JOB 41 - Dios Rimashcata Quillcashcami

¹ ¿Canca Leviatán animaltaca anzuelollahuan llucchi pudinguichu? ¿Paipac callutapish huascahuan huatai pudinguichu?

² ¿Singa jutcucunapipish huascata pasachi pudinguichu? ¿Jazhatapish jutcushpa fierrota churachi pudinguichu?

³ ¿Paica ama llaquichichun canta mañac shamungachu? ¿Cantaca cuilla rimaicunahuan mañangachu?

⁴ ¿Tucui causaipi canta servingapac canhuanca ari ningachu?

⁵ ¿Paihuanca zhutacunahuan shina pucllai pudinguichu? ¿Cambac huarmi huahuacuna pucllachun huatai pudinguichu?

⁶ ¿Paitaca randiccunahuan negociota ruhuai pudingachu? ¿Randiccunapura chaupinacui pudingachu?

⁷ ¿Paipac carataca cuchillohuan piti pudinguichu? ¿Paipac umataca challuata japina fierrohuan piti pudinguichu?

⁸ Paipac uma jahuapi cambac maquihuan tuparishpa, paihuan macanacushcataca yuyaricunguillami. Cutinca mana tuparisha ninguichu.

⁹ Pi paita ricushpaca mancharishpami yuyaita chingachin. Pipish paita japisha nishpaca yangallatami yuyan.

¹⁰ ¿Pitac paitaca ricchachi pudinga? ¿Pitac paipac ñaupapi shayari pudinga?

¹¹ Ñuca cutichichunca, ¿pitac ñucaman imata curca? ¡Cai pachapi tucui ima tiyashcacunaca ñucapacmi can!

¹² Pai ima shina cashcatapish, paipac podermantapish, mana manchac cashcatapish mana upalla saquirishpami huillasha nini.

¹³ ¿Pitac paipac aicha carataca anchuchi pudingayari? ¿Pitac paipacman chayashpa ishcai frenota churangayari?

¹⁴ Paipac shimi muyunditaca manchana fino quirucunami. Chashna cacpica, ¿pitac paipac shimitaca pascai pudingayari?

¹⁵ Paipac huasha lomopish escamacunata quichquita sirashpa churashca shinami.

¹⁶ Huairapish maita mana yaicuipac chaipurata yallita quichquita churashcami.

¹⁷ Chaipura sumacta llutashca, maita mana chicanyaipacmi.

¹⁸ Pai jachic nishpaca achic nicuc ninatami llucchin. Paipac ñahuicunaca inti llucshimuc shinami achicyachin.

¹⁹ Paipac shimimantaca culun nicuc ninapish, jaguin nicuc chispaspish llucshinmi.

²⁰ Paipac singamantapish, timbucuc mangamanta shinami cushni llucshin.

²¹ Paipac samaillami carbonta rupachin. Shimimantaca culun nicuc ninami llucshin.

²² Paica cungapimi yallita fuerzata charin. Paita ricushpaca manchaillatacmi yuyaita chingachin.

²³ Paipac aichapish rumiyashca shina maita mana cuyuripac yallita sinchimi.

²⁴ Paipac shunguca cutana mama rumi shina sinchimi.

²⁵ Pai jataricpica yallita sinchicunapish, manchaillatacmi yuyaita chingachishpa callpancuna.

²⁶ Espadahuanpish, lanzahuanpish, flechahuanpish, fierro churanahuanpish paitaca mana pi huañuchi pudinchu.

²⁷ Paimanca fierroca ucsha shinallami. Broncepish ismushca caspi shinallami.

²⁸ Flechacunapish paitaca mana manchachinchu. Huaracahuan shitacpipish, rumica ucsha shinallami japin.

²⁹ Martillohuan huactashcapish paimanca shicshic shinallami. Espadacunata chilin nichicpipish paica asinmi.

³⁰ Paipac cuerpoca puntasapa fierrocuna churashca shinami. Pai purishca pambacunaca jutcu jutcumi saquirin.

³¹ Mama cucha ucutapish mangata timbuchic shinami timbuchin. Shinallatac jambiccunata tandachishpa timbuchic shinami ruhuan.

³² Jatun mama cuchata purishpapish, puscuta shitashpami yuranlla pambata saquin.

³³ Cai animal shinaca imapish mana tiyanchu. Imatapish ama manchachun ruhuashcami can.

³⁴ Mai jatun tucushcacunatapish mana manchanchu. Tucui sinchi animalcunata yalli sinchimi can» nirca.