiñaimanmi ñucata tapashpa charicurca. Ñucata Mandac Dioslla, canmi ñuca causaitaca pambashcamanta llucchircangui.

⁷ Ñuca huañunalla cashpami Mandac Dios canta yuyarircani. Ñuca mañashcaca cambaclla huasimanmi chayarca.

⁸ Ruhuashcalla dioscunata caticcunaca can llaquic cashcata cungarincunami.

⁹ Ñuca shimihuanmi canta alabani. Rupachina animaltapish, canman cusha nishca ofrendatapish cushami. ¡Can Mandac Diosllami quishpichicca cangui!» nirca.

¹⁰ Mandac Dios challuata Jonasta allpaman llucchichun nicpica, llucchi shitarcallami.