JOEL 3 - Dios Rimashcata Quillcashcami

Mandac Dios llactacunata llaquichinamanta

¹ Mandac Diosca: «Chai punzhacunapi, chai huatacunapica, Judá llactamanta, Jerusalenmanta prezu apashcacunata

² tandachishpami, Josafat pambaman cachasha. Chaipimi ñuca acllashca israelcunata llaquichiccunataca ñucapish taripashpa llaquichisha. Paicunami ñuca acllashcacunataca shuctac llactacunaman caita chaita cachashpa, ñuca allpatapish chaupinacurca.

³ Suerteta ruhuashpami, ñuca acllashcacunataca chaupinacurca. Churicunataca cullquimanta huainayac huarmihuanmi cambiarca. Ushicunataca vinota ubiangapacmi caturca.

⁴ Tiro llactapi, Sidón llactapi, tucui Filistea llactapi causaccunalla, ñucataca ¿imatatac ruhuasha ninguichic? ¿Cancunata llaquichishca shinallatacchu llaquichisha ninguichic? Chashna ruhuacpica, cancuna japina cashcataca ñallami cugrini.

⁵ Cancunaca ñuca cullquita, curita, sumac charinacunata quichushpami, cancunapac dioscunapac huasicunaman aparcanguichic.

⁶ Judá llactapi, Jerusalenpi causaccunapac huahuacunataca paicunapac llactacunamanta caruman cachangapacmi Grecia llacta runacunaman caturcanguichic.

⁷ Paicunata maiman catushpa cachashca cacpipish, chaimantami cutichimusha. Chashna cutichimushpami paicuna llaquita apashca shinallatac cancunatapish llaquichisha.

⁸ Cancunapac churicunata, ushicunataca Judá llactapi causaccunamanmi catusha. Cutin paicunaca caru llactapi cac Sabá llacta runacunamanmi catunga. Chaitaca Mandac Dios ñucami nini.

⁹ ¡Tucui llactacunapi macanacui tiyanata huillashpa: “Macanacungapac allichirichic! ¡Sinchi runacuna allichirichic! Macanacuc soldadocunapish shamushpa allichirichic.

¹⁰ Yapuna rejacunataca espadacunata ruhuaichic. Hocescunataca lanzacunata ruhuaichic. Fuerzata mana chariccunataca: ‘Fuerzata charinimi’ nishpa, caparichun mandaichicyari.

¹¹ Muyundi llactacunapi causaccuna tandanacushpa shamuichicyari. ¡Mandac Dioslla, fuerzata charic cambac runacunataca paicunapacman cachaiyari!” nishpa caparichicyari» ninmi.

¹² Mandac Diosca: «Tucui llactacunapi causaccuna riccharishpa, Josafat pambaman richicyari. Ñucaca tucui muyundi llactacunapi causaccunata taripangapacmi tiyarisha.

¹³ Trigoca ñami pucushca, hoces-huan tandachicchicyari. Uvas cutana pambapica achca uvasmi tiyan, chaita sarungapac urai shamuichicyari. Paicuna mana allita ruhuashcacunaca achcami» ninmi.

¹⁴ Mandac Dios llaquichina punzhaca ñami chayamun. Pai taripana pugru pambapica, tiyu shina, gentecunami tandanacushca.

¹⁵ Intipish, quillapish amsayangami, lucerocunapish mana achicyachingachu.

¹⁶ Mandac Diosca Sión urcumantami león huacac shina caparinga. Pai rimashcaca Jerusalenmantami uyaringa. Jahua pachapish, cai pachapish chucchungami. Shina cacpipish, Mandac Diosca pai acllashca israelcunata cuidangami. Paica miticuna sinchi torre shinapishmi canga.

¹⁷ Mandac Diosca: «Ñucapaclla cac Sión urcupi causac cancunapac Mandac Diosca ñucami cani. Chaitaca yachaichicyari. Ñucapaclla Jerusalentaca shuctac gentecunaca mana ashtahuan pasangachu.

Judá llactapi causaccunata quishpichinamanta

¹⁸ Chai punzhapica urcucunamantami mishqui vino llucshinga. Lomacunamantaca lechemi talliringa. Judá llactataca achca toma yacumi callpanga. Mandac Dios ñucapac huasimanta yacu llucshishpami, Sitim pugru pambata parcunga.

¹⁹ Egipto llactaca chingaringami. Edom llactapish shitashca pambami saquiringa. Judá llactapi causaccunata llaquichishcamanta, mana faltayuc runacunata huañuchishpa, yahuarta jichashcamantami chashnaca tucunga.

²⁰ Ashtahuanpish Judá llactapi causaccunaca huiñaitami causanga. Jerusalén llactapica huahua huahuacunacamanmi causanga.

²¹ Huañuchishpa yahuarta jichashcamantaca ñucami llaquichisha. Mana allita ruhuashcamantaca manatac perdonashachu. ¡Mandac Dios ñucami, Sión urcupica causasha!» ninmi.