JOEL 2 - Dios Rimashcata Quillcashcami

¹ Mandac Diosca: «¡Sión urcupi cornetapi tocashpa, caparishpa huillaichicyari!» ninmi. Mandac Dios llaquichina punzhami pactamun. ¡Tucui cai pachapi causaccunapish chucchuichicyari!

² ¡Chai punzhaca pura tutami tucunga! ¡Puyushca llandu punzhami canga! ¡Tutamanta achicyachic luz shinami, sinchi runacunaca lomacunata shamunga! ¡Chashnaca ñaupa huatacunapish mana ricurishcachu! ¡Quipamanpish, huahua huahuacunacaman chai shinaca mana tiyangachu!

³ Paicunaca ñaupatapish, huashatapish tucuita rupachishpami saquinga. Paicuna manarac pasacpica, chai allpaca Edén huerta shina sumacmi carca. Ña pasa ricpica, shitashca pambami saquiringa. ¡Pipish mana saquiringachu!

⁴ Paicunaca caballocuna shina, caballopi montac soldadocuna shinami callpanga.

⁵ Paicunaca carretacuna ric shinami, urcucuna jahuata volanga. Paicunaca chaquishca pangacunata nina tucui rupachicuc shinami uyaringa. Jatun Macanacuiman ringapac allichirishca sinchi runacuna shinami canga.

⁶ Paicunapac ñaupapica tucuimi chucchushpa, llaquilla ñahui tucunga.

⁷ Sinchi soldadocuna shina callpashpami, pirca jahuaman huichicunga. Tucui paicunaca mana ladoyashpami, quiquin ñanta catishpa ringa.

⁸ Mana paicunapura huactarinacunchu. Ashtahuanpish paicunapac ñanta ringallami. Espada jahuapi urmashpapish mana paicunapac filamanta ladoyangachu.

⁹ Llactapi caiman chaiman rishpami, pirca huasi jahuaman huichicushpa, shuhuaccuna shina ventanacunata yaicunga.

¹⁰ Paicunapac ñaupapica cai pachapish, jahua pachapish chucchungami. Intipish, quillapish purayangami, lucerocunapish mana ashtahuan achicyachingachu.

¹¹ Mandac Diosca paipac soldadocunapac ñaupapimi mandacun. Paipac soldadocunaca achcami. Pai mandashcacunaca llaquimi. Mandac Dios shamuna punzhapica, jatun llaquimi tiyanga. Chai jatun llaquitaca, ¿pitac apai pudingayari?

Juchata ruhuashcamanta llaquirichun Dios mandashcamanta

¹² Mandac Diosca: «Cunanca ayunashpa, huacashpa, yallita llaquirishpa, tucui shunguhuan ñucapacman cutirichic» ninmi.

¹³ Llaquirishpa churanata lliquirinapac randica, tucui shunguhuan llaquirichic. Cancunata Mandac Diospacman cutirichic. Paica cuyac shungumi, llaquicmi. Mana utca piñaric, yallita llaquicmi. Paica mana llaquichinata munanchu.

¹⁴ Pai shamushpa, cancunata mana llaquichingapishchari. Cancunaman allicunata cungapishchari. Mandac Diosca ofrendata cuchun, tallina vinopish, grano granotapish cungapishchari.

¹⁵ ¡Sión urcupi cornetapi tocaichic! ¡Tandanacushpa ayunachun huillaichic!

¹⁶ ¡Tucui gentecunata tandachishpa, Diospacllata ruhuaichicyari! ¡Pushac yuyaccunatapish, huahuacunatapish, chuchucuc huahuacunatapish tandachicchicyari! ¡Cunanlla cazarashca noviacunata sueñuna ucumanta pushamuichicyari!

¹⁷ Mandac Diospacta ruhuac curacunaca pungu yaicuna altar chaupipi shayarishpa: “Mandac Dioslla, can acllashcacuna mana allita ruhuashcataca perdonaiyari. Paicunata burlashpa pingaichichun ama saquinguichu. Shuctac llactacuna mandachunpish ama saquinguichu. Shuctac gentecunaca: ‘¿Maipitac paipac Mandac Diosca?’ ningami” nishpa mañaichicyari.

¹⁸ Mandac Dios paipac llactapi causaccunata yuyarishpa llaquircami.

¹⁹ Mandac Diosca paicuna mañashcata uyashpaca: «Ñuca micunatapish, llullu vinotapish, aceitetapish cucpi, mana nicta micunguichicmi. Llactacunapi burlashpa pingaichichunpish mana saquishachu.

²⁰ Jahua llactamanta cancunata llaquichiccuna shamucpica, carumanmi cachasha. Paicunataca shitashca pambamanmi catishpa cachasha. Ñaupashpa shamuccunataca inti llucshina lado mama cuchapimi shitasha. Huashata caticcunataca inti tigrana lado mama cuchapimi shitasha. Chaipimi ismushpa yallita ashnanga. Yalli llaquita ruhuashcamantami chashna ruhuasha» ninmi.

²¹ ¡Cai llactapi causaccunalla, ama manchaichicchu! ¡Yallita cushicuichic! ¡Mandac Diosca jatun mancharinacunatami ruhuanga!

²² Sacha animalcunapish ama manchaichicchu. Quihuapish cutinmi verdiyanga. Yuracunapish cutinmi pucunga, higopish, uvaspish achcami pucunga.

²³ Sionpi causaccunalla, cancunaca Mandac Dios-huan cushicuichicyari. Paica punta tamyataca, tamyana punzhallapitacmi cacharca. Punta tamyatapish, pucuchic quipa tamyatapish utca punzhacunapi shinallatacmi cachanga.

²⁴ Trillana pambapish trigo parbascuna jundami canga. Uvasta cutana pambapica llullu vinopish, aceitepish huacaichina jundami canga.

²⁵ Mandac Diosca: «Ñucami achca soldadocuna shina langostacunata cacharcani. Chaimantami oruga nishca langostacuna, saltón nishca langostacuna, revoltón nishca langostacuna micushpa tucurca. Shina cacpipish, cunanca chai huatacunamanta yallitami cutichisha.

²⁶ Cancunaca mana nictami micunguichic. Cancunata Mandac Dios ñucapac shutitapish “Allimari” cangui, ninguichicmi. Ñucami cancunamanca mai allicunata ruhuasha. Ñuca acllashcacunaca jaicapi mana pingaichishcachu canga.

²⁷ Shina ruhuacpimi, cancunaca ñucaca cancunapac chaupipi cashcata, ñucaca Mandac Dios cashcata, ñucapac randi shuctac dios mana tiyashcata yachac chayanguichic. Pai acllashcacunaca jaicapi mana pingaichishcachu canga.

Diospac Espíritu shamunamanta

²⁸ Cai tucuita ruhuashca quipaca, ñuca Espiritutami tucui gentecunapacman cachasha. Shina cachacpimi, cancunapac churicunapish, ushicunapish ñucamanta huillanga. Cutin yuyaccunaca muscungami. Quipa huiñaicunaca muscuipi shina ricungami.

²⁹ Chai punzhacunapica servic caricunamanpish, servic huarmicunamanpish ñuca Espiritutami yacuta tallic shina cachasha.

³⁰ Jahua pachapipish, cai pachapipish jatun mancharinacunatami ricuchisha. Huañuipish, llactacuna rupashpa, cushni llucshicucpish tiyangami.

³¹ Mandac Dios ñuca cachashca jatun mancharina punzha manarac chayamucpimi, intica amsayanga, quillaca yahuar shina tucunga.

³² Mandac Dios ñucata mañaccunallami quishpiringa. Ñuca huillashca shinami, quishpirishcacunaca Sión urcupipish, Jerusalenpipish canga. Chai quishpirishcacunaca Mandac Dios ñuca cayashcacunami canga» ninmi.