JOB 42 - Dios Rimashcata Quillcashcami

Job pandarishcata Diosman huillashcamanta

¹ Jobca Mandac Diostaca:

² «Ñucaca cantaca tucuita ruhuac cashcatami yachani. Can imata ruhuanata yuyarishpaca tucuitami ruhuangui. Canmanca mana ruhuaipacca imapish mana tiyanchu.

³ ¿Pitac alli yachachishcacunata mana entendishpa pandachisha nircayari? Ñucaca imata mana entendishpa rimarinillami. Chai rimashcacuna ñucaman sumaimana cacpipish, ñucaca mana entendircanichu.

⁴ Cunanca canhuanmi rimasha nini. Ñuca tapushcata cutichingapac alli uyai nircanguimi.

⁵ Can rimashcataca ñuca ringrillahuanmi uyarcani. Shina cacpipish cunanca ñuca ñahuihuantacmi ricuni.

⁶ Chaimantami yallita llaquirishpa, ñuto allpapi, uchupapi tiyarini» nirca.

Mandac Dios Jobta bendiciashcamanta

⁷ Mandac Dios Jobta tucuita rimashca quipami, temanitapuramanta Elifazta rimashpaca: «Cancunaca ñucata servic Job shina ñucamantaca mana allichu huillacunguichic. Chaimantami canhuanpish, caishuc ishcai runacunahuanpish yallita piñarini.

⁸ Cunanca canchis becita, canchis carnero ovejata cancunamanta ñucaman cushpa, tucui rupachichun ñucata servic Jobman cugrichic. Ñucata servic Jobmi cancunamanta ñucata mañanga. Pai mañashcatami ñucaca uyasha. Pai mañacllapimi, cancunataca ñucamanta mana allita huillashca cacpipish, mana yallita llaquichisha. Cancunaca ñucata servic Job shinaca mana huillarcanguichicchu» nirca.

⁹ Shina nicpimi, temanitapuramanta Elifazpish, suhitapuramanta Bildadpish, namatitapuramanta Zofarpish Mandac Dios mandashca shina ruhuarca. Chaimantami Mandac Diosca Job mañashcata uyarca.

Job cutinllatac alli causaita callarishcamanta

¹⁰ Job paipac ricsishca quimsa runacunamanta mañashca quipami Mandac Diosca paimanca ñaupa charishcamanta ishcai cutinhuan yallita bendiciarca.

¹¹ Chai quipami paipac huauquicunapish, panicunapish, tucui ñaupa ricsishcacunapish paihuan micungapac huasiman shamurcacuna. Mandac Dios paita llaquichishcamantami paicunapish llaquishcata ricuchingapac, cushichingapacpish shamurcacuna. Tucui paicunami cullquitapish, curi sortejascunatapish caishuc chaishuc cungapac apamurcacuna.

¹² Mandac Diosca Jobpac tucuri punzhacunapica punta bendiciashcata yallimi Jobmanca bendiciarca. Chaimantami paica chunga chuscu huaranga ovejata, sucta huaranga camellota, huaranga yunta huagrata, huaranga burrota charirca.

¹³ Canchis churicunatapish, quimsa ushicunatapish charircami.

¹⁴ Punta ushitaca Jemimatami shutichirca. Quipa ushitaca Cesiatami shutichirca. Shinallatac quipa ushitaca Keren-hapuctami shutichirca.

¹⁵ Jobpac ushicuna shina sumac huarmicunaca mai llactapipish mana tiyarcachu. Jobca paicunamanca paicunapac turicunaman shinallatacmi herenciata curca.

¹⁶ Job alliyashca quipaca patsac chuscu chunga huatatami causarca. Jobca paipac churicunatapish, nietocunatapish, charishpami, chuscuniqui mirai huahuacunatapish ricurca.

¹⁷ Paica unai huatacunata causashpami, yallita yuyacyashpa huañurca.