JOB 7 - Dios Rimashcata Quillcashcami

¹ Cai pachapi causaccunaca shaicushpami imatapish ruhuashpa causan. Paicunapac punzhacunaca, trabajac runapac punzha tucuric shinami tucurin.

² Servic runaca samarisha nishpami shungu llaquirin. Trabajac runaca samaringapacmi cullquita shuyan.

³ Cashnami maijan quillacunata jatun llaquita apacuni. Ñucaca tutantami llaquicunata apacuni.

⁴ Camapi siricushpaca: “¿Ima horashi jatarisha?” nicunimi. Ashtahuanpish mana utca achicyanchu. Pacaringacamanmi achca yuyaicunahuan siricuni.

⁵ Ñuca cuerpoca curucunahuan, asha allpahuan tapashca shinami. Ñuca aicha carapish millanayaitami ashnacun.

⁶ Ñuca causaica ahuac runapac lanzaderatapish yallimi callpashpa tucuricun. Chashnami ima shuyanata mana charishpa chingarigricuni.

⁷ Ñuca Dioslla, ñuca causaica huaira shinami chaitaca yuyariyari. Ñuca ñahuica alli causaitaca mana ashtahuan ricungachu.

⁸ Ñucata ricuccunapish mana ashtahuan ricungachu. Cambac ñahuihuan ñucata ricucpica, ñucaca ñami tucurisha.

⁹ Puyu ashancaman chingaric shinami maijanpish Seolman rishpaca, cutinca mana llucshinga.

¹⁰ Paipac huasimanca mana cutingachu. Pai maipi causashcatapish cutinca mana ricungachu.

¹¹ Chaimantami ñuca shimihuan rimarinataca mana saquisha. Ñuca yuyaipi llaquihuan huañucushpami rimaricushalla. Tucui almahuan llaquirishpami aij nicushalla.

¹² Ñucata cuidachun churachunca, ¿Ñucaca mama cuchachu cani? ¿Mana cashpaca mama cuchapi tiyac manchana animalchu cani?

¹³ Ñucaca: “Camapi siririshpami cushicusha camapi samarishpami llaquicunata cungarisha” yuyanimi.

¹⁴ Shina cacpipish, muscuicunapimi manchachingui. ¡Muscuipi shina ricurishpami yallita manchachingui!

¹⁵ Ñuca shungupica sipirishpami, alli caiman yuyanimi. Ñuca causanapac randica huañushpami alli caiman.

¹⁶ Ñuca causaica mana valinchu. Mana unaita causasha ninichu. Ñucata ña huañuchun saquilla. Ñuca causana punzhacunaca yangami.

¹⁷ ¿Runataca ima cacpitac jatunyachinguiyari? ¿Imamantatac paipi shunguta churanguiyari?

¹⁸ ¿Imamantatac tucui tutamanta ricuc shamunguiyari? ¿Runataca ima cacpitac yuyaringuiyari?

¹⁹ ¿Ima punzhacamantac ñucata ricunata saquinguiyari? Ñuca tucata pasachichunllapish, ¿ima nishpatac mana cacharinguiyari?

²⁰ Runacunata ricucuc Dioslla, juchacunata ruhuashpapish cantaca, ¿imatatac ruhuashcaniyari? ¿Ima nishpatac cambac flechahuan shitana señalta shina ñucallata ricuchingui? Ñucallatacmi shuc llashac carga shina tucushcani.

²¹ ¿Ima nishpatac ñuca mana cazushcata anchuchishpa, ñuca juchacunata perdonangui? Utcami uchupapimi sueñugrini. Ñucata can utca mashcacpipish ña mana ricurishachu» nirca.