JOB 8 - Dios Rimashcata Quillcashcami

Diosca cashcata ruhuacmi nishpa Bildad huillashcamanta

¹ Suhitapuramanta Bildadca:

² «¿Ima horascamantac chashna rimacugringui? Can rimashca shimicunaca manchana huaira shinami canga.

³ ¿Diosca allita ruhuanata paquishcachu? ¿Tucuita ruhuac Diosca cashcata ruhuanata paquishpachu, mana allita ruhuashca?

⁴ Cambac huahuacunami, paita mana cazushpa juchallishca. Chaimantami paicuna japina cashca shinallatac llaquichishca.

⁵ Can utca Diosta mashcashpa tucuita ruhuac Diosman perdonta mañashpa,

⁶ allita ruhuashpa chuya causacpica, paica cantaca huacaichingami. Chashna causacpica, can japina cashca shinallatac cambac huasipipish can charishcata ashtahuanmi mirachinga.

⁷ Can utcapi ashallata charishca cashpapish quipa punzhapica ashtahuanmi charingui.

⁸ Ñaupa punzhacunapi causac taitacunaman tapushpa, paicunapac taitacuna yachashcata yachacuiyari.

⁹ Ñucanchicca cainallamanta cashpami imatapish mana yachanchic. Ñucanchic causaica cai pachapica llandu shinallami.

¹⁰ Paicunami cantaca yachachishpa sumacta rimanga. Paicunami ima shina causashcata achcata parlanga.

¹¹ ¿Juncoca yacu guzu illacpi huiñangachu? ¿Papiroca yacu mana tiyacpica huiñangachu?

¹² Chai yuraca verdinlla cashpapish, mana pitishca cashpapish tucui quihuacunamanta yallimi utca chaquin.

¹³ Chashnallatacmi Diosta tucui mana cazuccunaca tucun. Shinallatacmi Diosta mana manchaccuna imata shuyacushcaca chingarin.

¹⁴ Paicuna imata shuyacushcapish pitiric shinami chingarin. Paicuna shunguta churashcapish araña ahuashca shinallami.

¹⁵ Chai ahuashcapi taunallicpica urmanllami. Chai ahuashcapi japiricpica pitirinllami.

¹⁶ Millaita ruhuaccunaca intipi verdinlla yura shinami can. Ramacunapish huertata tucui tapac shinami can.

¹⁷ Sapicunapish rumi jahuatami caita chaita ahuarishpa ricun. Rumi allpaman chayashpami sapiyashpa saquirin.

¹⁸ Huiñacuc pushtumanta pitishpa shitacpica, allpaca: “¡Cantaca jaicapi mana ricushcanichu!” ningami.

¹⁹ Paipac cushilla causanaca chashnami tucuringa. Pai huiñashca pushtupica shuctac quihuacunami huiñanga.

²⁰ Diosca ima millaita mana ruhuactaca, mana saquinchu. Mana allita ruhuaccunataca mana ayudanchu.

²¹ Canca cutinmi yallita asingui. Cambac calluhuanmi cushicushpa caparingui.

²² Canta piñaccunaca yallitami pingaichishca canga. Diosta mana manchaccunapac huasicunaca chingaringami» nirca.