JOB 9 - Dios Rimashcata Quillcashcami

Job imata mana ni pudishcamanta

¹ Shina nicpimi Jobca:

² «Ari, chashnatacmi. Chaitaca ñucallatac yachanimi. ¿Ima shinatac runaca Diospac ñaupapica cashcata ruhuacmi cani ningayari?

³ Dios-huan rimanacushpaca huaranga shimicunamanta shucllatapish mana cutichi pudingachu.

⁴ Paipac shungupica tucuita yachanmi. Tucui imatapish ruhuacmi. ¿Pitac paita mana cazushpaca alli llucshingayari?

⁵ Pai yallita piñarishpaca urcucunatapish cuyuchinmi, maipi cashcamanta tuñishpa shitanmi, chaitaca pipish mana yachanchu.

⁶ Paimi allpatapish maipi cashca pushtumanta cuyuchin. Allpata charicuc pilarcunatapish Paimi chucchuchin.

⁷ Intita ama llucshichun nicpica, mana llucshinchu. Lucerocunapish sellashca shinami mana achicyachin.

⁸ Paillami jahua pachatapish telata chutac shina churarca. Paica caiman chaiman cuyucuc mama cucha jahuatami purin.

⁹ Paimi Osa, Orión, Pléyades shuti lucerocunatapish, ura ladoman cac lucerocunatapish ruhuarca.

¹⁰ Paimi pipish mana yachai pudipac mancharinacunata, mana yupaipac sumaimanacunata ruhuan.

¹¹ Pai ñuca ñaupata pasacucpipish paitaca mana ricunichu. Caruta ricpipish mana yachai pudinichu.

¹² Pai imata quichucpipish, ¿Pitac cutin chasqui pudingayari? Pitac: “¿Imatatac ruhuangui?” ningayari.

¹³ Diosca yallita piñarishcataca mana cungaringachu. Jatun tucushcacunata ayudaccunapish, paipac chaqui ucupimi cumurincuna.

¹⁴ ¿Ñucaca imatatac cutichishpa rimashayari? ¿Ima shimicunahuantac pihuan parlai pudishayari?

¹⁵ Ñucaca cashcata ruhuac cashpapish, imata mana cutichi pudinichu. Chaipac randica ñucapac juez cashcamantami, ñucata llaquiyari niman.

¹⁶ Ñuca mañashcata pai uyacpipish, chai mañashcata pai uyashcataca mana crimanchu.

¹⁷ Paica yallita huaira tamyahuanmi llaquichirca. Ñuca mana faltayuc cacpipish, ñuca chugritaca ashtahuan anchayachirca.

¹⁸ Ñucataca samaita aisachunllapish mana saquinchu. Chaipac randica jatun llaquicunahuanmi llaquichin.

¹⁹ Sinchimanta rimashpaca, ¡Paica tucui imatapish ruhuai pudinmi! Ñucata taripangapac apacpica, ¿Pitac ñucapac randi shayaringayari?

²⁰ Ñuca cashcata ruhuacmi cani nicpipish, ñuca shimillatacmi llaquipi churanga. Ñuca: “mana juchayucchu cani” nicucpipish, paica juchanchingallatacmi.

²¹ Ñuca mana juchayuc cashpapish mana yuyarinmanchu. ¡Ñucaca mana ashtahuan causasha ninichu!

²² Ñucaca: “Paica mana juchayuctapish, mana manchactapish tucuchinllami.

²³ Shuc azotillami huañuchin. Jatun llaquihuan gentecuna huañucushpa, mancharicucpica paica asinmi.

²⁴ Cai pachataca paita mana manchaccunapac maquipimi churashca. Paica juezcunapac ñahuitapish tapanmi. Mana pai ruhuacpica, ¿pitac ruhuangayari?

²⁵ Ñuca causaica callpac runacunatapish ashtahuan yallimi callpashpa rin. Ima allitapish mana ricushpami callpashca.

²⁶ Callpac barco shinami rishca. Anga aichata micungapac ric shinami callpashca” nini.

²⁷ Ñucaca: “Nanaihuan aij ninata saquishpa, cushilla ñahuimi tucusha” nini.

²⁸ Shina cacpipish, nanaicunaca manchachinmi. Ñucataca ima allita mana ruhuac cashcata yuyac cashcatami yuyani.

²⁹ Ñucaca Diosta mana cazuc nishcami cani. ¿Imapactac yanga imatapish ruhuashayari?

³⁰ Jabonhuan jahuarishca cacpipish, maquita lejía yacuhuan jahuashca cacpipish,

³¹ ñucataca jutcupimi shitangui. Churanacunapish ñuca aichataca millanayachingami.

³² Diosca mana ñuca shina runachu. Paihuanca mana juezpacman rishpa, ñahuinchinacui pudinichu.

³³ Ñucanchic ishcaipac jahuapi maquita churashpa, allichic juezca mana pi tiyanchu.

³⁴ Paipac manchai ñucata ama manchachichun paipac varata ñuca jahuamanta anchuchishpachari alli canman.

³⁵ Shina cashpapish, imata mana manchashpa rimashallami. Ima mana allitapish mana ruhuashcanichu.