JOB 6 - Dios Rimashcata Quillcashcami

Job paipac ricsishcacunata rimarishcamanta

¹ Shina nicpimi Jobca:

² «Ñuca llaquicunata, ñuca nanaicunata tandachishpa, balanzapi churaipac cacpica,

³ mama cuchapi tiyac tiyutapish yallimi llashanman. Chaimantami ñucaca jatun tucushpa rimarishcani.

⁴ Tucuita ruhuac Diospac flechacunami ñucapi yaicushca. Chai flecha venenotami ñuca almaca ubiashca. Diospac jatun manchaimi ñucahuan macanacucun.

⁵ ¿Sacha burro quihuapi cashpaca huacangachu? ¿Huagrapish quihuapi cashpaca huacangachu?

⁶ ¿Cachi illac micunaca micuringachu? ¿Ruru claraca mishquichu canga?

⁷ Ñuca mana munashcacunatami cunanca micucuni.

⁸ ¡Dios, ñuca mañashcata pactachishpachari alli canman! ¡Dios, ñuca munashcata cushpami alli canman!

⁹ Dios ñucata, ñutuchishpachari alli canman. ¡Paipac maquita chutashpa, ñucata tucuchishpachari alli canman!

¹⁰ Jucha illac Dios rimashcatami cazushpa causarcani. Chaimanta ñuca jatun llaquicuna chaupipi cashpapish cushicuiman.

¹¹ ¿Ima fuerzahuantac ashtahuan sinchiyashayari? ¿Imapactac causashpa caticushayari?

¹² ¿Ñuca fuerzaca rumi shinachu? ¿Ñuca cuerpoca bronce shinachu?

¹³ Ñucallaca mana fuerzata charinichu Ñucata pi ayudacpish mana tiyanchu.

¹⁴ Llaquihuan causac runaca tucuita ruhuac Diosta mana manchac cashpapish paihuan apanacuc runata charinmi can.

¹⁵ Ashtahuanpish ñucataca ñuca huauquicunallatacmi, yacu jundashpa shamuc shina llaquichin. Manchana jatun yacu shamuc shinami llaquichincuna.

¹⁶ Paicunaca casa tapashca, rasu tapashca yacu shinami.

¹⁷ Casaca tutamanta rupai shamucpica yacuyanllami. Punzha rupaipica maipi cashcamanta chingarinllami.

¹⁸ Paicuna tandanacushpa ricushpapish, caita chaita rincunallami. Shina rishpami ashancaman ashancaman shitashca pambapi chingarin.

¹⁹ Chai yacutaca Temán llactamanta shamuc gentecunami mashcan. Sabá llactamanta puric runacunami chai yacutaca shuyancuna.

²⁰ Ashtahuanpish paicuna shuyacushca mana ricuricpimi llaquirincuna. Chai yacu tiyac pushtuman chayashpapish, yacuta mana tarishpami ubiana munaillahuan saquirincuna.

²¹ Cunanca cancunapish, chashnallatacmi canguichic. Jatun llaquihuan cacta ricushpaca, mancharinguichicmi.

²² ¿Ñucaca: “Cancunapac haciendamanta imata apamui” nircanichu? Mana cashpaca, ¿ñucata quishpichingapac imallatapish cuchun nircanichu?

²³ Mana cashpaca: “¿Ñucata piñaccunapac maquimanta cacharichi” nircanichu? Mana cashpaca: “¿Millai gentecunapac maquimanta quishpichichicyari” nircanichu?

²⁴ Ñuca upalla cachunca yachachichicyari. Ñuca pandarishca cacpica ricuchichicyari.

²⁵ ¡Allita rimashca shimicunaca cushichinmi! Ashtahuanpish cancuna rimashcaca imatapish mana ruhuanchu.

²⁶ ¿Imata mana ruhuanata pudic rimashcatachu huaira shina cashcata yuyashpa jarcashpa rimaringuichic?

²⁷ Cancunaca taita mama illac huahuatapish, randinguichicmanmi. Cancunapac alli ricsishcacunatapish imahuan cambianguichicmanmi.

²⁸ Cunanca ñuca ñahuita ricungapac shamushca cashpaca ricuichiclla. Cancunapac ñaupapi imata llullashca cacpica chapaichiclla.

²⁹ Cunanca, alli yuyaita cutin japishpa, ama millaita rimaichicchu. Ñucataca imatapish cashcata ruhuac cashcata cutin yuyaringuichic.

³⁰ ¿Ñuca callutaca llullac cashcatachu yuyanguichic? Ñuca mana alli shimicunata rimacushcataca ¿Manachu ñucallatac yachai pudini?