JOEL 1 - Dios Rimashcata Quillcashcami

Chagracunata langosta micushcamanta

¹ Mandac Diosmi Petuelpac churi Joelta rimarca.

² Pushac yuyaccunapish, tucui cai llactapi causaccunapish, caita alli uyaichic. ¿Cancuna causacui punzhacunapi, mana cashpaca cancunapac ñaupa taitacuna causacui punzhacunapi cashna llaquicuna tucushcachu?

³ Caicunataca cancunapac huahuacunamanmi huillana canguichic. Paicunapish paicunapac huahuacunaman huillachun. Chai huahuacunapish, paicunapac huahua huahuacunaman huillachun.

⁴ Langosta puchuchishcataca oruga nishca langostacunami micurca. Chaicuna puchuchishcataca saltón nishca langostacunami micurca. Chaicuna puchuchishcataca revoltón nishca langostacunami micurca.

⁵ ¡Machaccuna riccharishpa huacaichicyari! ¡Tucui vinota ubiaccuna llullu vinomanta caparishpa huacaichicyari! ¡Vinotaca cancunapac shimimantami quichushca!

⁶ Maita mana yupaipac sinchi runacunami ñuca llactaman shamurca. Paicunapac ñaupa quirucunaca leonpac quirucuna shina, cuchu quirucunaca huarmi leonpac quirucuna shinami.

⁷ Ñuca uvas chagracunata llaquinayaita tucuchishpami, ñuca higo yuracunatapish chushac caspillata saquishca. Tucui ramacunata anchuchishca yuranllami saquirirca.

⁸ ¡Shuc soltera paipac cusa tucuna huañushcamanta sharpa churanata churarishca shina huacaichicyari!

⁹ Mandac Diospac huasipica ofrendapish, tallina vinopish mana tiyanchu. Mandac Diosta servic curacunapish llaquillatami huacacun.

¹⁰ Pambacunapish llaquinayaita tucuchishcami siricun. Trigo chagrapish, llullu vinopish, aceitepish chaquishpa tucurishcami.

¹¹ Allpapi trabajaccunalla, uvasta pallaccunalla, llaquilla tucushpa huacaichicyari. Trigo chagrapish, cebada chagrapish llaquinayaitami chingarishca.

¹² Uvas chagrapish, higo yuracunapish chaquishpa chingaricunmi. Granadilla, palmera, manzana yuracunapish tucuimi chaquicun. Sacha yuracunapish tucuimi chaquicun. Chaimantami huañuclla runacunapac cushicuipish chingaricun.

¹³ ¡Curacunalla, sharpa churanata churarishpa huacaichicyari! ¡Altarpi serviccunalla, llaquillata huacaichicyari! Mandac Diosta serviccunalla, sharpa churanata churarishpa, sueñungapac shamuichicyari. Mandac Diospac huasimantaca ofrendatapish, tallina vinotapish anchuchishcami.

¹⁴ Tandanacuchun, ayunachun cayaichicyari. Pushac yuyaccunatapish, cai llactapi tucui causaccunatapish, cancunata Mandac Diospac huasiman tandachishpa, Mandac Diosta caparishpa mañaichicyari.

¹⁵ Mandac Dios llaquichina punzhami ña pactamun. ¡Tucuita ruhuac Dios yallita llaquichishpami tucuita tucuchinga! ¡Aij, chai punzhaca yalli llaqui punzhami canga!

¹⁶ ¿Manachu Mandac Diospac huasipi micushpa yallita cushicuitapih ñucanchic ñaupamanta anchuchirca?

¹⁷ Muyucunaca allpallapitacmi chaquishca. Trillana pambacunapish shitashcami. Grano mana tiyashcamantami grano huacaichina ucucunapish mana tiyan.

¹⁸ ¡Quihua mana tiyashcamantami animalcunaca llaquinayaita huacacun! ¡Huagracunaca quihuata mashcashpami, caita chaita puricun! ¡Manada ovejacunapish yarcaimantami huañunalla tucun!

¹⁹ Mandac Dioslla, canllatami caparishpa mañasha. Michina pambatapish, tucui sacha yuracunatapish nina llamasmi tucuchicun.

²⁰ Callpac yacucunapish chaquicunmi, michina pambatapish ninami rupachicun. Chaimantami sacha animalcunapish, can Diosta huacashpa mañacun.