JOB 5 - Dios Rimashcata Quillcashcami

¹ «Cunanca sinchita capariyari. Maijan uyanchu imami. ¿Maijan jucha illactatac mañagringui?

² Yuyai illac runataca piñarina yuyai, shuccuna charishcata munana yuyaimi huañuchicun.

³ Sinchi shungu runataca sapiyashca shina ñaupaman rictami ricurcani. Shina cacpipish paipac huasitaca chai punzhallatacmi maldiciarcani.

⁴ Paicunapac huahuacunataca pi mana quishpichingachu. Puebloman yaicuna pungullapitacmi llaquichingacuna. Paicunataca pipish mana ayudangachu.

⁵ Paipac granocunataca, yarcaihuan caccunami micunga. Casha chaupipi cacpipish, llucchishpami apangacuna. Paicuna charishcataca yacunayaihuan shinami tucuchinga.

⁶ Millaica mana ñuto allpamantachu llucshin. Llaquipish mana allpamanta llucshin.

⁷ Shina cacpipish, rupacuc nina saltashpa huañuc shinami runapish llaqui tucungapac huacharin.

⁸ Ñucaca Diostami mashcaiman. Paimanmi ñuca llaquitaca mingaiman.

⁹ Paica pipish mana ruhuaipac mancharinacunata, shinallatac mana yupaipac sumaimanacunatami ruhuan.

¹⁰ Cai pachamanpish, tarpushca pambacunamanpish tamyatami cachan.

¹¹ Yangalla runacunataca jatun alli nishcatami ruhuan. Manchailla causaccunamanca cushilla causaitami cun.

¹² Millaita ruhuangapac yuyaita chariccunataca paicunapac maquihuan ama imata ruhuachunmi pandachin.

¹³ Jatun yachaccunataca paicunapac yachashcallapitacmi urmachin. Millaita ruhuaccunataca paicuna yuyarishcatami pandachin.

¹⁴ Paicunaca punzha pachami purapi shina huactarincuna. Chaupi punzhapimi tutapi shina mitcarishpa purincuna.

¹⁵ Millai runacuna rimashpa llaquichiccunapac maquimantapish, espadahuan huañuchinamantapish imata mana chariccunataca quishpichinmi.

¹⁶ Imata mana charicca Diosllapimi shunguta churan. Ashtahuanpish mana allita ruhuashcaca shimitami huichcan.

¹⁷ ¡Dios llaquichishca runaca alli nishcami can! Tucuita ruhuac Dios llaquichicpica, ama yangapi charinguichu.

¹⁸ Pai chugrichishpapish paillatacmi jambin. Pai nanachishpapish paillatacmi allichin.

¹⁹ Sucta cutin llaquicuna japicpipish, cacharichingami. Canchis llaquica ña mana japingachu.

²⁰ Yarcaihuan huañugricucpipish quishpichingami. Jatun macanacuipi espadahuan huañunamantapish quishpichingami.

²¹ Millaita rimac callumantapish miticunguimi. Chingachic llaquicuna shamucpipish, mana manchanguichu.

²² Chingachic llaquicuna japicpipish, yarcai japicpipish asinguimi. Sacha animalcunatapish mana manchanguichu.

²³ Pambapi tiyac rumicunahuanmi ari ningui. Sachapi causac animalcunahuanpish, sumactami causangui.

²⁴ Cambac huasipi sumac cushilla cashcatapish yachanguimi. Cambac causana huasipi ricungapac yaicucpica, imapish mana illangachu.

²⁵ Canca achca huahuacunatami charingui. Cambac huahua huahuacunaca pambapi quihua tiyac shinami canga.

²⁶ Cosechanalla trigota sinchirac cacpi tandashca shinami, sinchirac cacpi enterrana jutcuman apashca cangui.

²⁷ Caitami taripashpa yachashcanchic. Chaica chashnatacmi can. Canca caita uyashpaca cambac allipacllata allita yachacui» nirca.